Som lamaxashec Ñim Nataxala'
1Ñaq aỹem qanaxa'axaỹaxaña qami' maye qoñiitalec
ana ỹaqauga 'alhua aso auaxai, qataq aỹem qanaxaỹaxañiỹa
qami' ỹotta'a't shiỹaxauapi maye qami' qaỹoqtalo.
Ñim Nataxala' aỹem iỹaxana co'ollaq saxanaxa da aỹem ñiguiñi
nasaxauec da ỹe'enaxat co'ollaq ñaq sootaigui na lauel aso ỹate'e.
2Nache ỹo'ot da naua ỹa'aqtaqa 'eeta'ama ca ỹeelonec ỹaxaraic,
qataq aỹem ỹapolec na lhuaq, nache sheeta'am naqa'en
aca checna ỹaxarai qataq aỹem ỹoxotoigui so lchecna laỹe'.
3Nache aỹem 'enapega 'eeta': «'Am Israel, 'am ỹamaxashec,
qaq nache 'am sachegoqchigui qome da sachaxan da ỹo'oxoyec.»
4Qalaxaye aỹem shenapec':
«Aỹem ỹataqta qaica ca naigui da ỹo'onataxanaxac,
choche semetaxateuo da ỹa'añaxac qalaq qaica ca sachegoxotaigui.»
Qalaxaye nam so'otpi hueto'ot Ñim Nataxala',
qaq cam ñesheetanaguec qalaq chegoqo'ot qome Ñim Lo'onatac 'Enauacna.
5Qaq aỹem saconeguet da ỹa'amaqchec
chegoqo'ot Ñim Nataxala' maye Ñatamnaxala',
cha'aye Ñimaye nacheñi ñi ỹa'añaxac.
Ñim Nataxala' maye aỹem ỹo'ot co'ollaq ñaq sootaigui
na lauel aso ỹate'e da yaqto' aỹem lamaxashec,
qataq da yaqto' so'ot da na Israel le'ecpi maye
chegoxoguet so Jacob ñe'eguelaq da yaqto' hueta'aguet Ñimaye,
6Ñimaye 'eeta':
«Saishet da nacherata da 'am ỹamaxashec
da yaqto' nauaqsheguem 'anqa'en na llalaqpi so Jacob,
qataq da 'añe'eguelaxat na lca'alaxaicpi Israel le'ecpi,
maye nataqa'en 'am sanem da 'am lcoỹaraqte
na ỹotta'a't shiỹaxauapi, da yaqto' 'auache da ica'alaqtaxanaxac
nache 'aviraxata'a cam ỹataqta pa'atec ana 'alhua.»
7Ñim Nataxala' maye Ca'alaqtaxanaxaic,
Ñim Qui'itta natamnaxala' na Israel le'ecpi,
'enapega na shiỹaxauapi maye ỹataqta saq qaiyacnapec,
nam lqaigaxat na laỹepi shiỹaxauapi,
nam l-latac co'ollaxa nam qaica ca ireetacpi Ñimaye, 'eeta':
«Qom 'am ila'a na nta'alpi qataq nam 'amaqtaqaicpi,
nache nachaañi qome qataq 'am ỹa'aroto naua l-llecte,
cha'aye Aỹem Nataxala', maye Qui'itta natamnaxala' na Israel le'ecpi,
'am lleca'aguishec co'ollaxa,
qaq sepacchigui qome nam sachaxanapecpi.»
Qaỹa'axata'a da qaltaq qano'oxoosheguem ye Jerusalén
8Ñim Nataxala', 'eeta':
«Co'ollaq ivita so laloqo' da sachaxan da ỹauotaxanaqtaic,
nache 'am sasateguet, ivita so laloqo' da nca'alaxa nache 'am setauan.
Aỹem 'am ñepaxaalec co'ollaxa, da yaqto' 'am sachegoxotchigui
da ñaỹamaxate' na nhuo' le'ecpi,
qataq yaqto' 'avi'eguelaxata da lataxac ne'ena 'alhua,
qataq 'auo'ot da qanayenalec nam 'alhua maye toolec,
9qataq da yaqto' qonapega na ncoñeteguishecpi:
‹Qapa'aiuec›,
qataq na huetaigui na napalaxa:
‹Qanachaxañi qome›
qaq 'enauaque naua loiguiye na nqa'aicpi
qalaq qauanachiỹa qome na 'auaqpi qataq camachaqaca anam
qasoxonaxapi maye toolec, qalaq huo'o qome na aloq na qareloipi.
10Qaq huaña qome nache qaica ca qarqouaqai
qataq saishet da qaviñiitaique ca qaraquipi,
qataq saishet da qami' sa ỹalemaxa't na le'eraxa añi nala',
qataq na napaxaỹaxa, cha'aye aỹem qami' sauoteque,
nache qami' sauecta'agueta, qataq qami' sauegalo
ca huaña na npaxaatasheguem 'etaxat.
11So'ot qome ca nqa'aic taalec ana qasoxonaxapi,
qataq so'ot da nalochiguiñi na nqa'aicpiolec.
12¡Ñaq qauloỹa! Namayepi chegaqa'a cam ỹataqta qaỹoqta,
huo'o na chegaqa'ague da sheu'
qataq huo'o na chegaqa'ague da nala' lliguiñi
qataq huo'o na chegaqa'a ye 'alhua Asuán.»
13¡'Am piguem, ña 'aua'alaq qome souaxat da 'aramaicỹaxac!
¡'Am 'alhua ña 'am nlaxagui qome da 'antonaxac!
¡Qami' qasoxonaxapi qa'aua'alqaitai' qome souaxat da qauamaichiguiñi!
Cha'aye Ñim Nataxala' ỹa'añaqchet nam lalamaxat nhuo' le'ecpi,
qataq huo'o da lchoxonnataxanaxa souaxat da lta'araic lhuogoxo.
14Qalaxaye ye Sión, 'eeta': «Ñim Nataxala' aỹem ca'ai,
Ñim Ñatamnaxala' aỹem icoua'ai.»
15Qalaxaye, ¿ishet peta'a aca nate'e da icoua'ai ca llalec,
huo'otaq da vi'iiguet da lauoche cam lalamaxat llalec?
Qaq na'aictaxa da acamaye icoua'ai ca llalec,
qalaxaye Aỹem saishet da 'am secoua'ai.
16Aỹem, shettalec da 'are'enaxat na ihuaq lauel,
qataq nache 'eetai' da saishet da secoua'ai nam 'arpaqtaxanaxatpi.
17Nam qaltaq 'am no'oxoosheguem qome
namayepi ỹataqta iỹalapigui', saq 'ena'am nam 'am nlaxaañi co'ollaxa,
qaq mashe jec som 'am nlaxatchiguiñi co'ollaxa.
18Ñaq 'anamatasheguem, qataq 'ameenaxanapiguiñi, ñaq 'aumeten
da 'eetec da laỹootega't 'enauac namayepi nache 'am ỹe'eguelaxa.
Aỹem ñeca'altauec 'enapec Ñim Nataxala',
qaq san da ỹa'aqtac da 'enauac namayepi,
'eeta'am qome aca nqola da 'am qoỹanaxanaxangui,
qataq 'eeta'am aca llo'oxoraqte aca auonaxaua.
19Na 'ana'alhua qailaxachigui co'ollaxa, ỹataqta qanlaxatchiguiñi
qataq ivira'a da toolec, qalaxaye nagui 'eeta'am da saq 'amaqtaq
souaxat da qalota na shiỹaxauapi maye netalec namaye.
Qaq som 'am ilaxachigui co'ollaxa qalaq mashe qaỹoqta.
20Qaq nam 'aỹa'alaqpi maye mashe qonetega deqat co'ollaxa
qalaq 'am 'enapega qome, 'eeta':
«Ne'ena 'alhua ỹataqta sa ñaloxolec,
ña 'auauo'o qome ca qarma' da yaqto' sonaqtalec.»
21Qaq 'am 'auennataxaatac qome nache qoneta':
¿negue't co'ollaxa cam aỹem ỹanem ne'ena ỹalaqpi?
Ye aỹem qaica co'ollaxa ca ỹalaqpi qataq saishet da seco'o,
qataq aỹem qaỹauec co'ollaxa nache aỹem qaiỹotauga.
Qaq ¿negue't co'ollaxa ca ỹaqchet namayepi?
Aỹem qaỹalata'a't co'ollaxa, ¿qaq cam chegaqa'ague namayepi?
22Ñim Nataxala', 'eeta': Sanem qome ca ỹamaxasoxonaxac
nam ỹotta'a't shiỹaxauapi, qataq sanasheguem aca ỹa'anaxanaqte
da yaqto' ila'a na nhuo' le'ecpi, yaqto' nachetasheguem qome
da 'am nauegueua'a na 'aỹa'alaqpi ỹalleppi
qataq ỹachetalec na lallac da 'am nauegueua'a ana 'aỹa'alepi.
23Na nta'alpi qalaq ỹauo'o qome da 'am llalec,
qaq ana lhuapi qalaq 'arsoquiaxanaxanapi.
Qataq 'am ỹa'atto'oto qome naua l-llecte,
qataq ichegoxouec na 'alhua naua 'arapia'ate.
Qaq huaña qome nache aỹem 'auauattoota da nachaỹem Nataxala',
qaq nam aỹem ỹa'amaqteetac saishet qome da hueto'ot ca lcoxo.
24¿Ishet peta'a da qaiuotaxanec cam hueto'ot nogoxoshet
cam ỹale 'añaxaic maye ỹachegoxotaigui ca alaataxac?
Qataq ¿ishet peta'a ca ncoñeteguishec da no'otaiguesop
cam ỹale maye qaica ca iren?
25Qalaxaye Ñim Nataxala' 'eeta' da la'aqtac:
«Ca shiỹaxaua 'añaxaic, ishet da qaiuotaxanec cam loxonec
qataq cam qaica ca iren ishet da qaiuotaxanec cam laueguec.
Qaq Aỹem sataỹa'aguet qome nam 'am icogaxaatacpi,
Aỹem ñeca'alaxatec qome na 'aỹa'alaqpi.
26Qataq nam 'am ique'eteetalec naxa so'otec qome da chec na maiche lapat
qataq da nỹomgui na maiche ltago'q 'eeta'am naqa'en ca lataxa.
Qaq 'era da 'eetec qome da 'enauac na shiỹaxauapi ỹaỹaten da Aỹem,
Aỹem Nataxala' nachaỹem 'arca'alaxaqui.
Qataq da Aỹem maye la'añaxanec so Jacob, nachaỹem 'arca'alaxaqui.»
