Da no'onec da huo'o ca nauegaxanaxac
1Qaq que'eca na'a'q qom huaña ye 'alhua Judá nache qaỹo'on dam no'onec, maye 'eeta':
«Qomi' huo'o na qaralamaxat huaqta'a't nỹecpi
maye ỹataqta qaramta, 'eeta'am ca npaqtaxanaxat
maye huo'o ca pa'aỹauec lpaqtaxat maye ỹataqta sa nsattec,
Ñim Nataxala' nauaxaỹaxaasheguem co'ollaxa da yaqto' qomi' nca'alaxatrec.
2Ña qauauachiỹoigui na lasompi yaqto' pa'auo
nam shiỹaxauapi maye no'on da lataxac qataq laxaraicpi.
3'Am Nataxala', 'am 'aỹa'anem da l-lagaxayec
nam sa nquic da lataxac, cha'aye ỹataqta 'am pi'iỹa'a.
4Qami' nache 'eetai' qome da qapi'iitega Ñim Nataxala',
cha'aye nacheñi ñim chochaq tatec ñe'eguenaxala'.
5Ñimaye huañi naqa'en so ño'oxonnaxaicpi,
qataq qaica naqa'en ca la'amaqchec som na'amqaanaxaic huaqta'a't nỹecpi,
nache hueta'aguet naqa'en na 'alhua,
6yaqto' na qaica ca la'amaqchec
qataq na choxoraqpi pigui.»
7Da llecỹaxac na no'on da lataxac qalaq no'oitegue,
'Am Nataxala', 'analoqchichiguiñi da llecỹaxac namayepi.
8Qomi' nataqa'en ñanomaqta da ỹataqta qolaqtegue
so nqa'aic maye qomi' 'auachaxanalo
chegoqchiguilo naua 'arqataxaco, 'Am Nataxala'.
Da lhuennataxac añi qarquiyaqte
qalaq huotaique da saishet da 'am secouaqa'ai.
9Qaq ỹataqta imauec ye pe da 'am seuennatega,
qataq yem ỹataqta pa'auo ivilỹaxac 'am nmittaique.
Qaq qom 'anmit ana 'alhua, nache na shiỹaxauapi
ỹaỹaten qome da nalochiguiñi lataxac.
10Qaq na'aictaxa da qaichoxoren na qauemaicpi,
qalaxaye namayepi saỹaỹaten qome da ỹo'ot da nalochiguiñi lataxac,
nacherata da ỹo'ottac da qauem da netalec
na na'alhua nam no'on da lataxac,
qataq saishet da iuennatega da la'amaqchec Ñim Nataxala'.
11'Am Nataxala', na 'arhuaq mashe lhuotta
da 'auaxan namayepi, qalaxaye namayepi saishet da ila'a,
qaq qom ila'a da lta'araic 'arauotaxanaqtaic
nam 'aralamaxat nhuo' le'ecpi,
nache namayepi huo'o qome da la'aloxo.
¡Qaq 'onaxaictoxo' da na le'eraxa da 'aralemataic
ỹavigaxatta qome namayepi!
12'Am Nataxala' qomi' 'aỹa'anema qome ca nlagaxayec,
cha'aye nache 'am chegoqchigui da yo'oq nam qaro'onatacpi.
13'Am Nataxala' maye 'Am Qanatamnaxala',
som laỹepi nataxala'pi qomi' ilotegueto co'ollaxa,
qalaxaye saỹaanaqta da nache 'amta da 'Am Qarataxala'.
14Somayepi mashe ileu nache saishet da qaltaq nca'alec,
somayepi 'eco' choche lpaqal, nache saishet da qaltaq nachaañi,
cha'aye 'am 'auo'ot co'ollaxa da nhuaxanaguec
nache 'aulaxachigui, qataq nache loga't 'anqaq'en
da saishet da qaiuennatega somayepi.
15'Am Nataxala', nache 'am co'ollaxa
da nquictauec 'anqa'en na nhuo' le'ecpi,
'auo'ot da nquictauec da yaqto' huo'o da 'ayo'oxoyec,
qataq 'anquigaxatec 'enauac nam loga'tpi ne'ena 'alhua.
16'Am Nataxala', co'ollaq souaqaigui
so qanqui'ic nache 'am ñimitaqaique,
qataq 'am seỹaxanaqot co'ollaq qomi' 'auaxaata'ape.
17'Am Nataxala', 'am souaqto'ot co'ollaxa,
shenaqta'am aca 'alo hualaxai
maye mashe deco'otapigui'
da ncocateguiñi, qataq ỹa'alaqtac
souaxat da nqui'ic,
18Qaq eco' da qomi' hualaxaipi
qataq huo'o da qanqui'ic da seco'oq,
qalaxaye da qarco'oxoc qui'itchigui 'eeta'am ca la'at,
nache saishet da ñeviraxataxa ana 'alhua da nca'alaxa,
qataq saishet da ñiguiñi ñaqa'enaq ca shiỹaxauapi
da yaqto' netalec ana 'alhua.
19Qalaxaye so 'aralamaxatpi maye ileu,
somayepi qaltaq nca'alec qome,
so mashe qailareñi qalaq ỹoltaq nca'alec qome,
qaq nam do'ochetapi maye huetaigui ana 'alhua
qalaq nlouec qome nache ỹa'alaqtagui
souaxat da ntonaxac,
cha'aye 'am 'anamaxa qome ca 'arcoỹaraxanaxac
'eeta'am 'anqa'en na 'aỹa ye nte'etom, nache nam leuaxaicpi
chegoqtoigui qome ana 'alhua da qaltaq nachaañi.
20Qauesomiỹa qami' ỹalamaxat nhuo' le'ecpi,
qa'aỹoiguilo naua qarma'achilli' nache qanapoila't,
ñaq cara'acolec da qanqañoxochiiñi,
nato' qom vi'iiguet da layeloxo Ñim Nataxala'.
21Cha'aye Ñim Nataxala' mashe yaqta'a da ca'ai ñi lma' lta'araic,
da anac da yaqto' ỹauo'o ca nhuaxanaguec na shiỹaxauapi
maye netalec ana 'alhua souaxat na lasouaxashetpi,
nache ana 'alhua ỹachaxan qome na ntago'q maye laguelec anamaye,
qataq saishet da nache queto'ot da ỹoxottapiguiñi
na leuaxaicpi maye huetaigui anamaye.
