Qaivitaqteetega da qalca'atagui na shiỹaxauapi
1Qami' ỹaqaỹarolqa, qami' maye qaua'amaqchiñiitac so 'añaxaic Qarataxala' Jesucristo, saisheto' qome da qalca'aitagui na shiỹaxauapi da qoñiitega huo'o ca ỹactec da 'onaxaic, qaq ca lỹa qalaq saishet. 2Qauennataxañiilec de'era, da huo'otaq huo'o ca sallaxanec da nnoxoneua'alo qami' da qalapoñiita'a't, da ỹaatrañi naua alogo maye ỹataqta late'erai añi lasheue qataq ỹaatañi aca nchiguishaqte maye chegaqaigui na lcat le'enaxat oro. Qataq nataqa'en nnoxoneuo ca choxoraq ỹaatrañi caua alogo ỹataqta qaica ca lya'c. 3Qaq da qami' da ỹactec da qauloỹeeguet ca sallaxanec, nache qoñiỹapega, qoñiita: «'Anso'ootanguio' qome ana'ana 'onaxai so'onaxaqui.» Qaq ca choxoraq da qoñiỹapega, qalaq qoñiita: «'Am, nache qonetaina, 'anachattañi», huo'otaq «'Anso'ona'aguet na 'alhua.» 4Qaq da nache qoñiitec de'era, nache qoñiita'am nam qauemaicpi maye nmit na nasouaxashetpi, da huo'o na imatalec da lauoche saq 'ena'am naqa'en na laỹepi.
5Qami' ñauochaxau' ỹaqaỹa't, ỹataqta aỹem qana'axaỹaxañiỹa: Ñim Lo'onatac 'Enauacna lca'aguishec na shiỹaxauapi choxoraq maye huetalec ana 'alhua, yaqto' namayepi da naquitaxac Ñim Lo'onatac 'Enauacna, nachera da ỹoqta 'eesa lsallaxa. Nataqa'en lca'aguishec na choxoraqpi da yaqto' ỹaconeguet da lo'onataxanaxac Ñim Lo'onatac 'Enauacna maye ỹachaxanapeguem co'ollaxa nam ỹauotec Ñimaye. 6Qaq ¿ta'ainco' qami' da saishet da qauyacñiỹapec qataq qauo'otañi na choxoraqpi? ¿Saisheto' peta'a da sa nachena nam sallaxanecpi na saq qami' iyacna'ape qataq qami' ỹamaxaiguilo ana ncoñetaxanaxaquipi? 7¿Saq nacheno' peta'a nam sallaxanecpi nam isheueetac So Qarataxala'?
8Da qami' qaualaqaiguet da namaxasoxonaxac maye napacalec na laỹepi maye qomi' ỹanema Ñim Lo'onatac 'Enauacna, nache ỹataqta 'onaxaic de'era qauo'oche. De'era namaxasoxonaxac 'eeta': «Qauennachiỹa'a da ñi 'oonolec iuen da ỹauotec ca lỹa, 'eeta'am da lauotaxanaqtaic da maiche nachaalataxac.» 9Qalaxaye qami' da ỹactec qanqa'eñi da la'amaqchec ca 'oonolec shiỹaxaua qataq ỹataqta qauaỹamaxacheeta saq 'ena'am na laỹepi, nache qami' huo'o da qarasouaxashechi, qataq saishet da qaualaqaiguet da lamaxasoxonaxac Ñim Lo'onatac 'Enauacna.
10Qami' da qaualaqaiguet 'enauac na namaxasoxonaxacpi, qalaxaye da huo'otaq 'oonolec ca saishet da qaupaquiilec namayepi, nache 'eeta'am da 'enauac na laỹepi namaxasoxonaxacpi da saishet da qaualaqaiguet. 11Cha'aye nacheñi Ñim Lo'onatac 'Enauacna maye 'eeta' da la'aqtac: «Saishet da 'ancachetague' aca sa 'arhua.» Nataqa'en 'eeta': «Saishet da qaualaataxañi.» Qaq ỹoqo'oye da 'am 'auren aca 'arhua, qalaxaye da 'aualaataxan, nache 'am huo'o da 'arasouaxashet, cha'aye saishet da 'aualaxaguet na lamaxasoxonaxacpi Ñim Lo'onatac 'Enauacna.
12Qaq que'eca na'a'q qom qanmitna, nache Ñim Lo'onatac 'Enauacna qomi' nmi't, ipagaqchiichigui dam lamaxasoxonaxac maye qomi' isoueeguesopa na qarasouaxashetpi. Qaq ỹoqo'oye iuen da ỹataqta ñetelaqañi da huo'o ca so'otaq qataq da huo'o ca ñasaxasoxouec qara'aqtac. 13Cha'aye Ñim Lo'onatac 'Enauacna saishet da ichoxoreetac cam saishet da ichoxoren ca lỹa. Qalaxaye ca huo'o da lchoxonnataxanaxa ca lỹa, nache camaye qaica ca lasouaxashet qom qanmitna.
Da npi'iỹaxac qataq na ỹaỹamaqchiguiñi qaỹo'otpi
14Qami' ỹaqaỹarolqa maye sa'amaqtenaqtac So Cristo, ¿negue'to' cam naigui da huo'o ca 'oonolec da qoñiita da 'eetega da huo'o da lpi'iỹaxac Ñim Lo'onatac 'Enauacna, da huo'otaq saishet da huo'o ca ỹo'ot ỹaỹamaqchiguiñi maye ỹachaxan da huo'o da lpi'iỹaxac? ¡Da nache qoñiitec de'era, nache saishet da qami' qanca'alaxatre'c!
15Da huo'o ca 'oonolec da qoñiita da qaica ca napogoña, huo'otaq qaica ca aloq ye na'a'q, 16nache qaica ca naigui da qonapega camaye da qoneta': «'Aue qome, saqca ca da, da 'icỹaxac, 'aayiñi naua 'ogo qataq 'auque'e, 'aviraxata'a da ỹataqta 'am comaraxaic», da huo'otaq 'am saishet da 'aỹa'anem cam iueetaique maye napogoña qataq cam chec. 17Qaq nache 'eetec nataqa'en da npi'iỹaxac Ñim Lo'onatac 'Enauacna: qaica ca naigui da shenaqtega sepagaqchigui cam 'enapec Ñim Lo'onatac 'Enauacna da huo'otaq saishet da so'otaq cam ỹachaxan damaye. Qaq da nache 'eetec de'era da qarpi'iỹaxac, nache damaye leuaxaic.
18Qaq nam 'eetega da ỹalaxaguet Ñim Lo'onatac 'Enauacna qalaxaye saishet da ỹo'ot ca ỹaỹamaqchiguiñi, aỹem ishet da shenapega namayepi, sheeta': «'Am, qonetega da 'aualaxaguet Ñim Lo'onatac 'Enauacna, aỹem qalaxaye so'ot ca ỹaỹamaqchiguiñi. Ñaq aỹem 'auachaxana cam ỹa'axat da 'aualaxaguet Ñim Lo'onatac 'Enauacna, qaq aỹem qalaq 'am sachaxana da salaxaguet Ñimaye chegoqchigui dam ỹaỹamaqchiguiñi maye so'ot. 19'Am 'aua'amaqten da 'oonolec Ñim Lo'onatac 'Enauacna. ¡Qaq damaye ỹataqta ỹaỹamaqchiguiñi! Qalaxaye ivira'a nam saqcha'a na'añaxac leguemaxaicpi da ỹa'amaqten Ñimaye qataq iviloxolaqchet da lcolanaxa. 20Saishet da qaica ca 'auaỹaanapec. Iuen da 'aua'amaqten da qaica ca naigui da qonetega 'aualaxaguet Ñim Lo'onatac 'Enauacna qataq qonetega 'aua'amaqten Ñimaye da saishet da huo'o ca 'auo'ot ỹaỹamaqchiguiñi. 21So hua'au qarta'a Abraham, Ñim Lo'onatac 'Enauacna ỹataqta ỹaỹamaxareeta co'ollaxa somaye, souaxat da ỹaneuo so llalec Isaac da ỹauo'o lachetaqtaxanaxat ỹavigaxatta. Qaq Ñim Lo'onatac 'Enauacna ỹaỹamaxareeta somaye. 22Da lpi'iỹaxac so Abraham, damaye ỹachaxan som ỹo'ot. Qaq chegoqchigui 'enauac da ỹo'ot, nache da lpi'iỹaxac somaye ivira'a da ỹataqta nalochiguiñi.» 23Qaq nache ipacchigui dam 'enapec ana nere maye huetalec na la'aqtacpi Ñim Lo'onatac 'Enauacna maye 'eeta': «So Abraham ỹa'amaqten da ỹachaxanapec Ñim Lo'onatac 'Enauacna, qaq ỹoqo'oye Ñimaye ỹaỹamaxareeta somaye.» Qaq nache chegoqchigui de'era, da so Abraham ivira'a da nauochaxaua Ñim Lo'onatac 'Enauacna.
24Qaq de'era ỹachaxan da Ñim Lo'onatac 'Enauacna qomi' ỹaconegueta chegoqchigui cam ỹaỹamaqchiguiñi maye so'otaq, qaq saishet da nachaqrata da qarpi'iỹaxac.
25Qaq 'era nataqa'en da 'eetec aso Rajab maye quisheguetaxai. Ñim Lo'onatac 'Enauacna ỹaỹamaxareeta asomaye souaxat dam ỹaỹamaqchiguiñi ỹo'ote'c soua namaxa'she co'ollaq ivildeua'a so lma', qataq ỹoxooyiñi soomaye. Qataq nataqa'en souaxat da itaua'n soomaye da naneltaxa'n, ỹaqa'a ca tateugalo nqa'aic naqa'e'n. 26'Eeta'am ca no'ocỹaxac da mashe ca'ai so saqcha'a lca'alaxa, nache camaye ileu, qaq nache 'eetec nataqa'en da npi'iỹaxac Ñim Lo'onatac 'Enauacna, damaye leuaxaic da saishet da nnaictague' cam no'on qaỹo'ot.
