Isaías 4

₁Que'eca na'a'q saq 'amaqtaq qome ca no'onañi ỹalleppi,

qaq caua siete 'alol deloctrapigui qome ca 'oonolec ỹale,

nache caamaye 'enapega qome camaye, 'eeta':

«Qomi' maiche souaqapegue' qome da qarquia'axac,

qataq maiche souaqapegue' da qano'otaxac,

qaq nacherata qome da qomi' 'aỹa'anema da 'are'enaxat,

nache qomi' 'ausoueeguesopa da qarcoxo.»

₂Qaq que'eca na'a'q, nache aca llaxataxa

maye nañaxat qome naqa'en Ñim Nataxala',

nachaca aca llo'oxoraqte qataq llo'oxoyec

cam lca'alaxaicpi Israel le'ecpi,

qaq cam ala ca nañiguishec maye chegaqaigui ana 'alhua,

nacheca qome ca ỹo'ot da llo'oxoyec

qataq huo'o naq 'enec naqa'en camayepi.

₃Qaq cam nca'alecpi qome ye Sión,

qataq cam lca'alaxaicpi ye Jerusalén,

cam taalec da na'achecỹaxac da hueta'a yemaye,

nache qaỹamata'ac qome da:

«Nhuo' le'ecpi maye lca'aguishecpi Ñim Nataxala'.»

₄Qaq Ñim Nataxala' qom ỹa'axat nam nasouaxashetpi,

qataq ỹo'ot ca nhuaxanaguec na nhuo' le'ecpi,

nache iỹouec qome na ltago'q so nalaatacpi

maye huaigui ye Jerusalén,

qataq iỹouec na lshepaxanaxa nam hueta'a ye Sión.

₅Qaq huaña nache Ñim Nataxala'

ỹauo'o qome ca sa nsattec lo'oc ye na'a'q,

qataq ca norec da 'ettaigui ye pe da imattalec naqa'en ye Sión,

qataq ca lapoota'a't shiỹaxauapi maye hueta'a yemaye.

Qaq 'enauac camayepi huetalec qome

da llo'oxoyec Ñim Nataxala',

₆da yaqto' lpe'l ye na'a'q da npaxateguet na le'eraxa añi nala',

qataq lpaqtaxanaxat da huo'o ca auot qataq da huo'o ca la'at lta'araic.