Da nca'alaxa chegoqo'ot Ñim Nataxala'
1¡Choxoraxaso' 'am maye 'anhuottac na shiỹaxauapi,
qalaq ỹauana da 'am qanhuo',
qataq 'auque'elaqtaxan naxa qalaq ỹauana
da 'am qaique'elaxat!
Cha'aye qom 'aumat da 'anlaxaañi namayepi,
nache 'am qanlaxaañi qome,
qataq qom ime da 'arque'elaqtaxanaxac,
nache nataqa'en 'am qaique'elaxat qome.
2'Am Nataxala' ña qomi' 'auchoxore'n qome,
cha'aye nache 'Am seuataqtaique.
Qaq nache 'Am qome qomi' 'autauaata'ape ye nte'eta,
qataq 'Am qarca'alaxaqui qom huo'o ca qarhuogoxo.
3Nam shiỹaxauapi datauec qom
hua'axaỹa da l-lamaxa da 'arvilỹaxac,
qom 'anachaañi nache nlagaxattac
na ỹotta'a't shiỹaxauapi,
4nache na npa'aguenaxauapi
'eeta'am qome aca qalota shiiquioxoipi,
da nqo'ona namayepi da deuotaxanec da lsallaxa.
5Ñim Nataxala' ỹataqta lta'araic da la'amaqchec,
cha'aye neto'ot na piguem.
Ñimaye nlaxattelec
da no'on qataq da nalochiguiñi lataxac ye Sión.
6Ñimaye nacheñi ñim npaxattalec
'enauaque naua na'axa'tesa'ache.
Da naỹaanec qataq da nauattonaxanaxac
nachera da lsallaxa qataq lca'alaxaqui,
qataq da ỹalaxaguet Ñim Nataxala' nachera dam lsallaxa.
7¡Ña qana'axaỹaxañiỹa da 'eetec da la'alaxac
na 'añaxaicpi da quetague' na nqa'aicpi,
qataq da 'eetec da nnoinaxac na
namaxashecpi maye ilotaique naxa ca nlagaxayec!
8Na nqa'aicpi qalaq toolec qaica ca quetague' namayepi.
Da aỹamaxataxac qataq nam
qanaỹamaxachiguipi qalaq nlaguiñi,
nache qaica ca shiỹaxaua da huo'o naq 'enec qanqa'en.
9Ana 'alhua huasootac qataq daquicotac,
ye Líbano qalaq huo'o da lcoxo nache deqaqa,
qaq ye ca'amegue ye Sarón qalaq 'eeta'am ca toolec 'alhua,
ye Basán qataq añi qasoxonaxa Carmelo
qalaq deqat da lyac na huetalec.
10Qaq Ñim Nataxala', 'eeta':
«Nagui ñachaañi, nagui sachaxan
da ỹo'oxoyec qataq da ỹa'amaqchec.
11Na qalapaqaiñipi qataq nam qaro'onataqui,
qalaq 'eeta'am ca 'auaqpi qataq ca lasogoñi,
qalaxaye na le'eraxa na ỹa'at ỹavigaxatañi qome.
12Qaq nam nhuo' le'ecpi qaỹavigaxat qome,
nache 'eeta'am aca ỹaxat nchiiguishe
da qaỹavigaxat qaỹasaxangui ca norec.
13Qaq qami' maye qami' qaỹoqtalo
ña qaua'aqaỹa dam so'ot,
qataq qami' maye qami' saqaỹapigui
ña qauauattoñiita dam ỹa'añaxac.»
14Qaq ye Sión qalaq iviloxol na 'etaxaloxoicpi,
na qauemaicpi qalaq nlaxagui da lcolanaxa,
nache, 'eeta':
«Dam shenaqta ¿negue't ca ishet da huetaigui
nam norec maye dalaataxanapec,
nam lta'araic norec maye chochaq tatec?»
15Cam ỹo'ottac dam nalochiguiñi lataxac
qataq 'eesa ca la'aqtac,
qataq cam deqaiga da dauegaxaatapigui da qaica ca iren,
qataq cam saỹaconeguet da qaisheenaxana da huo'o ca ỹo'ot,
qataq cam saishet da na'axaỹaxana da
qaitaqtapigui ca nalaataxanaxac,
qataq ỹapoguilo naua la'ai'te da yaqto' saila'a ca qauem,
16qaq nacheca qome ca qaica ca ndaqtaique,
qataq lle'eguenaqa' qome cam lo'oxonaxat na coma',
qataq nache 'eetai' qome da huo'o ca aloq
qataq saqoue ca laquip 'etaxat.
17Qaq huaña nache qaltaq qauloỹa'a qome
ca nta'a maye huo'o da llo'oxoyec,
qataq qauloỹa'a qome ca 'alhua maye ivira'a
cam ỹataqta qaỹoqta.
18Nache qom tachigui qarvilli dam qarcolanaqai
maye qoviitaigui co'ollaxa nache, qoñiỹapec:
«¿Hueta'ague cam neraxanaq?
¿Hueta'ague cam naloqteetac naxa
nam qoỹaneuo nsheetenaxanaxat?
¿Hueta'ague cam imeteetac naxa ana nalloxolatepi?»
19Qalaxaye saishet qome da qaltaq
ỹe'eguelaxa da qauloỹa'a,
ne'ena shiỹaxauapi maye qaica ca iren, nam shiỹaxauapi
maye huo'o da lqalaic da qaỹaỹaanegueta naua la'aqtaqa,
cha'aye ỹo'oxosa'alo nache qaica ca ỹaỹaanegueta.
20Ña qauloỹa ye Sión, yem huaqta'a't nỹecpi
maye huaña naxa na qara'ashaxacpi,
ña qauamachiỹa'a ye Jerusalén yem huaqta'a't nỹecpi
maye ỹataqta na'atchiguiñi,
yemaye 'eeta'am qome
ca npe'l maye saishet da qanlaxaañi,
qataq saishet da qanapogoyishegue'm naua lashel
qataq saishet da dachepi' naua lque'ete.
21Qaq nache huaña qome yemaye da Ñim Nataxala'
qomi' ỹachaxanalo da la'añaxac.
Nache huo'o qome nam talapi qataq nam
qalotegue la'auaxacpi,
qalaxaye saishet qome da quegue na qampa'aguenaxauapi
da netangui ana nnotaxaquipi nllocta
qataq anam nnotaxaquipi
maye ỹataqta huo'o da la'añaxac.
22Cha'aye Ñim Nataxala'
nacheñi Ñim qomi' ỹauecta'agueta
nacheñi Ñim qomi' ilotegueto
qataq nacheñi Ñim qarta'a.
Qaq Ñimaye nacheñi ñim qomi' nca'alaxatrec qome.
23Naua lque'ete ana notaxaquipi maye quiguingui
na 'etaxat qalaq saishet da ichegueleguete,
nache saishet da nllañi ana lashepi anamayepi
qataq saishet da qaipiguiisheguem
nam huaỹoxon naqa'en anamayepi.
Huaña nache seuotaxanaxac nam
qalota logoxoshetpi nam qampa'aguenaxauapi,
qaq ivira'a nam ñe'eerauo naua lchel da deuotaxanec
qome nam logoxoshetpi namayepi.
24Nache nam hueta'a yemaye qaica qome ca, 'eeta':
«Aỹem sano'on.»
Cha'aye Ñim Nataxala' ỹapalaxat qome
na lasouaxashetpi nam hueta'a ye Sión.
