Qaỹa'axata'a da lca'alaxa na Israel le'ecpi
1So saq cha'a la'añaxac Ñim Nataxala' aỹem hueta'aguet,
cha'aye Ñim Nataxala' aỹem lca'aguishec,
aỹem namaq da sa'axatem da no'on na'axaỹaxac nam choxoraqpi,
qataq sa'añaqchet nam daquicotac da lquiyaqteỹaxac,
qataq sa'axatem da qaisouec nam ncoñeteguishecpi,
qataq da qaisouec nam netaigui ana ncoñetaxanaxaquipi,
2qataq sa'axatec nam vi'i maye huaigui
da lqouagaxanaqtaic Ñim Nataxala',
qataq nam na'a'q maye huaigui da Ñim Qanatanmaxala'
ỹauo'o da lvi' da dataỹa'aguet nam qanpa'aguenaxauapi.
Ñimaye aỹem namaq da sa'añaqchet 'enauac nam daquicotacpi,
3qataq sanem nam daquicotacpi maye hueta'a na Sión
aca aro'o nmeneguet ñaqa'en na alo,
qataq na coraxat nmeneguet da noinaxac,
qataq da no'onaxanaxac nmeneguet da nhuogoxo.
Qaq da qaitaxaỹa nache qoỹeeta': «Rooblepi, huegaxanaxaipi»,
maye lañiguishe Ñim Nataxala' da yaqto' ỹachaxan da llo'oxoyec.
4Huaña nache qaltaq qano'oxoosheguem
nam togoshec maye qanlaxaañi co'ollaxa,
qataq qanauaxaỹaxaasheguem nam Nỹecpi lta'araicpi
maye nlaguiñi soua qaỹoqteguelo vi'iye,
qataq qaỹaỹamaxaañi nam huaqta'a't nỹecpi
maye ỹotta'a't naua nañalo maye nlaguiñi co'ollaxa.
5Qaq nam shiỹaxauapi maye chegaqauec
qalaq ilo'ogue qome ana qaguetapi,
na no'onaxapi, qataq na nanaxanaqa' uva lma'pi maye qaralamaxache.
6Huaña nache qami' qaỹamata'aque qome
da qami' ltaxaỹaxanaxanecpi Ñim Nataxala',
qataq qami' lamaxa'she Ñim Qanatamnaxala'.
Qataq qolliquiitac qome nam ỹataqta no'on nallec
maye chegoqo'ot na ỹotta'a't shiỹaxauapi
qataq qami' iyaquen dam lyac namayepi.
7Qaq cha'aye nam ỹalamaxat nhuo' le'ecpi huo'o co'ollaxa da nque'eenaxac
qataq hualec lỹa da ne'enaguec qataq nsheunaguec,
ỹoqo'oye qom hueta'a na na'alhua, nache hualec lỹa
nam ỹaconeguet qome nsallaxa qataq ntootapeguec
dam chochaq tatec lamaicỹaxac.
8Cha'aye Aỹem Nataxala' sauotec da nalochiguiñi lataxac,
qalaxaye sequiỹa da ncachaxac qataq da nalaataxanaxac.
Qaq ỹoqo'oye sanem qome namayepi da nsheetenaguec
qataq so'ot qome cam chochaq tatec ñaỹamaxataxac
da ñaỹamaxate' namayepi.
9Qaq nam chegoxoguetpi namayepi qalaq ỹataqta huo'o
qome da ño'oxonnataguec da ỹalectaigui na ỹotta'a't shiỹaxauapi,
qataq 'enauac nam ila'a qome namayepi,
nache ỹauatton da nhuo' le'ecpi maye Ñim Nataxala'
ỹasaxalec da lchoxonnataxanaxa.
10Aỹem ỹataqta lta'araic da ñetootapeguec Ñim Nataxala',
da ñachaalataxac qalaq nlaqchigui da ntonaxac souaxat Ñim Ñatamnaxala',
cha'aye Ñimaye aỹem ỹanaxanaxangui da nca'alaxa
qataq aỹem napogonaxaaña da nalochiguiñi lataxac,
Aỹem no'otaxanaxan sheeta'am ca auonaxaua
qataq ỹauo'o ana ño'otaqtepi sheeta'am naqa'en aca auonaxaua.
11Cha'aye da 'eetec ana 'alhua da ñaxatsheguem naqa'en ana nañiguishe,
qataq ñaxatec naqa'en ana dalaxai llaxataxa na nanaxanaqa'piolec,
qaq nache 'eetec qome Ñim Nataxala' da ñaxat naqa'en da lauegaxanaxac,
qataq 'enauac nam ỹotta'a't shiỹaxauapi ỹo'on qome ca no'onec da yo'oxonnataxan.
