Da nỹaxanaguec so Isaías
1Qaq huetoigui so vi'i maye huaigui da ileu so nta'a Uzías, da aỹem sela'a Ñim Nataxala' da nso'ootangui aso ỹataqta qaỹoqotcheguemec nso'onaxaqui, qaq naua laỹel so lapo' qalaq imattaigui aso atamnaxaqui. 2Qaq so pa'asheguem Ñimaye qalaq huetra'a soua serafines, qaq ñi 'oonolec soomaye ivi' seis soua laua't, qaq soua dos nache ỹapotragui na lashec, qaq soua lỹa't dos nache ỹapotaleguete naua lapia'ate, qaq soua lỹa't dos qalaq nachesoua soua huaỹota'ape naqa'en. 3Nache ñi 'oonolec soomaye na'axanneque naua la'aqtaqa da detaqtega't, 'eeta':
«Qui'itta, qui'itta, ỹataqta qui'itta Ñim Nataxala'
maye Qaica ca Ỹaqalanapec.
Da llo'oxoyec Ñimaye ỹataqta imattalec ana 'alhua.»
4Qaq da l-lamaxa da lavilỹaxa'c soomaye, ỹataqta cholaxan naqa'en soua laso'omi aso atamnaxaqui, qataq so lmala'q nlaxagui asomaye. 5Qaq huaña nache shenapec: «¡Choxoraicolec aỹem, yo'oqta da seleu nagui! Cha'aye ỹataqta sauaachigui Ñi Nta'a, Ñim Nataxala' maye Qaica ca Ỹaqalanapec, cha'aye aỹem ỹataqta aỹem 'etaxaloxoic, qataq salectaigui na nhuo' le'ecpi maye ỹataqta qauema naua la'aqtaqa.» 6Qaq huaña nache aỹem naỹogoña so 'oonolec se'esoua serafines, nasoqta'a aso laconaxanaqte lcat, inactagui naqa'en aso poqo 'ettaigui maye ỹachegoxotalec aso nca'atoxonaxalate, 7nache nhuocteguet naqa'en na aỹap aso poqo, nache 'eeta':
«Ana'ana poqo nhuocteguet na 'ap.
Dam qauem 'arataxac qataq na 'arasouaxashetpi qaỹapalaxat.»
8Ime, nache sa'axaỹa da lavilỹaxac Ñim Nataxala', 'eeta':
«¿Negue't qome ca ishet da samaq?
Qataq ¿negue't qome ca ishet da qara'aqtaxanaxanec?»
Nache aỹem sasat sheeta':
«Aỹem soota'a ne'ena, qaq aỹem 'auamaq qome.»
9Qaq huaña nache Ñim Lo'onatac 'Enauacna aỹem 'enapega, 'eeta':
«'Aue, 'anqo'ona qome na shiỹaxauapi nache qoneta':
‹Na'aictaxa da hua'aqtac qalaxaye saishet qome da ỹaỹaten,
qataq na'aictaxa da demeenaxatac
qalaxaye sa ỹaỹaaneguet qome de'era.›
10Qataq 'auo'otec qome da qaramta
da lquiyaqteỹaxac ne'ena shiỹaxauapi,
qataq 'auapoguilo naua la'ai'te qataq naua ltela lauaco,
da yaqto' saishet da hua'aqa qataq saishet da nauaañi,
qataq saishet da huo'o ca ỹaỹaten,
yaqto' saishet da aỹem ñe'eguelaxa,
nache aỹem saishet da ñataren.»
11Nache aỹem senat co'ollaxa sheeta':
«'Am Nataxala', ¿chaq lcate' na'axa'te caua ivi' de'era?»
Nache Ñimaye aỹem ỹasateguet, 'eeta':
«Qomye ivitta'a qome da imauec
da nlachiguiñi na huaqta'a't nỹecpi,
qataq qanayeca'ai na nỹecpi qataq toolec na no'onaxapi,
12Nache ivitta'a qome da Ñim Nataxala'
ỹamaxa ca qaỹoqta 'alhua nam shiỹaxauapi,
qataq ỹataqta toolec naqa'en ne'ena 'alhua.
13Qaq da huo'otaq huo'o ca cien shiỹaxauapi
qaq da no'oirañi caua diez,
nache caamaye nataqa'en qailaxachiguilo qome,
qaq 'eeta'am qome aca roble huo'otaq aca encina,
da qaichec nache no'onañi aca lamo.»
Qaq aca'aca lamo nachaca aca ñaxatec
aca llaxataxa maye sa qaishetapec.
