Da nhuaxanaguec 'enauac na huetalec ana 'alhua
1Ña qauloỹa da Ñim Nataxala' nlaxaañi qome ana 'alhua,
nache qaica qome ca no'onañi da huetalec anamaye,
qataq ỹataqta qaica ca laỹamaqa' naqa'en
qataq ilagaxattac 'enauac nam huetalecpi anamaye.
2Qaq nache 'eetec qome nataqa'en na ntaxaỹaxanaxanecpi,
qataq na nhuo' le'ecpi, 'aco', nlatac,
'acoro, qataq aca nlata, ca nmeetac, qataq ca demenaxaatac,
qataq cam qaỹa'aalaxanot, qataq cam da'aalaxan,
qataq cam navigaqtaxanaxala',
qataq cam huo'o aca lavigaxaiste.
3Nache ana 'alhua ỹataqta toolec qome
qataq qaỹacona 'enauac na huetalec.
Cha'aye nachera da la'aqtac Ñim Nataxala'.
4Ana 'alhua deqaqa qome
qataq nquictañi da la'añaxac,
qataq 'enauac na huetalec ana 'alhua
deqaqta qataq nquiguiñi da la'añaxac,
nache na piguem qataq ana 'alhua
nlaqchigui qome da naquicoxo.
5Ana 'alhua qalaq nlaxagui na qauem
souaxat nam netalecpi,
cha'aye sa ỹalaxaguet nam lapaqtañi nqataxacpi,
qataq saishet da ipaguelec na namaxasoxonaxacpi,
qataq sa iyacnapec da chochaq tatec aỹamaxataxac.
6Qaq ỹoqo'oye de'era qauem nlaxaañi ana 'alhua,
nache nam netalec anamaye nque'etaxangui da nhuaxanaguec.
Qaq ỹoqo'oye namayepi, nquiga't ye lcata,
nache saq 'amaqtaq na no'onañi shiỹaxauapi.
7Na lataxa qalaq imeuo, nam nanaxanaqa'pi qalaq deqaqa,
nam huetaigui co'ollaxa da lamaicỹaxac
qalaq nlaxagui da laquicoxo.
8Ana qataquipi qataq ana 'aarpapi
maye ỹo'ot da namaicỹaxac
qalaq imeuo so no'on l-lamaxa,
qataq qaica so laỹaquiaxac na lqopitaxat da na'ashaxac.
9Qataq sa nỹomgui na lataxa da do'onaxaatac,
cha'aye na nỹomaxaicpi ỹataqta ichemaxan qome na lataxa.
10Yem huaqta'a't nỹecpi qalaq nlachiguiñi,
qataq qaica ca laỹamqa',
nache saishet da qainoxonoigui ca 'oonolec nỹec.
11Na shiỹaxauapi qalaq netanguilo naua nqa'aico da nỹeetac,
souaxat da qaica ca lataxa, qaq 'enauac da namaicỹaxac imeuo,
qataq ca'ai ana 'alhua.
12Ye huaqta'a't nỹecpi qalaq ỹataqta nlachiguiñi,
so lasom som ñegueuo qalaq nlachiguiñi.
13Qaq 'era da 'eetec qome 'enauac na ỹotta'a't shiỹaxauapi ana 'alhua,
'eeta'am qome da qanacholaxaañi aca ala aca oliivo,
qataq 'eeta'am da 'eetec da qalaỹootega't
aca no'onañi ala aca uva da ime da nqataguec.
14Qaq cam lca'alaxaicpi qalaq ỹa'alaqtagui qome
souaxat da ntonaxac,
qataq chegoqchiguiña qome da nala' lliguiñi da lavilỹaxac,
qom ila'a da la'amaqchec Ñim Nataxala'.
15Nataqa'en da nala' lliguisheguem
qataq na 'alhuapi maye hueto'ot na loigue aso auaxai,
ỹo'oxoren qome Ñim Nataxala' maye Natamnaxala' na Israel le'ecpi.
16Qaq chegoqchiguiña ye loga't ana 'alhua,
da sa'axasoqtega qome da no'onaxanaxac, 'eeta':
«Huo'o da llo'oxoyec Ñim No'on da lataxac!»
Qalaxaye aỹem shenapec: ¡Choxoraicolec aỹem!
¡Ỹataqta aỹem nquigaxatta'a't da ñequi'ic!
Nam que'elaqtaxanaxaicpi ỹataqta deque'elaqtaxan.
17Qami' maye qoñiitalec ana 'alhua,
qami' taleguete qome ca lta'araic lchec
qataq qa'aỹingui aca nshere qataq aca nqoina.
18Qaq cam dataueeguesop ca lchec qalaq tangui qome aca nshere,
qaq cam chegaqangui aca nshere qalaq tangui qome aca nqoina.
Cha'aye nauatoigui qome na lasompi na piguem,
nache naañi qome ca lta'araic auot nache cholaxan
nam na'attalecpi ana 'alhua.
19Qaq ỹataqta cholaxan qome ana 'alhua,
ỹataqta cholaxan nache ivitta'a da depoxoỹapega't.
20Qataq 'eeta'am ca taxaic da ỹe'egottapigui',
qataq cholaxaatac 'eeta'am catai' npe'l maye sa da'añaañi.
Qaq souaxat da ipataqtañi nam lasouaxashetpi namayepi,
nache ivitta'a da huañi nache saishet da ỹe'eguelaxa da nachaañi.
21Que'eca na'a'q Ñim Nataxala' ỹauo'o qome ca nhuaxanaguec
na 'añaxaicpi maye hueto'ot na piguem
qataq na nta'alpi maye netalec ana 'alhua.
22Qataq laỹona't qome 'eeta'am naqa'en
da ỹapoua'a ca ncoñeteguishecpi
qaq qom inoxoorec caua qalote' na'axa'te
nache ỹo'ot ca nhuaxanaguec.
23Qaq qom ỹacoolec da lo'onataxanaxac
Ñim Nataxala' maye Qaica ca Ỹaqalanapec
huaña añi qasoxonaxa Sión, yem Jerusalén
nache añi nala' qataq ñi ca'agoxoic 'om qome,
nache nam lataxala'pi nam nalamaxat nhuo' le'ecpi
ila'a qome da llo'oxoyec Ñim Nataxala'.
