Isaías 65

₁Ñim Nataxala', 'eeta':

Nam saishet da aỹem denataxaataique co'ollaxa

qalaq nachena nam aỹem nmittaique,

qaq nam saishet da aỹem nmittaique co'ollaxa qalaq aỹem ỹanata.

Qataq nam saishet da iỹaxaatega co'ollaxa da ỹe'enaxat

qalaq shenapega sheeta': «Aỹem soota'a ne'ena.»

₂Imauec ye na'a'q da saatraue'c naua ihuaxaye,

da yaqto' ñaueguela't nam nhuo' le'ecpi maye saỹalaq

maye quetegueto naua qauema nqa'aico,

qataq quetegueto naua maiche lhuennataxaco,

₃nam nhuo' le'ecpi maye chochaq tatec co'ollaxa

da Aỹem nachaxaatega da aỹem inogoqchettac,

qataq ỹaatacot ana lachetaqtaxanaqtepi na atamnaxala'pi

da huaña nam nanaxanaqa'pi,

qataq ỹachalec naxa ana nca'atoxonaxalatepi

maye lo'oxonaxat na losoc da ỹavigaxat na lchenaxanaxat,

₄qataq nso'ootañi naxa netagui na laiñi ana huachiquipi

qataq hueta'a naxa ye pe nam ỹapochiguiñi nanataqa'pi,

nache chectac na lapat ana cos late'e,

qataq nlaxatchigui ana lataxaquipi nam nallec maye qaiqaiga.

₅Nache 'enapec naxa:

«Nache qoueta'acna saishet qome da aỹem 'anquigueua'a,

cha'aye aỹem ỹataqta aỹem qui'itta nache saishet da aỹem 'apottegueua'a.»

Ne'ena shiỹaxauapi 'eeta'am ca norec maye imauec ye na'a'q da 'ettaigui,

nache ỹataqta aỹem saỹalemaxat,

'eeta'am ca lmala'q da taiguilo naua imic lauaco.

₆Qalaxaye de'era 'enauac mashe settañi,

nache saishet qome da choche ñe'emaxat

nacherata da sanem dam naigui nam ỹo'ottpi,

₇dam lalaataxanaxac namayepi qataq nam lalaataxanaxacpi som lta'alpi.

Somayepi ỹavigaxat naxa na lchenaxanaxat

da huaña ana qasoxonaxapi

qataq aỹem inogoqchettac da huaña ana lcomaraxalatepi.

Qaq ỹoqo'oye Aỹem Nataxala' shenapec da seque'emaqchet qome namayepi

da lasheue ñaqa'en nam ỹo'otpi co'ollaxa.

₈Ñim Nataxala', 'eeta':

«Ana uva da ỹaguec na lli'i, nache na shiỹaxauapi saishet da ỹe'en,

cha'aye ishet da ỹachegoxotaigui na qalota lataxa.

Qaq 'era nataqa'en da sheetec qome souaxat

da ỹauoche nam ỹamaxashecpi.

Qaq saishet qome da ñelaxaañi 'enauac na ỹotta'a't shiỹaxauapi.

₉Qataq so'ot qome da so Jacob huo'o nam chegoxoguetpi,

qataq huo'o qome na shiỹaxauapi ye Judá da netalec aye ñeqasoxonaxapi.

Qaq nam lleca'aguishecpi qalaq nalec qome na 'alhua,

qaq na ỹamaxashecpi qalaq nache hueta'a qome yemaye.

₁₀So ca'amegue ye Sarón qalaq nlaxalec qome ana qaguetapi,

qataq so ca'amegue ye Acor lquia'aqa' qome

ana lalopi na nhuo' le'ecpi maye Aỹem nmittaique.

₁₁Qalaxaye qami' maye Aỹem qoquiỹa'ai co'ollaxa,

qataq qaucoviỹa'ai añim qui'itta ñeqasoxonaxa,

qataq qaỹa'añim naxa na nallec qataq na lataxa,

ñeua Gad qataq ñi Mení, atamnaxala'ate maye ỹa'n da 'achecỹaxac,

₁₂qalaxaye Aỹem Nataxala', so'ot qome da qami'

qairoleguete ca ỹeelonec da qami' qaỹalaua't.

Cha'aye Aỹem qami' seỹaxaategalo co'ollaxa qalaxaye qami' saqauasache,

qami' setaqtacoto co'ollaxa qalaxaye Aỹem saqana'axaỹaxañiỹa,

nacherata da sauaachigui qanqa'eñi nam qauem maye qauo'ocheetac,

qataq qalca'aiua'a da qauo'oche nam sasaỹamaxaren.»

₁₃Qaq ỹoqo'oye Ñim Nataxala' nataqa'en, 'eeta' da la'aqtac:

Nam ỹamaxashecpi huo'o qome na aloq,

qalaxaye qami', qanque'etaxañiigui qome na qarqouaqai,

nam ỹamaxashecpi saishet qome da iueetaique ca laquip,

qalaxaye qami' qanque'etaxañiigui qome da qarhuenaxanaxai ca qaraquipi,

nam ỹamaxashecpi machiguiñi qome,

qami' qalaq qami' qane'eetapiguilo qome,

₁₄nam ỹamaxashecpi do'onaxaatac qome

souaxat da ntonaxac da lquiyaqteỹaxac,

qami' qalaq qaua'alqaitaigui qome qataq qanỹiñiitac,

souaxat da qaraquicoqoi qataq da qanqui'iqui.

₁₅Nam lleca'aguishecpi do'onataxana qome na qare'enaxache

da yaqto' ỹasaxalec ca qauem ca lỹa,

qataq da ỹasaxale da nleuaxa ca lỹa,

qalaxaye nam ỹamaxashecpi ñaralaxat qome ca le'enaxat.

₁₆Qaq camachaqca ca netalec ne'ena 'alhua,

da iỹaxanaique ca nchoxonnataguec,

qalaq iỹaxanot Ñim Lo'onatac 'Enauacna maye hueto'ot da 'eesa;

qataq camachaqca ca netalec ne'ena 'alhua da ỹan ca la'aqtac

qaq ỹanot Ñim Lo'onatac 'Enauacna maye ipacchigui ca la'aqtac.

Qaq nam hua'au que'eenaxacpi qalaq qaicoua'ai qome

nache saishet qome da qaltaq sela'a.

₁₇«Ña qauloichigui da, Aỹem so'ot qome ca dalaxaic piguem,

qataq aca dalaxai 'alhua.

Nache som hua'au co'ollaxa qalaq qaicoua'ai qome,

nache qaica qome ca qaltaq iuennatega somaye.

₁₈Ñaq qami' nlaqchiguilo qome da qantonaxaqui,

qataq chochaq tatec da qaramaicỹaxaqui souaxat cam so'ot qome,

cha'aye Aỹem so'ot qome ca dalaxaic Jerusalén

maye huetaña da namaicỹaxac,

qataq cam nhuo' le'ecpi maye matapiguiñi da hueta'a camaye.

₁₉Qaq Aỹem samachiguiñi qome souaxat ye Jerusalén,

qataq huo'o qome da ñetonaxac souaxat nam ỹalamaxat nhuo' le'ecpi.

Cha'aye saishet qome da qaltaq qaỹa'aqtega ca noinaxac

qataq ca na'alaxac souaxat da nachetataic.

₂₀Qaq saishet qome da huaña yemaye da ileu ca nogotolec

maye saxanaxa da qaỹa'aguelo naua na'axa'te da nachaalataxac,

qataq ca ỹa'axaiquipi da huo'otaq saxanaxa

da ivita ca laloqo' da nachaalataxac.

Cha'aye ca ileu da ivi' caua cien vi'iye, nache 'eco' ña nsoqolec da ileu,

qaq ca saxanaxa da ivi' caua cien vi'iye da ileu,

nache camaye huetalec da qauem.

₂₁Nache na shiỹaxauapi no'oxoosheguem qome na lma'pi,

nache netaigui qome namayepi, qataq ỹaañi qome ana lañiguishe

qaq nache chectac qome ana uva.

₂₂Qaq saishet qome da choche ỹo'ot na lma'pi

da yaqto' anac ca ỹaqa'a da naigui,

huo'otaq da danaxan nache anac ca lỹa shiỹaxaua

da chec na ala ca lañiguishec.

Na ỹalamaxat nhuo' le'ecpi qaỹoqtec qome da nachaalataxac,

'eeta'am aca qo'oipaq, qaq nam lleca'aguishecpi

qalaq nque'etaxaachigui qome da naigui da lo'onataxanaxac naua lhuaxaye.

₂₃Qaq saishet qome da choche ne'en da lo'onataxanaxac,

qataq da ileu ca llalec da saxanaxa da ivita ca laloqo',

cha'aye namayepi chegoxoguet so shiỹaxauapi

maye huetalec da lchoxonnataxanaxa Ñim Nataxala',

qaq nataqa'en cam llalaqpi qome namayepi.

₂₄Namayepi qom saxanaxa da aỹem iỹaxana,

nache Aỹem sasateguet qome,

qom saxanaxa da ivirec ca ltaxaỹaxac, nache Aỹem mashe sa'axaỹa qome.

₂₅Qaq ca qa'alaq qataq ca qagueta llalec

qalaq huaqta'a't qom deque'eta'ape,

qaq ca llon qalaq chectac qome na 'auaqpi,

'eeta'am ca huaca nauegaxanaxala',

qaq ca 'araxanaq qalaq chectac qome na lsoche na 'alhua.

Qaq 'enauac qome añi qui'itta ñeqasoxonaxa

qaica ca que'eenaxac qataq qaica ca na'aqchettac ca lỹa.»

Qaq 'era da la'aqtac Ñim Nataxala'.