Ñim Nataxala' nachaqñita nca'alaxaqui
1Qalaxaye 'am Israel, maye 'auachegoxoguet so Jacob,
Ñim Nataxala' maye 'am lo'onatac, 'eeta':
Saishet qome da 'añe'etac, cha'aye Aỹem 'am ñeca'alaxatec,
Aỹem sauo'o co'ollaxa da 'are'enaxat,
cha'aye 'am ỹalamaxat.
2Qaq da huo'otaq 'aua'axasoxoolec ca 'etaxat,
qalaq Aỹem 'am soota'aguet qome,
qataq da 'aua'axasoxoolec ca tala qalaq saishet da 'am 'ogaxaic,
qataq da huo'otaq qoquetangui ca norec,
qalaq saishet da 'am ỹavigaxat,
qataq nam le'eraxa camaye saishet da 'am ỹavigaxat.
3Cha'aye Aỹem Nataxala' maye Aỹem Qui'itta Natamnaxala' na Israel le'ecpi,
'am ñeca'alaxatec qome, Aỹem 'am sesheenaxana,
nache sanec ye Egipto, Etiopía qataq ye Sabá da nmenegueta ñaqa'en 'am,
4cha'aye 'am samaateguet qataq lta'araic ñaqa'en da naigui 'am,
qataq aỹem 'am sauotec.
Nache sanec qome na ỹalleppi da nmeneguet ñaqa'en 'am,
qataq nam ỹotta'a't shiỹaxauapi da nmeneguet ñaqa'en da 'anachaalataxac.
5Saishet qome da 'añe'etac cha'aye Aỹem 'am soota'aguet.
Qaq sachegoxotegue qome da nala' lliguisheguem
qataq da nala' lliguiñi da ñe'eguelaxat
qataq llaỹona't nam 'am chegoxoguetpi.
6Shenapega qome na hueta'a ye sheu', sheeta':
«'avi'eguelaxat namayepi»,
qataq shenapega na hueta'a ye taguiñi, sheeta':
«Saishet qome da 'anlletañi namayepi.
'Auanacot na ỹalaqpi ỹalleppi qataq ana ỹalepi 'alpi,
chegoqchiguiña 'anqa'en yem ỹataqta pa'atec loga't ana 'alhua,
7'enauac nam ỹachetac dam ỹe'enaxat,
nam ỹo'onatac co'ollaxa qataq so'ot da lataxac,
da yaqto' ỹo'ot da ỹo'oxoyec.»
8Ña qaua'aqaita'a da anac nam ỹalamaxat nhuo' le'ecpi,
maye huo'oi naua la'ai'te qalaxaye sanauaañi,
qataq huo'oi naua ltela lauaco qalaxaye sa hua'aqa.
9Qalapoñiỹa't qome 'enauac qami' nhuo' le'ecpi,
qataq qami' ỹotta'a't shiỹaxauapi,
nache Aỹem qaua'aqtaxañim.
¿Negue't co'ollaxa ca ỹa'axata'a de'era da qoñiita,
qataq cam ỹa'axatta'aguet som mashe hua'auñi da yo'oq?
Qaq no'on da qauauo'oi caua da'aqtaxa'n
da ỹachaxa'n da 'eesa de'era,
yaqto' cam hua'aqchigui damaye nache, 'eeta':
«Ỹoqta 'eesa de'era»
10Qaq Ñim Nataxala' 'eeta':
«Qami' maye qami' ỹa'aqtaxanaxanaqa,
qataq qami' ỹamaxa'she, maye qami' lleca'agui'she,
da yaqto' Aỹem qauauattoñi qataq Aỹem qaupi'iỹa'ai,
qataq da yaqto' qauaỹachiñi negue't Aỹem.
Qaq qaica co'ollaxa ca lỹa atamnaxala' co'ollaq saxanaxa da Aỹem yo'oq,
qataq saishet qome da huo'o ca lỹa Aỹem ca'atalec.
11Aỹem, nachaỹemta Nataxala',
qaq qaica ca lỹa ishet da deca'alaqtaxan.»
12Ñim Nataxala', 'eeta':
«Aỹem sa'axatta'a qataq sa'axatec co'ollaxa da qami' ñeca'alaxatrec,
qaq damaye saishet da ỹo'ot ca ỹaqa'a atamnaxala',
qaq nache qami' maye qami' ỹa'aqtaxanaxaneqa.
13Qaq Aỹem, nache 'eetai' da Aỹem Atamnaxala'.
Qaq qaica ca ishet da naneltaxaneguet da ihuaqỹaxac.
Qataq qaica ca ishet da nlaxaañi cam so'ot.»
14Ñim Nataxala' maye Qui'itta Natamnaxala' na Israel le'ecpi,
Ñim huesochiguiñi naqa'en namayepi, 'eeta':
«Da yaqto' qami' ñeca'alaxatrec, nache samaxa qome ca alleppi ye Babilonia,
nache so'ot da ỹauatoigui 'enauac na lasompi,
qaq da lamaicỹaxac na caldeopi qalaq nmeneguet qome da nqui'ic.
15Aỹem, nachaỹem Nataxala', maye so'ot co'ollaxa na Israel le'ecpi,
Aỹem Qui'itta Atamnaxala', qataq aỹem Qarta'ai.»
16Ñim Nataxala' ỹauategue co'ollaxa so nqa'aic tachiguingui aso auaxai,
qataq som ñegueta maye ỹa'axasoxongui so huo'o da lchec 'etaxat,
17qataq ỹo'ot da huenoxonec 'enauac so 'añaxaic alleppi,
netangui ana nnaigonapi qataq na netalec na lalo caipi da yaqto' ilaxachigui.
Qaq somayepi qanasaxañi nache saishet da qaltaq nachaañi,
somayepi nache loga't 'eeta'am ca ncoỹaraxanaxat da imeuo qalaq maiche 'om.
18Qaq nagui Ñim Nataxala' 'enapega na lalamaxat nhuo' le'ecpi, 'eeta':
Saishet qome da tatapigui qarvilli so hua'au,
qataq saishet da qauennache som togoshaapec.
19Qaq Aỹem, huo'o ca so'ot dalaxaic,
nache qauauañiichigui nagui da yo'oq camaye.
Sauo'o qome ca nqa'aic, taalec ye toolec 'alhua
qataq so'ot ca tala ye 'alhua maye qaica ca ñaxaalec.
20Qaq na shiguiỹacpi maye huauec, ana huaxaỹaxapi
qataq na mañecpi, huo'o naq 'enec naqa'en aỹem
cha'aye npaxaatasheguem ñaqa'en na 'etaxat ye toolec 'alhua,
qataq so'ot na tala na 'alhuapi maye qaica ca ñaxaalec,
da yaqto' sami' na laquip na ỹalamaxat nhuo' le'ecpi maye lleca'aguishecpi,
21na nhuo' le'ecpi maye so'ot co'ollaxa
da yaqto' ỹa'axatec da ỹo'oxoyec.
22Qalaxaye 'am Israel, maye 'auachegoxoguet so Jacob,
saishet co'ollaxa da aỹem 'auỹaxanot, nacherata da aỹem 'anasamiisop.
23Saishet da aỹem 'aỹa'anot aca 'arachetaqtaxanaqte qagueta maye qaỹavigaxatta.
Qataq aca 'arachetaqtaxanaqte da aỹem 'avio'oxoren,
Aỹem saishet da 'am ñasamaqchiiñi da 'am sequicto'ot,
huo'otaq da 'am sa salemaxat da 'am sequicto'ot
da 'auo'ot ca 'archenaxanaxat ama na laita.
24Qataq saishet co'ollaxa da 'ausheenaxana
aca coqta maye ama na laita,
da yaqto' Aỹem 'aỹa'anot da 'arachetaqtaxanaqte,
qataq saishet da samachiguiñi naqa'en nam Aỹem 'aỹa'aatecot
lcheta na shiguiỹacpi maye 'auavigaxattac.
Maye nacherata da 'auo'ot da ñasamiisop
na 'arasouaxashetpi, qataq nam qauem maye 'auo'otpi.
25Qalaxaye Aỹem, souaxat da Aỹem 'Anatamnaxala',
nache sapalaxat na 'aralaataxanaxacpi,
qataq saishet da she'eguelaqtega da seuennatega na 'arasouaxashetpi.
26Qaq 'am, da qonetega huo'o ca ỹasouaxashet,
qaq no'on da ñimitaq camaye.
Ñaq 'andouo cam 'am hueto'ot 'arhuennataxa maye qonetega 'eesa,
shapegueto' da 'eesa da qaica ca 'arasouaxashet.
27Som hua'au 'arta'a huo'o co'ollaxa da lasouaxashet,
qataq som 'anapaxaguenaxala'pi aỹem dataỹa'aguet,
28som nta'alpi maye 'am ilotague' co'ollaxa ishepaxanaqchet
añi ỹalamaqte atamnaxaqui,
qaq ỹoqo'oye sa'aqta'a co'ollaxa so Israel,
maye chegoxoguet so Jacob da qailaxachigui qataq qaisheueetac.
