Isaías 48

₁Ña qana'axaỹaxañiỹa de'era qami' maye qami' llalaqpi so Jacob,

maye qauacheetac da le'enaxat so Israel qataq qauachegoqoiguet so Judá,

qami' maye qaỹa'añim naxa da qara'aqtaqui Ñim Nataxala'

qataq qanatamñiitacot Ñim Natamnaxala' so Israel,

na'aictaxa da saishet da ỹataqta qami' 'eesora

qataq saishet da no'on da qarataxaqui,

₂qataq qoñiitega naxa da qarma'ai na qui'itta huaqta'a't nỹecpi,

qataq qaua'amaqchiñiitac ñim Natamnaxala' so Israel,

maye le'enaxat Nataxala' Qaica ca Ỹaqalanapec.

₃Qaq som yo'oq co'ollaxa mashe sa'axatta'aguet soua hua'au' vi'iye,

qaq nachaỹem maye sachaxan co'ollaxa,

qaq sa ñaỹaloxon co'ollaxa da so'ot nache somaye ỹataqta ipacchigui.

₄Qaq Aỹem ye saỹaten da ỹataqta qaramchigui na 'arqaic,

ỹataqta 'am qaramta qoneta'am ca lcat

qataq na 'aratap 'eeta'am ca lcat bronce,

₅qaq ỹoqo'oye mashe 'am sa'aqtaxaateguem

soua qaỹoqteguelo vi'iye,

mashe 'am sachaxana namayepi co'ollaq saxanaxa da yo'oq

yaqto' saishet da qonapec: «Nacheñi ñim iqolac ñim ỹo'ot ne'enapi,

ñim ne'enaqtac maye ỹo'onatac nacheñi ñi ỹauo'o namayepi.»

₆'Am 'aua'aqchigui co'ollaxa 'enauac de'era,

qaq ña 'aumeten namaye yaqto' ishet da 'aua'amaqten da 'eesa.

Qaq nagui 'am sa'axatem nam dalaxaicpi qome,

nam saq cha'api maye sa 'auauatton co'ollaxa,

₇nam qaỹo'otpi nagui, maye saishet da huaiguilo soua hua'au' vi'iye,

nam saishet da 'aua'aqteguelec co'ollaxa choche ivitta'a nagui.

Yaqto' saishet da qonapec: «Mashe saỹateetac namaye.»

₈'Am saishet co'ollaxa da 'aua'aqteguelec

namayepi da qaỹa'axattac, qataq saishet da 'auauatton,

cha'aye nache 'eetai' naxa da saishet da 'aua'aqa.

Qaq Aỹem mashe saỹateetac da saishet da 'aualaq,

cha'aye nache chegoqta'a co'ollaq 'auañiguiñi

da 'am qailonec da saishet da 'aualaq.

₉Qalaxaye Aỹem huo'o da ñeualaxaunaxac

souaxat da ỹauotaxanaqtaic da ỹe'enaxat,

qataq souaxat da ỹo'oxoyec nache saishet da 'am selaxachigui.

₁₀Aỹem 'am sequi'itaxatta co'ollaxa,

qalaxaye saishet da 'eeta'am ñaqa'en ca lcat plata,

nacherata da 'am she'eguenec na le'eraxa aso nqatelaxanaxaqui

maye nachera da que'eenaxac.

₁₁Qaq maiche Aỹem, maiche Aỹem da so'ot damaye,

cha'aye da ỹe'enaxat sa saỹamaxaren da qaỹa'ashaxaatac.

Qaq saishet da sanen da ỹo'oxoyec camachaqca lỹa.

₁₂Ñaq Aỹem 'aua'axaỹa 'am Jacob,

qataq 'am Israel maye 'am seỹaxana co'ollaxa:

Aỹem nachaỹemta Atamnaxala',

Aỹem sa'auchiguiñi co'ollaxa qataq sepa'atec.

₁₃Aỹem sauota'a na ihuaq co'ollaq so'ot ana 'alhua

qataq sauota'a na ihuaq co'ollaq selagaxaañi na piguem,

qaq co'ollaq ñasaxauec da le'enaxat nache namayepi huo'o.

₁₄Ña qalaỹoñiỹa't 'enauac qami' nache qana'axaỹaxañi.

Da qoñiita ¿negue't co'ollaxa ca ỹa'axatta'aguet nam yo'oq nagui

qataq som ỹale maye lleca'aguishec da ishet da ỹo'ot da seuennatega

da so'otec ye Babilonia qataq na caldeopi?

₁₅Qaq nachaỹem co'ollaxa da setaxaỹot somaye qataq seỹaxana,

Aỹem so'ot da anac, qaq cam dataigue qome qalaq no'on da na'aqtaguec.

₁₆Ñaq Aỹem qanquiquiiua'a, nache qana'axaỹaxañiỹa de'era:

Aỹem sa ỹauanego' da soxottañi ca sa'axat,

chegoqta'a co'ollaq cheta'ague da huo'o nam huetalecna,

qaq co'ollaq yo'oq 'enauac namayepi nache Aỹem ñachattauo.

Qaq nagui Aỹem Nataxala', sanem da ỹa'añaxac qataq samaq.

₁₇Qaq 'era da la'aqtac Ñim Nataxala' maye 'arca'alaxaqui,

Ñim Qui'itta Natamnaxala' na Israel le'ecpi:

«Aỹem nachaỹem Nataxala' maye 'Anatamnaxala',

Aỹem 'am sapaxaguenec dam chegaqaigui da 'araỹamaxa,

Aỹem 'am sauecteuga so nqa'aic maye iuen da qoquegue.

₁₈'Am taxa da 'ana'axaỹaxanalo naua ỹamaxasoxonaxaco,

nache da 'al-lagaxayec 'eeta'am taxa ca tala,

qataq dam 'araỹamaxa nquictauec, 'eeta'am ana lapaxa aso auaxai.

₁₉Qataq nam 'am chegoxoguetpi ỹataqta qalota taxa,

'eeta'am na 'alhua lsoche maye huetangui aso auaxai

qataq Aỹem saishet taxa da 'am selaxachigui qataq saishet taxa da 'am ñeloguiisop.»

₂₀Qoquiỹa'ai na babilonia qautaiueguesop na caldeopi.

Qaua'axachiiuec de'era na'axaỹaxac nache qaua'alqai

souaxat da qantonaxaqui, qataq qaviraxacha'a

nam hueta'a na pa'atec ana 'alhua, qoñeeta':

«¡Ñim Nataxala' isouec so Jacob maye lamaxashec!»

₂₁Qaq na'aictaxa co'ollaxa ỹauecteuga ye toolec 'alhua

qalaq saishet da ilem na laquip,

Ñimaye depoqogui naqa'en so coma'

nache chegaqaigui somaye so 'etaxat da yaqto' nỹom somayepi.

₂₂Qalaxaye na qauemaicpi, saishet da hueto'ot ca nlagaxayec.

'Era da la'aqtac Ñim Nataxala'.