Isaías 34

₁Ña qanquiquiiuo qami' ỹotta'a't shiỹaxauapi nache qana'axaỹaxañi,

qataq qami' nhuo' le'ecpi ỹataqta qana'axaỹaxañiichiguiñi qome.

Ña na'axaỹaxan qome ana 'alhua qataq na huetalecpi anamaye,

anam 'alhua qataq 'enauac nam ñaxattalecpi anamaye.

₂Cha'aye Ñim Nataxala' ỹataqta dalemataỹa nam ỹotta'a't shiỹaxauapi,

qataq denoỹa 'enauac nam nalleppi namayepi,

nache ỹaneguet da qanlaxaañi qataq da qaỹalauat.

₃Nache na leuaxaicpi qaỹasaxauec qome,

qaq nam qauem laita namayepi naỹoxoosheguem qome,

qataq ipaxanec na ltago'q 'eeta'am ca tala da ipaxaalec ana qasoxonaxapi.

₄Ana huaqaañipi qalaq colaxagui qome,

na piguem qalaq 'eeta'am qome aca nere da qainanegue,

qataq 'enauac ana huaqaañipi da naañi qome,

'eeta'am ana laue ana uva qataq hiigo da deqaqa nache naañi.

₅Aja', cha'aye so lainec Ñim Nataxala' mashe yo'oq hueto'ot na piguem,

qaq taalec qome ye Edom yem nhuo' le'ecpi

maye mashe taỹa'a da qoỹaneguet da nleuaxa.

₆Qaq so lainec Ñim Nataxala' huagui qome na ntago'q qataq na lcheta,

'eeta'am da 'eetec naxa da qaỹalauat na qagueta llalaqpi,

qataq ana quetaqpi da nachetaqtaxanaqte qaỹavigaxatta.

Cha'aye Ñim Nataxala' ỹo'ot qome ca ỹavigaxatta

lachetaqtaxanaxat huaña naqa'en ye Bosra,

qataq cam ỹataqta lta'araic lalaataxanaxac huaña ye Edom.

₇Nache namayepi cangui' qome nam huacapi maye le'enaxat búfalo,

na huaca llalaqpi qataq na huaca lhuaraicpi,

nache na ntago'q ỹapapiaxatta qome ye na'alhua namayepi,

qataq nlaxagui qome na lcheta na namoxoỹaxa yemaye.

₈Cha'aye que'eca na'a'q huetoigui qome da Ñim Nataxala' ipalaique lvi',

cam vi'i maye huaigui da ỹe'eguelaxateguet qome

nam qauempi maye qaỹo'otec co'ollaxa ye Sión.

₉Qaq nam la'auaxacpi ye Edom qalaq ipaxanegue qome

nam 'eeta'am na napannaxanaxat le'enaxat brea,

qataq na lsoche yemaye nañigui qome na quiquiaxaraic,

qataq na 'alhua 'ettaigui qome 'eeta'am na napannaxanaxat le'enaxat brea.

₁₀Nache saishet qome da 'om ye na'a'q qataq ye pe,

qataq nache 'eetai' qome da nchetapiguisheguem.

Qataq chochaq tatrec naua vi'iye da qaỹalat qome,

nache qaica qome ca ỹe'eguelaxa da ỹa'axasoxoolec yemaye.

₁₁Qataq yemaye nache lma' qome na cheguerequic qataq ana huoqo' late'e,

qataq ỹanaña da ỹo'ot na lpata'c na teguesan qataq ana chiyet.

Nache Ñim Nataxala' ỹo'ot qome da ỹataqta toolec yi'iye 'alhua

nache qaica ca shiỹaxaua da hueta'a yemaye.

₁₂Nache saishet qome da ỹe'eguelaxa da qaltaq

huo'o ca nta'a da ilo'ogue yemaye,

qataq imeuo qome 'enauac nam nataxala'pi yemaye.

₁₃Qataq na lma' lta'araicpi ñaxaalec qome ana ỹaxat,

qaq na lpaqtaxanaxatpi qalaq ñaxaalec ana poqo qataq ana cotaque.

Qataq nache lma' qome yemaye ana huaxaỹaxapi,

qataq lle'eguenaqa' qome yemaye na mañecpi.

₁₄Qaq na copaicpi qalaq ỹalecta'aguet qome ana huaxaỹaxapi,

qataq nỹaxaata'a't qome ana quetaqpi da hueta'a yemaye.

Qataq hueta'a qome yemaye na nqui'i maye dequichoqtaxan ye pe,

qataq nache hueta'a yemaye da nmatec.

₁₅Qataq na cheguerequic hueta'a qome yemaye

da ỹo'ot na lpata'c qataq ỹauo'o na lco'oue'pi,

qaq da huo'o na llalaqpi nache nqatec qataq laỹona't da yaqto' npaxattalec.

Qataq nataqa'en laỹonaqa' qome yemaye na teguesanpi,

qaq ñi 'oonolec qalaq nnaictague' ana lhua.

₁₆Ñaq qannachi' qataq qautaxaỹaxañi ana lere Ñim Nataxala':

Qaica da huo'otaq 'oonolec qome ca deqaptauec ne'ena shiguiỹacpi,

qataq qaica da huo'otaq 'oonolec qome ca qaca aca lhua,

cha'aye Ñim Nataxala' maiche lataxac naqa'en damaye,

qataq irolec na maiche la'at qom laỹona't namayepi.

₁₇Qataq Ñimaye maiche ỹauo'oi naua lma'ate namayepi,

qataq ỹauota'a na lhuaq da ỹachaxanalo naua loga'te nam na'alhua,

qaq nache 'eetai' qome da maiche lalamaxat

qataq chochaq tatrec qome naua vi'iye da netalec.