Ñim Lo'onatac 'Enauacna iuaxan qome na mpa'aguenaxauapi
1Negue't ne'ena maye chegaqa'a ye Bosra yem 'amaqtaqaic
huaqta'a't nỹecpi ye Edom ỹaatrañi naua alogo togaxaraiqa,
qataq qashelectrapiguiñi naua alogo qataq ỹataqta chaqaic da lqueuoxoc.
Nachaỹem, maye sa'axatta'a ca nauegaxanaxac,
qataq Aỹem 'añaxaic da seca'alaqtaxan.
2Qaq ¿ta'ainco' da togaxaraiqa naua 'ogo, 'eeta'amso' da 'auapetapigui
aca uvapi da 'auota'aisalo naua 'arapia'ate?
3Aja', Aỹem 'oonolec co'ollaxa da sapetapigui aso uvapi,
qaica ca aỹem itauan, ỹataqta Aỹem nlaxagui da ỹayeloxo
nache sapetapigui som ñepa'aguenaxauapi,
nache ỹataqta dapaxañi ñaqa'en serolec da ỹalemataic
nache na ltago'q qalaq dechecnaxanoto naua ỹogo,
nache nshepaxanaqche't 'enauaque na ỹogo.
4Aỹem mashe llapaqtañi da huo'o ca na'a'q qaq sauo'o ca ivi',
qaq nagui mashe ivita ye laloqo' da sesouec na ỹalamaxat nhuo' le'ecpi.
5Aỹem semeenaxanapiguiñi qalaq qaica ca ishet da aỹem itauan,
ỹataqta huo'o da ỹa'aalaxa da qaica ca aỹem itaunaua'a.
Qalaxaye na ihuaq nachena na aỹem ỹanem da sauegaxan.
Qataq da inogoxonaxac nachera da aỹem nllañi.
6Qaq ỹataqta Aỹem nlaxagui da ỹayeloxo nache rapaxañi
ñaqa'en so ỹotta'a't shiỹaxauapi,
qataq serolec da inogoxonaxac da selaxachigui somayepi
qataq so'ot da ipaxanec quelec ana 'alhua na ltago'q somayepi.
Ñim Nataxala' ỹauotec na Israel le'ecpi
7Aỹem sauotaique da sa'axat da lauotaxanaqtaic Ñim Nataxala',
qataq so'on na no'onecpi da qaỹo'oxoren Ñimaye
souaxat na qalota ỹo'otpi Ñimaye souaxat qomi',
qataq souaxat da lta'araic lauotaxanaqtaic nam llalaqpi so Israel,
qataq nam ỹo'otpi souaxat da lsoxoyec qataq da lta'araic lauotaxanaqtaic.
8Qaq Ñimaye, 'enapec co'ollaxa:
«Ne'ena nhuo' le'ecpi maiche ỹalamaxatpi,
ne'ena ñalaqpi saishet qome da Aỹem ỹatenachet.»
Nache Ñimaye nca'alaxateeguesop 'enauac da laquicoxo namayepi.
9Qaq saishet co'ollaxa da lamaxashec cam nca'alaxatec namayepi,
maye nacheñi Ñimaye da maiche nca'alaxatec.
Ñimaye isouec namayepi souaxat da lauotaxanaqtaic
qataq da lchoxonnataxanaxa, ỹanaxanaxaasheguem
qataq nachesheguem huota'aisalo naua lhua'q,
'eeta'am dam ỹo'ottac co'ollaxa soua hua'au' vi'iye.
10Qalaxaye namayepi sa ỹalaxaguet co'ollaxa Ñim Nataxala',
qataq inogoqchet Ñim qui'itta Nataxala',
qaq ỹoqo'oye Ñimaye ỹe'eguelaxa da mpa'aguene' namayepi nache delogui'.
11Qaq huaña nache namayepi tachigui lauel soua qaỹoqteguelo vi'iye,
qataq so Moisés maye nca'alaxatec co'ollaxa so lauo' le'ecpi,
nache ñi 'oonolec inattac ñi lỹa, 'eeta':
«¿Ca hueta'ague cam Lo'onatac 'Enauacna maye
nca'alaxateeguesop co'ollaxa aso tala Nilo so Moisés
som ilotague' co'ollaxa ana lalopi qagueta?
¿Ca hueta'ague cam ỹanaigui co'ollaxa so Moisés
som saq cha'a La'añaxac maye qui'itta,
12cam ỹo'ot co'ollaxa da nnaictague' so Moisés dam ỹo'oxoraic la'añaxac,
qataq ỹauaachigui naqa'en so lalamaxat nhuo' le'ecpi da icolaxachigui
so 'etaxat aso auaxai da yaqto' ivira'a da chochaq tatec da na'aqtaguec,
13cam ỹo'ot co'ollaxa da somayepi quichiguingui
aso auaxai qalaq saishet da salvi,
'eeta'am naqa'en ca caipi da ỹa'axasoxoolec ca toolec 'alhua,
14qataq 'eeta'am ca nlopi da tangui ca ca'amegue?»
Qaq so Saqcha'a la'añaxac Ñim Nataxala' ilotague' co'ollaxa somayepi.
Qaq 'era da 'eetec da ỹauectac so nhuo' le'ecpi,
nache ivira'a da huo'o da la'amaqchec qataq da llo'oxoyec.
Na Israel le'ecpi iỹaxanaique ca ltaunaxanaxac Ñim Nataxala'
15'Am Nataxala', maye qoneto'ot na piguem,
nam 'arma' maye qui'itta qataq huo'o da llo'oxoyec,
ña qomi' 'anamata'alo qome.
¿Ca hueta'ague ca 'arauotaxanaqtaic qataq ca 'ara'añaxac?
¿Ca hueta'ague cam 'arhuennataxac?
¿Peta'a mashe imeuo da 'archoxonnataxanaxa da shenaqta?
16¡'Am Nataxala', nache 'am maye 'am qarta'a!
Na'aictaxa so Abraham da saishet da qomi' ỹauatto'n,
qataq so Israel da saishet da qomi' ntooneque,
qalaxaye 'am Nataxala', nache 'am maye 'am qarta'a,
qataq nache 'eetai' co'ollaxa da 'am qarca'alaxaqui.
17¿Qaq ta'ainco' 'am Nataxala' da qomi' 'auo'oteque
da sashoxolec da 'anqa'aicỹaxac,
qataq da qaramchigui 'anqa'en da qarquiyaqteỹaxac
da yaqto' qaica ca 'enec ñaqa'enaq 'Am?
Ña qomi' 'añe'eguelaxalo souaxat da 'arauoche na 'aramaxashecpi
qataq na nhuo' le'ecpi maye 'aralamaxatpi.
18Na 'aralamaxat nhuo' le'ecpi, ỹataqta saqaỹarauec
soua na'axa'te da lalamaxat 'anqa'en ne'ena 'alhua,
qaq nagui na qampa'aguenaxauapi ỹataqta saiyacnapec
añi atamnaxaqui maye 'aralamaqte.
19Qomi' seviraqta'a da 'eco' saỹauanego' da qomi' 'aulotegueto,
qataq da 'eco' saỹauanego' da sachoqtac da 'are'enaxat.
