Da lataxac ñi qarachaxat
1Qami' ỹaqaỹarolqa maye sa'amaqtenaqtac So Cristo, saishet qome da 'enauac da shenaqta da ñepogoxoinaqapegue' da seviraqa'a da sapaxaguenataxanaqpec. Cha'aye Ñim Lo'onatac 'Enauacna ỹataqta sa llalcolec naqa'en ca nmitaguec qome nam dapaxaguenataxaatac, saq 'ena'am na laỹepi shiỹaxauapi. 2'Enauac da shenaqta huo'oi naua qarasouaxashe'ete, qalaxaye nachaqcata ca shiỹaxaua maye ỹaỹaten da nllañi ñi lachaxat, camaye nalochiguiñi da lataxac, qataq ishet da nala'aguet da nllañi da maiche 'eetapeguec da lo'ocỹaxac.
3Ca caaỹo ishet da sañoxotaq da seloxogue, qataq ishet da qomi' ỹalaxagueta da sauoqta'aisalo caua lqueenaxanaqa'ate. 4Nache 'ena'am nataqa'en da 'eetec ana notaxaquipi maye quiguingui na 'etaxat. Na'aictaxa da ỹataqta late'erai qataq ỹataqta lta'araic na la'at maye ỹamaqta, qalaq so lo'o ishet da ỹashaxaatapiguiñi asomaye, na'aictaxa da ỹataqta qaica ca la'amaqchec sotai' lashelaxala' maye taỹaña som ỹashaxaateguiñi asomaye. 5Qaq 'era da 'eetec nataqa'en ñi qarachaxat. Ñimaye ỹataqta qaica ca la'amaqchec, saq 'ena'ama naua lỹa't qorogoxoshe'ete, qalaxaye ñimaye ishet da ỹo'ot ca ỹataqta lta'araic lataxac. ¡Ñimaye saq 'amaqtaqolec, qalaxaye 'eeta'am ca norec, maye ishet da ỹavigaxat 'enauac ca aviaq! 6Naua qara'aqtaqa maye ñasaxasoxorec chegoqchigui ñi qarachaxat, naamaye 'eeta'am ca norec. Ñi qarachaxat ỹataqta lta'araic da la'añaxac da ỹo'ot ca qauem. Ishet da chegoqchigui ñimaye da deqat da qanachaalataxac qataq qomi' iviraxata'alo da qomi' qaỹasaxanguilo ca norec maye nhuaxanaqa' na 'etaxaloxoicpi.
7Seshetaq da so'oxoỹaqchetaq nam ỹotta'a't shiguiỹacpi maye qauemaicpi qataq na maỹopi qataq nam shiguiỹac maye hualectapigui' qataq nam huetangui aso auaxai. 8Qalaxaye sa sañoxotaq da ñellaqañi ñi qarachaxat, da yaqto' saishet da nasaxauec ca na'aqtac maye ishet da deque'emaqtaxan. Ñimaye 'eeta'am da lataxac ca shiguiỹac qauemaic maye qaica ca ishet da ỹo'oxoỹaqchet, qataq ỹataqta nlaqaalec na deshenataxanapec maye qanlem.
9-10Ñi qarachaxat nataqa'en ishet da chegoqchigui da ñasaxasoxouec ca no'on qara'aqtac huo'otaq ca qauem qara'aqtac. Qataq nacheñi nataqa'en ñim ishet da chegoqchigui da sho'oxorenaq Ñim Lo'onatac 'Enauacna maye Nta'a, qataq nataqa'en ishet da chegoqchigui da sesheunaq ca shenaqta'am shiỹaxaua maye lo'onatac Ñimaye maye 'eeta'am da lataxac. Ỹaqaỹa't, ¡de'era saishet da ỹaỹamaxañi da nache 'eetec!
11Aca 'oonole ñi'illoxoqui saishet da ishet da chegaqangui ca 'etaxat maye ama qataq nataqa'en chegaqangui ca ñe'eua 'etaxat. 12Aca higo lcheyec saishet da ala aca le'enaxat aceituna. Qataq aca uva lcheyec saishet da ala aca le'enaxat higo.
Da naỹaanec maye ỹan Ñim Lo'onatac 'Enauacna
13Da huo'o ca 'oonolec da qoñiita da ỹataqta ỹaanaxanaxaic qataq sa nqalat, nache iuen da ỹachaxan ca ỹaỹamaqchiguiñi maye ỹo'ot qataq ỹachaxan da saishet da na'amqaanaxaic.
14Qalaxaye qami' da huo'o ca qauo'ocheetac da qauacheetaigui da qarquiỹaxanaqtaiqui qataq da qarca'alaxanaxaqui, nache qami' qoviitaigui da qaraquicoqoi qataq saishet da qauamaiỹapigui'; qaica ca ishet da ỹo'ot da qaramaicỹaxaqui, qataq saishet da qaviye da 'eesa lataxac. 15Cha'aye de'era naỹaanec saishet da chegoqo'ot Ñim Lo'onatac 'Enauacna, nachaqrata da chegaqalec ana 'alhua qataq chegoqo'ot so saqcha'a na'añaxac leguemaxaic. 16Qaq ỹoqo'oye chegaqaigui da nca'alaxanaxac qataq da loquiaxac qataq 'enauac nam ỹotta'a't sa ỹaỹamaxañisat.
17Qalaxaye nam hueto'ot da naỹaanec maye chegoqo'ot Ñim Lo'onatac 'Enauacna, saishet da ỹo'ottac na qauem, nachaqrata da nmitta'a da nlagaxayec qataq laxaraicpi qataq huo'o da lauotaxanaqtaic na laỹepi; qataq ỹalecaua'a da nqui'ic nam huetaigui da nque'eenaxac qataq nache 'eetai' da ỹo'ottac ca ỹaỹamaqchiguiñi. Qataq saishet da lca'atagui na laỹepi, qataq ỹataqta 'eesa da quetague' So Cristo.
18Qaq nam nmitta'a da lactapiguiñi naqa'en na laỹepi, nache Ñim Lo'onatac 'Enauacna ỹami' da nsheetenaguec, qalaxaye nachera da nlagaxayec qataq da 'eesa lataxac.
