Isaías 41

₁Ñaq Aỹem qana'axaỹaxañiỹa qami' ỹaqaugapi

'alhuapiolec maye qoñeetangui ana auaxai.

Qataq qami' ỹotta'a't shiỹaxauapi qana'añaxache qanquiquiiuo.

Qauanaqui da yaqto' ña'aqtaxanaxagui de'era lataxac,

sataxa't qome da yaqto' ñecotaỹaqapigui de'era.

₂¿Negue't cam ỹo'ot co'ollaxa da anac da chegoxogue da nala' lliguisheguem,

ñim nta'a maye saqỹet naxa da dauegaxan?

¿Negue't ca ỹaneguet ñimaye nam ỹotta'a't shiỹaxauapi,

qataq ỹo'ot da na nta'alpi qaica ca la'amaqchec,

da yaqto' irolec na lainec qataq na lchecnec da ilaxachigui

qataq ilagaxattac 'eeta'am na 'auaqpi?

₃Qataq ¿negue't cam ỹo'ot da icanapec namayepi qalaq sa nqalanapigui',

'eeta'am da sa nhuoigueta na 'alhua naua lapia'ate?

₄¿Negue't co'ollaxa cam ỹo'ot de'era lataxac?

qataq ¿negue't ca ỹo'ot da llecỹaxac nam shiỹaxauapi dam chegoqta'ague?

Aỹem Nataxala', nachaỹemta da Aỹem Atamnaxala',

Aỹem sa'auchiguiñi qataq sepa'atec.

₅Nam netalec na ỹaqauga 'alhuapiolec aso auaxai ỹauaachigui,

nache ỹataqta nlaxagui da lcolanaxa,

ana 'alhua qalaq ivira'alo naua loga'te da lacholaxanaxa.

Mashe anacta, mashe saqaỹapeque.

₆Ñi 'oonolec qalaq itauan ñi lauoreua,

qataq 'enapega ñi lqaỹa, 'eeta': «¡'Ana'añaxat!»

₇Na lo'o na ne'enaqtac qalaq ỹa'añaqchet ca lo'o na lcat plata,

qaq ca nhuaxanaxanaqte lo'o qalaq ỹa'añaqchet

ca do'onataxaatega ca nhuaxanaxanaxala', nache 'eeta':

«¡Ỹaỹamaqchiguiñi na 'anapareetega't!»

Qaq ime nache ỹauo'o ana ltoqnaqtepi clavos da yaqto' saishet da hua'axañi.

₈«Qalaxaye 'am Israel, maye 'am ỹamaxashec,

'am Jacob maye 'am ica'aguishec,

maye 'auachegoxoguet so ñauochaxaua Abraham.

₉Aỹem, 'am sachegoxotchiguiña ye loga't ana 'alhua,

qataq 'am seỹaxana co'ollaq qoneta'a ye ỹataqta qaỹoqta 'alhua,

nache sheeta': 'Am, maiche 'am ỹamaxashec,

'am lleca'aguishec co'ollaxa, saishet da 'am so'otan.

₁₀Saishet qome da 'añe'etac cha'aye Aỹem 'am soota'aguet,

saishet da 'añe'etac cha'aye nache Aỹem 'Anatanmaxala'.

Aỹem 'am sanem da 'ara'añaxac, Aỹem 'am setauan qome,

Aỹem sauota'a qome na ihuaq maye huegaxanaxaic da 'am ñasoqtañi.

₁₁Qaq 'enauac nam 'am nquiỹatega

huo'o qome da la'aloxo qataq qaica ca la'amaqchec,

nam 'am iloquiaxaatacpi naxa qalaq 'enauac qome da nmichiguiñi.

₁₂'Anmittaique qome na 'ampa'aguenaxauapi

qalaxaye saishet da 'auanata,

nam 'am iloquiaxaatac co'ollaxa qalaq 'eeta'am da qaica.

₁₃Cha'aye Aỹem Nataxala' maye Aỹem 'Anatamnaxala',

sacoota'aguet na 'oiguishec 'arhuaq qataq 'am shenapega, sheeta':

‹Saishet qome da 'añe'etac, Aỹem 'am setauan.›»

₁₄Ñim Nataxala' da la'aqtac, 'eeta': 'Am Israel, maye 'auachegoxoguet so Jacob,

na'aictaxa da qaica ca 'ara'amaqchec qataq ca 'ara'añaxac,

qalaxaye saishet qome da 'añe'etac, Aỹem 'am setauan qome.

Aỹem, maye Aỹem Qui'itta Natamnaxala' na Israel le'ecpi,

Aỹem, 'am ñeca'alaxatec.

₁₅'Am so'otec qome da qoneta'am aca nchegaxanaqte,

maye dalaxaale qataq ỹataqta ỹaxarai naua lhue,

nache 'anlaxaañi ana qasoxonaxapi nache nda'a't na lsoche 'anqa'en,

qaq ana lcomaraxalatepi qalaq 'eeta'am 'anqa'en ca 'auaqpi deqaqta.

₁₆Qataq 'auchegoq qome nache ỹache na la'at,

qataq na la'at lta'araic ilagaxattac qome.

Huaña nache 'auamachiguiñi qome da qoueto'ot Ñim Nataxala',

qataq huo'o da 'ana'amqaanaxac da qoueto'ot

Ñim Qui'itta Natamnaxala' na Israel le'ecpi.

₁₇Nam choxoraqpi maye deuenaxaatacpi,

nmittaique qome ca 'etaxat qalaxaye sa ỹanata.

Qataq deqaqtegue na lqosot souaxat na laquip,

qalaxaye Aỹem Nataxala', souapegue' qome namayepi,

aỹem maye Aỹem Natamnaxala' na Israel le'ecpi saishet da salat namayepi.

₁₈Aỹem so'ot qome na talapi ayem toolec lcomaraxalatepi,

qataq na npaxaatasheguem 'etaxat na laiñi ye ca'ameguepi,

qataq ye toolec 'alhua, nmeneguet ñaqa'en da 'etaxat lma',

qataq ye deqaqta 'alhua sauo'o na la'auaxacpi na 'etaxat.

₁₉Qataq ye toolec 'alhua ñaxaalec qome ñaqa'en ana cedropi,

'acaaciapi, arrayanpi qataq ana oliivo,

qaq yem deqaqta 'alhua qalaq ñaxaalec ñaqa'en ana piinopi,

l-llatcheguem da ñaxat ana 'abeetopi qataq ana ciprespi,

₂₀yaqto' 'enauac na shiỹaxauapi da ila'a qataq ỹaỹaten,

qataq deuennataxaalec qataq ỹaỹateeta da Aỹem Nataxala',

maye so'ot de'era serolec da ỹa'añaxac.

Aỹem Qui'itta Natamnaxala' na Israel le'ecpi

maye so'ot co'ollaxa 'enauac ne'enapi.

₂₁Ñim Nataxala', maye Lta'a so Jacob, 'eeta':

Ña qauanaqui qami' atamnaxala'pi qauachaxañi ca qara'añaxaqui da qanvicheela't,

ña qauanaqui da qanpaxacheelec cam qoñeetapeguec.

₂₂Ña qauanaqui da qomi' qaua'aqtaxañima cam ñaq taỹa'a da yo'oq,

qataq qomi' qaua'aqtaxañima som hua'au,

yaqto' seuennataxanaxalec,

ña qomi' qaua'aqtaxañima cam ñaq naỹa'acna

yaqto' saỹatenaq nataqa'en cam tachiguiña de'era,

₂₃ña qomi' qaua'aqtaxañima cam yo'oq qome,

ña qomi' qauachaxañiỹalo da 'eesa da qami' atamnaxala'pi.

Qauo'oche cam ishet da qauo'oche, no'on huo'otaq qauem,

cam ishet da ỹo'ot da qayi'iỹaxa qataq da qarcolanaxa.

₂₄¡Qalaxaye qami' ye qaica ca qami' naiguilo,

qataq qaica ca ishet da qauo'oche!

¡Qaq ỹataqta qaiqaiga qome cam qami' lca'aua'alo!

₂₅So'ot da anac so 'oonolec shiỹaxaua chegoqtegue da nala' lliguisheguem

seỹaxana sauota'a da le'enaxat,

nache nvi' nateua'a da pa'aigue da sheu'.

Huaña nache petapigui na nta'alpi 'eeta'am naqa'en ca nshaxa,

qataq 'eeta'am ca 'alhua lo'o da iraqten na nshaxa,

nache irota'alo naua lapia'ate.

₂₆¿Negue't co'ollaxa cam ỹa'axata'a ne'enapi

da yaqto' ishet da saỹatenaq?

Qataq ¿negue't cam ỹa'axata'a co'ollaq saxanaxa da yo'oq

da yaqto' shenaqapec da 'eesa ca la'aqtaxanaxac?

Qalaxaye da qoñiita qaica co'ollaxa ca ỹa'axata'a damaye,

qataq qaica ca hua'aqchigui ca 'oonolec qara'aqtaqui.

₂₇Aỹem maye sa'auchiguiñi co'ollaxa da sa'axatem ye Sión de'era,

qataq samaxa ye Jerusalén so ỹa'aqtaxanaxanec,

da yaqto' ỹa'axatem da sa qaỹaloq da ñe'eguelaq so lauo' le'ecpi.

₂₈Semenaxanapiguiñi qalaxaye qaica ca yo'oq nam laỹepi atamnaxala'pi,

qataq qaica ca ishet da ỹan ca lqataxac qataq qaica ca ỹasateguet nam inataxanaxacpi.

₂₉¡Namayepi 'enauac da qaica ca naigui!

Qaica ca ishet da ỹo'ot namayepi,

namayepi choche atamnaxala'pi qalaxaye qui'itchigui.