Da lauotaxanaqtaic Ñim Nataxala' ye Sión
1Qaq souaxat da ỹauotaxanaqtaic 'am Sión, nache saishet qome da ñe'emaxat,
qataq souaxat da ỹauotaxanaqtaic 'am Jerusalén,
nache saishet qome da ñematec, choche ivitta'a da yo'oq na le'eraxa
da 'arauegaxanaxac 'eeta'am da yaqta'a da yo'oxoñi,
qataq da 'arca'alaxa 'eeta'am aca ncoỹaraxanaqte.
2Qaq huaña nache na ỹotta'a't shiỹaxauapi ila'a qome da 'arca'alaxa,
qataq 'enauac na nta'alpi ila'a qome da 'ayo'oxoyec.
Huaña qome nache dalaxaic ca 'are'enaxat maye
maichiñi Ñim Nataxala' 'am ỹanagui qome.
3Nache 'am qoneta'am qome aca ỹataqta 'onaxai naro'o ca nta'a,
da qouetaigui na lhuaq Ñim Nataxala' maye 'Anatamnaxala'.
4Nache saishet qome da qaltaq 'am qaỹamata'ac da
«Nỹecpi qaỹalat»,
qataq na 'ana'alhua saishet qome da qaỹamata'ac
«'Alhua nlachiguiñi»,
maye nacherata da 'are'enaxat qome da
«Ỹauotaqte»,
qaq nam 'ana'alhua qalaq
«Ỹalamaqte ihua»
Cha'aye 'am lauotaqte Ñim Nataxala', qaq Ñimaye 'eeta'am qome da lhua na 'ana'alhua.
5Cha'aye da 'eetec cam nsoqolec da huaroneguet aca nauonaxaua,
qaq nache 'eetec qome Ñim Lo'onatac 'Enauacna
da 'am ỹaconeua'a da ỹauo'o 'am lhua,
qaltaq 'am no'oxoosheguem qome nache Ñimaye
ỹataqta machiguiñi qom 'am hueta'aguet,
'eeta'am ca nhua da ỹataqta machiguiñi da hueta'aguet aca lhua.
6'Am Jerusalén, na 'arpaqtaxanaxatpi sanalec na 'arauanaxanaxanecpi,
maye ye na'a'q qataq ye pe saishet da vi'iiguet da 'eeta':
«Qami' maye qauỹaxañiitacot Ñim Nataxala',
saishet qome da qavi'imqaita,
7qataq saishet qome da qanmataxañeeuec
choche ivitta'a da ime da qaltaq no'oxoosheguem na Jerusalén,
qataq iviraxata'a da 'enauac ana 'alhua da ỹo'oxoren.»
8Ñim Nataxala' ỹachaxaasheguem na aloiguishec lhuaq,
nache ỹan da la'aqtac, 'eeta': «Saishet qome da qaltaq sanem na
'ampa'aguenaxauapi da chec na 'aralamaxat trigo,
qataq na chegaqauecpi da nỹomgui na maiche 'aro'onatac lataxa.
9Nacherata da maiche qami' da qanqache qome nam trigo,
qataq maiche qolliquiitac namaye nache aỹem qavio'oxoreñiitac qome,
qataq qanqache ana uva, nache qanỹomiigui na lataxa,
da huaña ye nqasoxoc añim qui'itta ỹalamaqte atamnaxaqui.»
10Qannoxoñeeuec, qannoxoñeeuec qauanaichiviiguilo
naua laso'omi nam huaqta'a't nỹecpi,
qauaỹamaxachiiñi ca llec nam ỹalamaxat nhuo' le'ecpi.
Nalochiguiñi qanqa'eñi qataq qauasaqaiuec na coma'pi,
qataq qaỹa'añiỹasheguem aca la'anaqte da qauỹaxañiỹa
nam ỹotta'a't shiỹaxauapi.
11Ñim Nataxala' ỹa'axata'a de'era
ivira'alo naqa'en naua loga'te ana 'alhua:
«Qaua'aqtaxañim qome ye huaqta'a't nỹecpi ye Sión,
da mashe nvi' na lca'alaxaqui.
Ñim Nataxala' ñe'eguelaq naqa'en nam lalamaxat nhuo' le'ecpi
co'ollaq mashe ime da nca'alaxatec.»
12Qaq na Israel le'ecpi qaỹamata'ac qome da:
«Nhuo' le'ecpi Qui'itta» «Nam isouecpi, co'ollaxa Ñim Nataxala'»,
qaq na Jerusalén qalaq qaỹamata'ac da «Huaqta'a't nỹecpi maye nqopitaxat»
«Huaqta'a't nỹecpi maye saishet da qaỹalat.»
