Qaỹa'axata'a da qaisouec ye Jerusalén
1Ñaq 'anlouec 'am Sión, ñaq 'anlouec, ñaq 'auauo'o da 'ara'añaxac,
'am Jerusalén, huaqta'a't nỹecpi maye qui'itta,
'aỹa'aayiñi naua 'ogo maye ỹataqta 'onaxaiqa,
cha'aye na shiỹaxauapi maye ỹaqa'a da la'amqaanataxanaxac
qataq nshepaxan da lataxac,
namayepi saishet qome da ỹe'eguelaxalec da 'am huenoxoneua'a.
2Ñaq 'anachaañi 'am Jerusalén, 'achegoxouec na namoxoỹaxa,
nache 'anso'oñigui añi so'onaxaqui.
'Am Sión, 'am qa'añole maye 'am ncoñeteguishe,
ña 'anqat na lcoñetaxat na 'arqosot.
3Ñim Nataxala', 'eeta':
«Ỹataqta qaca co'ollaxa aca saconeguet
lasheue da qoñiita co'ollaq qami' qaỹaue'c da yaqto' qami' nlatacpi,
qaq ỹoqo'oye nagui saishet qome da huo'o aca sanec,
da lasheue da qami' ñeca'alaxatrec.
4Soua hua'au' vi'iye, nam ỹalamaxat nhuo' le'ecpi taỹa co'ollaxa ye Egipto,
nache namayepi 'eeta'am ca chegaqauec co'ollaq hueta'a yemaye,
qaq ime co'ollaxa nache na Asiria le'ecpi sa iyacnapec namayepi
na'aictaxa da qaica ca ỹasouaxat.
5Qaq nagui, ¿negue't cam seuatta'a?
Ye nam ỹalamaxat nhuo' le'ecpi qaica ca huasoilec da qaỹauega ye Babilonia.
Qaq nam ỹamaqtac namayepi ỹa'alaqtai' da ño'oxonnaxac,
qataq nache queto'ot da Aỹem isheueetac.
6Qalaxaye mashe natauo cam na'a'q da na ỹalamaxat
nhuo' le'ecpi Aỹem ỹauattoota qome,
qataq ỹaỹaten da aỹem maye setaqtacot co'ollaxa namayepi,
nachaỹem Nataxala'.»
7¡Maye sa no'onolec da qailota'aguet da nactalec ana qasoxonaxapi
cam nachetac da no'on na'axaỹaxac cam ỹa'axatec da nlagaxayec,
qataq ỹa'axata'a da qaisouec na shiỹaxauapi
qataq 'enapega na Sión, 'eeta': «Ñim 'Anatamnaxala' nacheñi Nta'a!»
8¡Ña 'ana'axaỹaxaañi! Na 'arauanaxanaxanecpi
ỹataqta nlamaxaren qataq nmasheguem da ỹa'alaq
souaxat da ntonaxac cha'aye ỹataqta ỹauaachigui da lle'eguelaxasoxoc
Ñim Nataxala' da ñe'eguelaxa na Sión.
9¡Qami' maye qarmaye na nlachiguiñi Jerusalén,
ña qanmiỹasheguem da qauo'onaxañi souaxat da qantonaxaqui
cha'aye Ñim Nataxala' huo'o da lchoxonnataxanaxa
na lalamaxat nhuo' le'ecpi qataq nca'alaxatec na Jerusalén!
10Ñim Nataxala' ỹachaxan da la'añaxac
ỹauaachigui naqa'en 'enauac na ỹotta'a't shiỹaxauapi.
Qaq 'enauac nam netalec ana 'alhua,
ỹaỹaten qome da Ñim Qanatamnaxala' qomi' nca'alaxatrec.
11¡Qoquiỹa'ai, qoquiỹa'ai nagui na Babilonia,
nache saishet da qauashilleeua'a ca nshepaxan da lataxac,
qoquiỹa'ai nagui na Babilonia!
¡Qanchilỹa'a da qui'itta qarataxaqui qami' maye qauachiitac
nam no'onataxanaxatpiolec maye lalamaxat Ñim Nataxala'!
12Qalaxaye saishet da qaỹalleetapigui' da qoquiỹa'ai namaye,
qataq saishet da qauataiuec,
cha'aye Ñim Nataxala' maye Natamnaxala'
na Israel le'ecpi qami' mpaxattaleguete qome.
Da nque'eenaxac cam lamaxashec Ñim Nataxala'
13Ña qaumichiñi, ñim ỹamaxashec dauegaxan qome,
nache huo'o da la'amaqchec qataq qaỹo'oreetac qome.
14Qaq dam 'eetec da qalota nam ỹa'aalac ñimaye,
co'ollaq ỹauaachigui da sa nateneuo da lasheguiỹaxac,
qataq deqat 'enauac dam lataxac cam shiỹaxaua,
15qaq nache 'eetec nataqa'en qome da qalota na ỹotta'a't shiỹaxauapi
nam huo'o da la'aalaxa,
qaq na nta'alpi qom ila'a nache 'eco' qaicaua naua la'aqtaqa,
cha'aye ỹauaachigui qataq ỹaỹaten qome
dam sa ỹauanega da hua'aqchigui.
