Qaỹa'axata'a da qailaxachigui ye Samaria
1¡Qaq choxoraxaso' ye Samaria, maye ño'oxonnaxaqui
qataq 'eco' no'on naro'o ye Efraín,
yem nhuo' le'ecpi maye 'eeta'am na taxaicpi,
qataq llo'oxoraqte ana huo'o da lyac lauoxo maye taỹa'a da deqaqa,
maye hualec na lcomaraxa so 'onaxaic ca'amegue,
yem huaqta'a't nỹecpi maye hueta'a na shiỹaxauapi
maye mashe sa nauec da lamanaxanaxa na lataxa!
2Qaq Ñim Nataxala' mashe iqataxaatai' ñi ỹale maye sansatta,
qataq 'añaxaic, 'eeta'am ca la'at da nactaigui aca lache,
'eeta'am ca la'at maye sala'axaic da la'añaxac,
'eeta'am ca auot lta'araic, qataq 'eeta'am ca chaqaic ndep
da ipaxaalec naqa'en ana 'alhua.
Qaq irota'a qome na lhuaq da ỹamaxañi ye Samaria
nache huetaiya' naqa'en,
3qataq irota'alo naua lapia'ate da dapaxañi naqa'en,
yem ño'oxonnaxaqui qataq 'eeta'am aca no'on naro'o,
yem taxaicpi nhuo' le'ecpi maye lma' ye Efraín.
4Qaq anam huo'o da lyac llo'oxoraqte
lauoxo maye taỹa'a da deqaqa,
maye hualec na lcomaraxa so 'onaxaic ca'amegue,
qalaq 'eeta'am qome aca la'auaxana ala ana hiigo,
da huo'o ca choche ila'a nache ỹacona da chec.
5Qaq que'eca na'a'q Ñim Nataxala' maye Qaica ca Ỹaqalanapec,
nacheñi qome ñim aro'o maye huo'o da llo'oxoyec,
aro'o maye llo'oxoraqte qome cam no'onañi nam lalamaxat nhuo' le'ecpi,
6qaq ỹanem qome da nalochiguiñi da lo'onataxanaxac
ca nmit na nasouaxashetpi, qataq ỹanem da la'añaxac
cam alleppi maye npaxaalec ye huaqta'a't nỹecpi.
7Qalaxaye nataqa'en huo'o na laỹepi maye
ỹe'egottapigui' souaxat da nỹomaxac na lataxa,
qataq pogolaxaateguiñi souaxat na ỹataqta chem lataxa,
na ntaxaỹaxanaxanecpi qataq na na'aqtaxanaxanecpi
qalaq ỹe'egottapigui' souaxat na ỹataqta chem lataxa,
qaica ca laỹaanataxanaxac souaxat na lataxa,
qataq pogolaxaateguiñi souaxat na ỹataqta chem lataxa,
qataq ỹe'egottapigui' da huo'o na l-loxocpi,
qataq taxaicpi da huo'o ye nmit nasouaxashet.
8Na lquia'axala'pi qalaq nlaqaalec
na lolaxat maye ỹataqta qaiqaiga,
nache nam lquia'axala'pi ỹataqta qaica ca qui'itta.
9Qataq aỹem ỹe'eetac nache, 'eeta':
«¡Qalaq anac da qomi' ỹapaxague'n qataq qomi' da'aqtaxanema
nam lauanaqchecpi maye chegoqo'ot Ñim Lo'onatac 'Enauacna!
¡Da shenaqta'am naqa'en catai' ñaqpiolec maye ñaq qapio'olecpi,
10maye ñaq cheta'ague da napaxagueetega da ltaxaỹaxanataxanaxac!»
11Qaq cha'aye da saỹalaq namayepi
nache Ñim Lo'onatac 'Enauacna, qom detaxaỹot namayepi
nache ỹauota'aisalo qome caua na'aqtaqa
maye ỹaleca'aguet nam saqaỹauanapega na'aqtacpi.
12Cha'aye Ñimaye mashe 'enapega co'ollaxa namayepi, 'eeta':
«'Ena na hueta'a da ñe'emaxa, 'ena na mataqa',
qaq nmatec qome cam nasamñi.»
Qalaxaye namayepi saishet co'ollaxa da ỹalaxaguet Ñimaye.
13Qaq ỹoqo'oye Ñim Nataxala' qom detaxaỹot namayepi,
nache 'eeta'am naqa'en catai' ñaqpiolec maye ña qapio'olecpi,
maye ñaq cheta'ague da napaxagueetega
da ltaxaỹaxanataxanaxac.
Qaq huaña nache da queuoỹapigui' nache datatcheguem da huañi,
qataq que'emaq tangui aca qoina nache noxonec qome.
14Qaq qami' ỹalleppi maye qaica ca qaureñi,
maye qauloitague' na nhuo' le'ecpi na Jerusalén,
ña qana'axaỹaxañiỹa da la'aqtac Ñim Nataxala'.
15Qami' maye qoñiỹapec naxa:
«Qomi' mashe ñaỹamaxataxai' co'ollaxa da nleuaxa,
mashe ñaỹamaxataxai' co'ollaxa añi huachiqui,
yaqto' qom ivita da anac cam ỹataqta qauem na'a'q,
nache saishet qome da qomi' loxonqa,
cha'aye she'eguenoqot da natenataxanaxac,
qataq qomi' npaxattaleguete da ashepegaxanaxac.»
16Qaq ỹoqo'oye Ñim Nataxala' 'enapec:
«Aỹem sanaña qome ye Sión ca coma',
ca coma' maye lleca'aguishec qataq ỹataqta lta'araic da lasheechiỹaxac,
qaq camaye nacheca qome cam ỹactec da 'enec,
qataq nacheca cam lo'oxonaxala' ca nỹec.
Qaq cam pi'iỹa'a qome camaye qalaq ỹataqta ỹe'emaqtac.
17Qaq qom ño'oxoosheguem que'eca nỹec,
nache so'ogoxona da nalochiguiñi lataxac qataq da no'on lataxac.»
Qaq dam natenataxanaxac maye qavi'eguiñiỹoigui co'ollaxa,
qalaq ilaxachigui qome aca lache,
qataq ca 'etaxat nlaxagui qome naqa'en ca qanqañoxotaqa'ai.
18Qataq dam qanaỹamaxataxaqui co'ollaq
qanaỹamaxachi' da nleuaxa qanlaxaañi qome,
qataq da qanaỹamaxataxaqui co'ollaq qanaỹamaxachi' añi huachiqui,
qaica qome ca naigui.
Cha'aye anac qome ca qauem na'a'q nache qami' dapaxareñi naqa'en.
19Qaq qom ivita da anac nache qami' ỹauogoleeta'ape.
Cha'aye 'enauaque qome naua na'axa'te da anac ye na'a'q qataq ye pe,
qom choche qaua'aqaỹa da qaỹa'axatta'aguet,
nache ỹataqta qami' iviloxolaqche't da qarcolanaqai.
20Qaq 'eeta'am qome da qannatalec ca mala' maye salca'ague,
qataq da qanapotaña ca npo' maye saqaloc.
21Ñim Nataxala' nachaañi qome,
'eeta'am co'ollaq huaña añi qasoxonaxa Perasín,
qataq ỹachaxan qome da lalemataic, 'eeta'am
co'ollaq huaña so ca'amegue ye Gabaón,
qom ỹacoolec da ỹo'ot da sa qaỹauanapega lo'onataxanaxac,
qataq da ỹo'ot dam saqcha'a lo'onataxanaxac.
22Qaq nagui no'on da nache tachiguiña da qare'enaxanaxaqui,
cha'aye saiuena'a da qaltaq qaichegaxaañi na qancoñetaxache,
cha'aye Ñim Nataxala' maye Qaica ca Ỹaqalanapec,
mashe sa'aqchigui da lapaxañi
da nlaxaañi qome 'enauac ne'ena 'alhua.
23Qana'axaỹaxañiichiguiñi,
ña qana'axaỹaxañiỹa dam shenapec,
ỹataqta qana'axaỹaxañiichiguilo naua ỹa'aqtaqa.
24Cam ỹo'ottac naxa na 'alhua da huotaique da danaxan,
qalaq saishet da imauec ye na'a'q da na'atteguesheguem ca na'alhua,
huo'otaq da ilaxattapigui qalqo' ỹamoxoỹaxattac ca lanaxanaqa'.
25¿Qaq peta'a saq 'eno' naxa da ime da naloqchiiñi ca lanaxanaqa',
nache ilagaxaalec ana lañiguishe maye ala na eneldo qataq na comino,
qaq da ime nache ỹashectrec naqa'en naua lleco da ỹaañi na trigo,
qaq naua loiguiye ca lanaxanaqa' qalaq ỹaalec na cebada qataq na centeno?
26Cha'aye Ñim Lo'onatac 'Enauacna nacheñi
ñim ỹapaxaguenec dam 'eetec da lataxac da ỹo'ot.
27Cha'aye na eneldo saishet da qairota'a
aca nchegoxosoxonaqte da qaichegoq,
qataq na comino saishet da pelec qanqa'en aca lasaxanna aca naigona,
nacherata da qairota'a ca 'epaq da qaichegoq
na eneldo qataq na comino.
28Qaq nachenata na trigo maye ishet da qaichegoq
qalaxaye saishet da sa qaỹa'axaneguet,
qataq ishet da pelec qanqa'en aca lasaxanna
aca naigona da qaiỹotauga ana ala,
qalaxaye saishet da dolagui qanqa'en.
29Qaq de'era nataqa'en chegoqo'ot Ñim Nataxala' maye Qaica ca Ỹaqalanapec,
da yaqto' ỹauo'o da llo'oxoyec da lqataxac,
qataq huo'o da la'amaqchec naqa'en da laỹaanec.
