Qaỹataỹa'aguet dam saq 'en na'amqaanataxanaxac
1Ñim Nataxala', 'eeta':
«Na piguem nachena na ñeso'ootalec,
qaq ana 'alhua qalaq nachana ana ỹapiaxalate.
Qaq ¿hua'ague ca qaỹa'añiỹa'ague ca ima' da qano'oxoñiisheguem?
Qataq ¿hua'ague ca qaỹa'añiỹaña cam ima' maye ishet da ñemataqa'?
2¡Ye Aỹem maiche ỹo'onatac 'enauac nam huo'o,
qaq 'era da 'eetec da huo'omshe yo'oq namayepi!
Qaq 'era da la'aqtac Ñim Nataxala'.
Cam shiỹaxaua maye selotagui nacheca cam
choxoraq qataq daquicotac, maye huo'o naq 'eneque naqa'e'n naua ỹa'aqtaqa.
3Qalaxaye nam ỹavigaxat na huaca lhuaraic da lachetaqtaxanaxat
qalaq 'eeta'am ca ỹalauat ca shiỹaxaua,
qataq na ỹan na qagueta llalec da lachetaqtaxanaxat
qalaq 'eeta'am ca ipelecot na lqosot ca pioq,
qataq cam ỹaneuo na ala na nañiguishec da lachetaqtaxanaxat
qalaq 'eeta'am ca ỹaneuo na ltago'q aca cos late'e,
qataq nam ỹavigaxat na lchenaxanaxat maye ama na laita da lachetaqtaxanaxat
qalaq 'eeta'am nam ỹo'oxoreetac nam ne'enaqtac atamnaxala'pi.
Namayepi maiche lca'aua'a da maiche llecỹaxac,
qataq nqopita da ỹo'ottac dam ỹataqta seqaiga.
4Qaq Aỹem nataqa'en lleca'aua'a qome
da so'ot ca nque'eenaxac namayepi,
nache ñamaxa qome namayepi cam ỹataqta lcolanaxat.
Cha'aye co'ollaq seỹaxan qalaq qaica ca Aỹem ỹasateguet
qataq co'ollaq setaqa qalaq qaica ca Aỹem ỹalaxaguet,
nacherata da sauaachigui naqa'en da ỹo'ot nam qauempi
qataq lca'aua'a da ỹo'ot nam ỹataqta sasaỹamaxaren.»
5Ñaq qana'axaỹaxañiỹa da la'aqtac Ñim Nataxala',
qami' maye huo'o naq 'enec qanqa'eñi naua la'aqtaqa Ñimaye:
«Huo'o nam maiche qarhuo'oi le'ecpi maye qami' nquiỹalo
qataq qami' imaqta'ape souaxat da qaỹaxañiitega da ỹe'enaxat
namayepi, 'eeta': ‹Ñim Nataxala' ña ỹachaxan qome da llo'oxoyec,
sauoqtaique da qami' sauanaqchiguilo da qauamaichiguiñi.›
Qalaxaye namayepi huo'o qome da la'aloxo.»
6Huo'o da nvilỹaxac chemaqtegueua'a ye huaqta'a't nỹecpi,
qataq huo'o da nvilỹaxac chemaqtegueua'a añi atamnaxaqui,
damaye nachera da lavilỹaxac Ñim Nataxala'
da ỹanem da nsheetenaguec nam npa'aguenaxauapi.
7«Ye Sión ñiguiñi so llalec co'ollaq saxanaxa
da ivita da huo'o da lqui'ic da lco'oxoc.
8Qaq ¿negue't co'ollaxa ca hua'aqchigui cam 'ena'am de'era?
¿Negue't ca ỹauaachigui co'ollaxa ca 'ena'am de'era?
¿Peta'a ishet da huaigui ca 'oonolec na'a'q
da ñiguiñi na ỹotta'a't shiỹaxauapi?
¿Peta'a ishet da nque'elaxatta da ñiguiñi ca nhuo' le'ecpi?
Qalaxaye ye Sión co'ollaq choche nomteguet da nqui'ic,
nache saqaỹaloq da ñiguiñi so llalaqpi.
9Qaq cam ¿'eeteco' da sa sashenem da lañoxoc ca nogotolec,
ye nachaỹem da so'ot da lañoxoc camaye?»
Qaq 'era da la'aqtac Ñim Nataxala'.
10«'Enauac qami' maye qarauotaxache ye Jerusalén,
qantonaxauai qome yemaye,
qami' maye huo'o da qaraquicoqoi co'ollaxa souaxat yemaye,
qaq nagui qalaq qami' nlaqchiguilo qome da qaramaicỹaxaqui,
11cha'aye yemaye qami' illepaxa'n qome,
nache qami' ỹa'añaqche't, qataq qami' comaraxaiqa naqa'en,
yemaye qami' illepaxa'n qome nache qanque'etaxañiichigui
da lyacỹaxac da llo'oxoyec.
12Cha'aye Aỹem Nataxala', shenapec:
Aỹem so'ot qome da huecorelec yemaye ca nlagaxayec,
'eeta'am aso tala da ipaxanec na 'etaxat,
qataq da lsallaxa nam ỹotta'a't shiỹaxauapi
'eeta'am qome ca lta'araic ndep.
Qaq yemaye qami' iquia'axa'n qome,
qataq qami' nachetrashegue'm,
qataq qami' ỹachetaleguete naua l-llecte souaxat da lauoche da qoñiita.
13'Eeta'am aca nate'e da ỹa'añaqchettac ca llalec,
qaq 'era da sheetec qome da qami' sa'añaqche't,
qaq nacheye ye Jerusalén da huaña qome
da qauanachiỹa da qara'añaxaqui.»
14Qaq qami' qom qauloỹa'a de'era,
nache ntonapigui' qome da qarquiyaqteỹaxaqui,
qataq dam qaro'ocỹaxaqui dasovi qome 'eeta'am aca huoue da dasovi.
Ñim Nataxala' ỹachaxan qome da la'añaxac
qom ỹalectaigui na lamaxashecpi,
qataq ỹachaxan qome da lalemataic qom dataỹa'aguet
nam ipa'agueetac Ñimaye.
15Cha'aye Ñim Nataxala' qom anac qalaq nactaigui ca norec,
aca nnaigonapi qalaq 'eeta'am qome ana daua'ache,
huaña nache icorec na le'eraxa da layeloxo,
qataq nalaqaasheguem na le'eraxa da lhuaxanaxanaxac.
16Qaq ỹoqta 'eesa da Ñim Nataxala', huota'a qome ca norec
qataq ca ỹeelonec da nmit imauec na shiỹaxauapi,
nache qalota qome ca ilem da lhuaqỹaxac Ñim Nataxala'.
17«Aỹem, imeuo qome ñaqa'en nam inoictañi
naxa da nỹo qataq nqui'itaxat da huaña na nanaxanaqa'pi,
qataq nataqa'en nam chectac naxa na lapat ana
cos late'e qataq ana chegoxonaxa,
qataq nam laỹepi shiguiỹacpi maye qaiqaiga.
Qaq 'era da la'aqtac Ñim Nataxala'.
18Cha'aye aỹem ỹataqta saỹateeta
nam ỹo'ottacpi qataq nam lhuennataxacpi.
Qalaxaye mashe ivita yem laloqo' da llaỹona't nam ỹotta'a't shiỹaxauapi
qataq nam ỹotta'a't naua la'aqtaqa,
qaq namayepi anac qome nache ỹauaachigui da ỹo'oxoyec.
19Qaq Aỹem, sauo'o qome ca la'anaxat huaigui namayepi,
cam lca'alaxaicpi namayepi qalaq samaxa qome nam ỹotta'a't shiỹaxauapi.
Samaxa qome ye Tarsis, Libia qataq ye Lidia,
yem 'alhua maye hueta'a na shiỹaxauapi
maye ỹaỹaten da do'ogoxona na checnec,
qataq ye Tubal, ye Grecia qataq anam qaỹoqta
ỹaqauga 'alhuapiole aso auaxai,
maye saỹauanego' da hua'aqteguelec Aỹem,
qataq saishet da ỹauaachigui co'ollaxa da ỹo'oxoyec,
qaq namayepi ỹa'axatem qome da ỹo'oxoyec nam ỹotta'a't shiỹaxauapi.
20Qataq anac naqa'en nam qarhuo'oi le'ecpi
maye ỹalectaigui nam ỹotta'a't shiỹaxauapi,
da yaqto' Aỹem naua'a, da 'eeta'am aca nachetaqtaxanaqte.
Naua'a añim qui'itta ñeqasoxonaxa maye naña ye Jerusalén,
huota'a na lalo caipi, naigonapi, qataq ana nauogonñiguishepi,
'ashenapi qataq ana nauanaxanaxapi,
qaq nachetac nam qui'itta nhuenecpi da 'eeta'am naxa nam llalaqpi so Israel,
da ndoua'a na lachetaqtaxanaxatpi ñi ima'.
Qaq 'era da ỹa'aqtac Aỹem Nataxala'.
21Qaq namayepi, nataqa'en huo'o qome ca lleca'aua'a,
da yaqto' ntaxaỹaxanaxanecpi
qataq ntaunaxanaq 'eeta'am na leviitapi.
Qaq 'era da ỹa'aqtac Aỹem Nataxala'.
22Qaq 'eeta'am da 'eetec cam dalaxaic piguem
qataq cam dalaxaic 'alhua maye so'ot qome,
da nache 'eetai' qome da saimeuo,
qaq nache 'eetec nataqa'en qome da nache 'eetai'
da saimeuo cam 'am chegoxoguetpi qataq da 'are'enaxat.
Qaq 'era da la'aqtac Ñim Nataxala'.
23Qaq da ivita da dalaxaic so ca'agoxoic,
qataq da ivireuga ye na'a'q mataxaqui,
nache 'enauac qome na shiỹaxauapi anac da Aỹem ỹa'aroto naua l-llecte.
Qaq 'era da la'aqtac Ñim Nataxala'.
24Qaq qom anac namayepi nache ilalec na shiỹaxauapi leuaxaicpi,
nam shiỹaxauapi maye Aỹem dataỹa'aguet co'ollaxa.
Qaq saishet qome da ileu nam qoche'lpi maye chec qome namayepi,
qataq saishet qome da 'om cam norec maye ỹavigaxat namayepi.
¡Nache 'enauac qome na shiỹaxauapi da deqaiga namayepi!»
