Ñim Nataxala' nacheñita 'oonolec Atamnaxala'
1Ñaq aỹem 'ana'axaỹaxana nagui 'am Israel
maye 'auachegoxoguet so Jacob maye ỹamaxashec,
qataq lleca'aguishec.
2Aỹem nachaỹem Nataxala' maye 'am so'ot co'ollaxa,
'am so'ot co'ollaq saxanaxa da 'auañiguiñi, qataq 'am setauaatac.
Saishet qome da 'añe'etac 'am Jesurún, maye 'auachegoxoguet
so Jacob som ỹamaxashec qataq lleca'aguishec,
3cha'aye Aỹem so'ot qome da ipaxaalec na 'etaxat ye toolec 'alhua,
qataq na la'auaxacpi nam 'alhuapi maye deqaqta.
Aỹem sanem qome da dalaxaic lca'alaxa ca 'am chegoxoguetpi,
qataq ñamaxa qome ca iqouagaxanaqtaic.
4Nache camayepi ñaxat qome,
'eeta'am aca huoue da qaicottalec na 'etaxat,
qataq 'eeta'am aca qo'oipaqpi maye neto'ot na loigue ca tala.
5Qaq huo'o qome ca 'enapec:
«Aỹem lalamaxat Ñim Nataxala'»,
qaq ca lỹa ỹache qome da le'enaxat so Jacob,
qaq ca lỹa ỹerelec qome na lhuaq da 'eeta':
«Lalamaxat Ñim Nataxala'» qataq ỹauo'o le'enaxat da Israel.
6Ñim Nataxala', maye Lta'a qataq lca'alaxaqui so Israel,
Ñim Nataxala' maye Qaica ca Ỹaqalanapec, 'eeta':
«Aỹem nachaỹem sa'auchiguiñi qataq sepa'atec,
qaica ca lỹa atamnaxala'.
7¿Negue't cam 'eeta'am Aỹem?
Ña detaqa camaye da aỹem da'aqtaxanem.
¿Negue't co'ollaxa ca ỹa'axata'aguet cam ñaq natauo,
qataq ỹa'axat cam mashe huotaique da yo'oq?
8¡Qalaxaye qana'añaxache, saishet da qayi'iitac!
'Era da ỹa'aqtac co'ollaxa soua qaỹoqteguelo vi'iye,
qaq qami' nache qami' ỹa'aqtaxanaxanaqa de'era.
Qaq ¿peta'a huo'o ca lỹa atamnaxala' ỹaqauga?
'A'i, qaica ca lỹa ñe'eguenaxala', qaica ca sauatton.»
Qaỹataỹa'aguet na nqolacpi
9Nam ỹo'ottac na lqolacpi namayepi qaica ca naigui, qataq qaica ca naigui nam ỹo'ottac nqolacpi maye ỹataqta lauotaxat. Qaq nam natameetacot nam nqolacpi, namayepi sanauaañi, qataq qaica ca laỹaanataxanaxac, qaq ỹoqo'oye namayepi taỹa'a da ne'enaguec. 10Cam ỹacona ca lcat da ỹo'ot ca le'enaqtac, da yaqto' natamnot da 'eeta'am naqa'en ca atamnaxala', nache choche ne'e'n naua na'axa'te da lo'onataxanaxac. 11Qataq 'enauac nam natamnot qome na nqolacpi namayepi huo'o qome da ne'enaguec, cha'aye nam ỹo'ottac na nqolacpi namayepi choche shiỹaxauapi. Qaq da 'enauac namayepi da nachaateuo da qanmit, nache huo'o qome da la'aloxo qataq da lcolanaxa.
12Qaq ña semetenaq da lo'onataxanaxac cam lcat lo'o: camaye ỹacona aca laconaxanaqte lcat, qaq da mashe dapaqa ca lcat maye huetangui aca poqopi, nache nqatta nache ỹo'ot da lataxac irota'a aca ltoqnaxanaqte lcat, qaq ỹataqta huo'o da na'añaxataxac da ỹo'ottac. Qalaxaye que'eca lcat lo'o da sa deque'e, nache imeuo da la'añaxac, qataq da sa nỹomgui ca 'etaxat nache nasamñi. 13Qataq ca ne'enaqtac lo'o, ỹacona ca laloqnaxanaxat, nache ỹa'an ca 'epaq ỹauota'a ca leraxanaxat, qataq ca le'enaqtaxanaxat, nache ỹo'ot camaye ỹauota'a ca lamaregaxanaxat, qaq 'era da 'eetec da ỹo'ot da lataxac ca le'enaqtac shiỹaxaua, ỹe'enaxatchigui da 'onaxaic lataxac ca shiỹaxaua, qaq da ime, nache ỹanaigui aca atamnaxaqui. 14Qaq nataqa'en da huo'otaq huo'o ca ỹaateguiñi ana cedropi, nache na auot ỹo'ot da lañaxataxac, qaq ime nache huo'o ana cedropi da yaqto' ichec. Qaq da huo'otaq nqopita ana ciprespi, huo'otaq ana rooblepi, nache ilo'ogue da huetaigui ca aviaq, choche ivitta'a da ỹataqta late'eraipi. 15Qaq ime, nache na shiỹaxauapi do'ogoxona da lalonaxanaxat, qataq ỹo'ot na l-le' da yaqto' ntonaxaqui, qaq na laỹepi 'epaqpi qalaq do'ogoxona da ỹauot ana lauole, qataq na laỹepi 'epaqpi do'ogoxona da ỹo'ot ca le'enaqtac atamnaxala', qaq da ime, nache ỹa'atto'oto naua l-llecte da natameetacot. 16Qaq nataqa'en cam laỹepi 'epaqpi dalonaxana da yaqto' ỹauot ca lapat, qaq ime, nache chec camaye nache comaraxaic. Qaq nataqa'en ntootapigui camaye nache, 'eeta': ¡Ỹataqta 'onaxaic da qanayeetaua'a na laỹe na norec, mashe ñapaqhuec! 17Qaq cam lli'iỹoxot 'epaq, qalaq do'ogoxona da ỹo'ot ca le'enaqtac atamnaxala', ime nache ỹa'atto'oto naua l-llecte da natameetacot camaye qataq nachoxoreetacot nache 'enapega, 'eeta': «Aỹem 'anca'alaxatec cha'aye 'am ñatamnaxala'» 18Ne'ena shiỹaxauapi qaica ca ỹaỹaten, huo'oi naua la'ai'te qalaxaye sa nauaañi, qataq napotagui da ntoonaxac, nache qaica ca lauattonaxanaxac. 19Saishet da deuennataxaalec, cha'aye qaica ca lauattonaxanaxac, qataq qaica ca laỹaanataxanaxac da yaqto' ishet da 'eeta': «na laỹepi som qo'oipaq savigaxat, nache aso lpoqo so'ogona da so'ot aso ỹauole 'ayiiña, qataq so ỹauoc lapat ime, nache sachec. Qaq som no'onañi se'eso qo'oipaq nache so'onataxana da so'ot som ỹataqta nqaigaxat, ¡qaq nam sho'oxoreetac nagui, namaye choche qo'oipaq laỹe!» 20Qaq damaye ỹataqta 'eesa da 'eeta'am da qanallectac ca alo, qaq damaye naigui da qanañanegueta naua nhuennataxaco maye saq'e'n. Qaq ne'ena shiỹaxauapi saishet qome da nca'alec, cha'aye sa ỹaỹaten da na huetaigui na lhuaq aloiguishec, nda'a't da natenataxanaxac.
Ñim Nataxala' nca'alaxatec na Israel
21«'Am Israel, maye 'auachegoxoguet so Jacob,
ña 'auennata'a da 'am ỹamaxashec,
'am ỹamaxashet, ỹoqo'oye 'am so'ot co'ollaxa.
'Am Israel saishet qome da aỹem 'aucoua'ai.
22Aỹem sapalaxat co'ollaxa nam 'ane'enaxacpi,
qataq na 'arasouaxashetpi 'eeta'am ñaqa'en
da 'eetec nam lo'oc na piguem da nlagaxatapec.
Ñaq Aỹem 'añe'eguelaxa, cha'aye 'am ñeca'alaxatec co'ollaxa.»
23¡'Am piguem 'aua'alaq qome da 'antonaxac,
souaxat dam ỹo'ot Ñim Nataxala'!
¡Qanlamaxareñi da qaua'alqai qami' maye qoviita'a
na ỹataqta pa'aguiñi ana 'alhua!
¡Qami' qasoxonaxapi qataq aviaq, qataq 'enauac ana qo'oipaqpi,
qaua'alqaitagui qome souaxat da lta'araic qantonaxaqui,
cha'aye Ñim Nataxala' ỹachaxan da llo'oxoyec da isouec na Israel,
maye chegoxoguet so Jacob!
24Qaq 'era da la'aqtac Ñim Nataxala' maye 'arca'alaxaqui,
Ñim 'am ỹo'ot co'ollaq saxanaxa da 'auañiguiñi:
«Aỹem nachaỹem Nataxala' maye so'ot co'ollaxa 'enauac nam huo'o.
Aỹem selagaxaañi co'ollaxa na piguem qataq so'ot ana 'alhua,
qalaq saishet co'ollaxa da seuen da huo'o ca aỹem itauan.
25Aỹem saishet da ipacchigui ñaqa'en nam ỹa'axatta'api
na na'aqtaxanaxanecpi maye saq'en,
qataq na ilaviigui ca lỹa so'otec da santouen.
Qataq na ỹaanaxanaxaicpi so'otec da nquictañi na laỹaanecpi.
26Qalaxaye naua la'aqtaqa nam ỹamaxashecpi
so'ot qome da ipacchiguilo,
qataq naua lapaxayiñi nam ỹamaxashecpi
so'ot qome da ỹaỹamaqchiyiñi.
Aỹem sa'axat da qaltaq ỹe'eguelaxa qome da qanayenalec ye Jerusalén,
qataq yem huaqta'a't nỹecpi ye Judá qalaq qaltaq qano'oxoosheguem qome,
qataq nam qailaxachigui co'ollaxa yemaye, she'eguelaxata
da qanauaxaỹaxaasheguem.
27Aỹem ishet da shenapega da deqaqa aso auaxai océano,
qataq 'em ñaqa'en nam talapi maye taỹapegueua'a asomaye.
28Aỹem shenapega ñi Ciro, sheeta':
Nache 'am maye 'aulo'ogue qome ana ilopi qaguetapi,
qataq 'am 'auo'ot qome nam sheetapeguecpi.
Qataq shenapega ye Jerusalén, sheeta':
'Am, qaltaq 'am qano'oxoosheguem qome,
qaq añim atamnaxaqui qalaq, sheeta':
'Am qalapaxañi qome ca 'aro'oxonaxala'.»
