Da 'eetec co'ollaq qaỹatalec so Jefté
1So Jefté maye galadiita, somaye alaataxaic qataq ỹataqta 'añaxaic. Qaq somaye nache llalec aso 'alo quisheguetaxai, qaq so lta'a somaye le'enaxat Galaad. 2Qaq aso ỹoqta lhua so lta'a, huo'o so laỹepi llalaqpi, nache co'ollaq mashe ỹepi somayepi, nache ỹo'orauec so Jefté, ca'ai naqa'en so lma'. Nache 'enapego', 'eeta':
«'Am saishet qome da huo'o ca 'am taỹot nam lalamaxatpi so qarta'a, cha'aye 'am llalec aso lỹa 'alo.» 3Nache so Jefté dataueeguesop so lqaỹañecpi, nache nqo'ona ye Tob da yaqto' nache naña, huaña co'ollaxa da ỹalegoigui so 'etaxaloxoicpi, nache nnaictague' naxa da queuotapigui'. 4Qaq co'ollaq mashe qaỹoqteguelo soua na'axa'te, nache so amoniitapi iloquiaxan so Israel le'ecpi, 5nache som nqueroxonecpi nataxala'pi maye lma' ye Galaad damaxasoxona co'ollaxa da qanauec so Jefté maye netaña ye Tob, 6nache 'enapeco':
«'Auanac qome, cha'aye sauoqtaique da 'am qarataxala' da seloquiaxai' na 'amoniitapi.»
7Nache so Jefté 'enapec:
«¿Saisheto' da aỹem qanquiỹai? Cha'aye qami', aỹem qauo'oyiỹauec co'ollaxa nache sheca'ai qanqa'eñi ye lma' so ita'a. Qalaq ¿ta'ainco' ye aỹem qañi'iguiñiỹa'a nagui da mashe huotaique da qami' qaicogaxana'ape?»
8Nache so nqueroxonecpi nataxala'pi 'enapeco':
«Qomye nachera da huo'omshe 'am ñi'iguenaqa'a nagui. Cha'aye seuenaq da qomi' 'auca'ateguelo da seloquiaxai' ye 'amoniitapi, qaq 'am nache 'am lataxala' qome 'enauac na lma' na Galaad.»
9Nache so Jefté 'enapeco':
Da qansheetaique da she'eguelaq da yaqto' selogui' ye 'amoniitapi, qaq Ñim Nataxala' da aỹem ỹanem da ỹoxonec yemayepi, nache ¿ỹoqta 'eesa da aỹem qarataxala'ai qome?
10Nache so nqueroxonecpi nataxala'pi, 'eeta':
«Ñim Nataxala', ỹataqta hua'aqchigui ñaqa'enaq, da so'otaq qome 'enauac de'era qonapec.»
11Huaña nache so Jefté ỹasat da ca'ategue somayepi, nache se'eso nhuo' le'ecpi ỹauo'o da lca'ataxala' somaye, qataq lataxala' na nalleppi. Nache huaña ye Mispá da so Jefté hua'aqchigui naqa'en Ñim Nataxala' de'era naỹamaxataxac maye ỹo'ot somayepi.
So Jefté nmittaique da naỹamaxate' so 'amoniitapi
12Huaña co'ollaxa nache so Jefté, huo'oi soua ỹamaxalo so lta'a so 'amoniitapi da yaqto' inat, 'eeta': «¿Negue't cam sasouaxat da 'anshetaique da 'auanac da 'auloquiaxan nam netalecpi na ña'alhua?» 13Nache so lta'a so 'amoniitapi 'enapegalo' soua lamaxa'she so Jefté, 'eeta': «Qami' Israel le'ecpi, co'ollaq qoquiỹa'ai ye Egipto, nache qauotaxañic na ña'alhua, chegoqchiguiña so tala Arnón, nache ivitta'a so tala Yaboc qataq ye Jordán. Qaq ỹoqo'oye nagui aỹem qavi'iguelaxachiỹot yi'iye 'alhua, yaqto' selagaqtapiguiñi qome.»
14Nache so Jefté, qaltaq ỹauo'oi soua lỹa't ỹamaxalo so lta'a so 'amoniitapi, 15nache 'eeta': «Da lasataxac na Jefté 'eeta': Qomi' Israel le'ecpi saishet da seuotaxanaxac co'ollaxa na na'alhua na moabiitapi qataq na 'amoniitapi. 16Co'ollaq qolqa'ai ye Egipto, nache qolaqtalec ye toolec 'alhua, nache seviraqta'a aso Auaxai Togaxarai, qataq seviraqta'a ye Cades. 17Nache huo'oi soua qaramaxa'she da nqo'oora so nta'a ye Edom, da yaqto' qomi' ỹasheetema da sa'axasoxonalec ye na'alhua, qalaxaye qomi' sa ỹashenema. Nataqa'en seỹaxanaqot so nta'a ye Moab, qalaxaye nataqa'en somaye saishet da qomi' ỹashenema da sa'axasoxonaxalec ye na'alhua. Qaq ỹoqo'oye nache sonaqaña co'ollaxa ye Cades. 18Huaña nache qaltaq qolaqtalec ye toolec 'alhua, nache qolaqto'oto naua loiguiye ye na'alhua ye edomiitapi qataq ye moabiitapi. Nache co'ollaq seviraxa yem na'alhua ye moabiitapi maye pa'aỹa'ague da nala' lliguisheguem, nache souaqa'a yemaye, yem pa'aỹa'atague da le'ego so tala Arnón. Cha'aye se'eso tala, nache loga't na na'alhua ye moabiitapi ỹoqo'oye saishet da senoxonaxaua'a yemaye. 19Huaña, nache qaltaq huo'oi soua qaramaxa'she da nqo'onalo so Sijón, maye lta'a na 'amorreopi maye lma' ye Jesbón, da yaqto' qomi' ỹasheetema da sa'axasoxonaxalec yem na'alhuapi da yaqto' ñeqo'onaxa ye maiche qana'alhua. 20Qalaxaye so nta'a Sijón saishet da qomi' ỹa'amaqte'n co'ollaxa, nache qomi' sa ỹashenema da sa'axasoxonaxalec ye na'alhua, nacherata da laỹona't 'enauac so nalleppi, nache nqo'ona ye Yahás, nache ỹanaña so lpe'lpi, nache qomi' iloquiaxa'n. 21Qalaxaye Ñim Nataxala' maye Natamnaxala' na Israel le'ecpi qomi' ỹanema da qoroxonec so Sijón, qataq 'enauac so nalleppi, huaña nache saconaxa da yaqto' qaralamaxat 'enauac ye na'alhuapi ye amorreopi, 22nache saconaxa yem na'alhuapi ye amorreopi chegoqchiguiña so tala Arnón, nache ivitta'a so tala Yaboc, qataq chegoqchiguiña ye toolec 'alhua, nache ivitta'a so Jordán. 23¿Qaq nagui 'auauotaique da 'auanac da 'auacona ne'ena 'alhua? 24Qaq taxa da huo'o ca 'am ỹanem ñi 'anatamnaxala' Quemos ¿maye saisheto' da 'auauo'o 'aralamaxat? Qaq ỹoqo'oye nataqa'en qomi', da 'enauac nam qomi' ỹanema Ñim Nataxala' maye Qanatamnaxala', nache qaralamaxat. 25¿Qalqo' 'aupi'itaxaatega da 'anapacalec so Balac, som llalec so Sipor, som nta'a ye Moab? ¿Peta'a huo'o co'ollaxa ca huaña da anac da icogaxanapec na Israel le'ecpi nache delogui'? 26Qaq mashe ivi' naua trescientos vi'iye da sonaqtalec na Jesbón, qataq na Aroer qataq na lauoreuapi nma'piolec, qataq 'enauac na huaqta'a't nỹecpi maye ỹotta'a't naua nañalo maye hueto'ot na loigue so tala Arnón. Qalaq ¿ta'ainco' da sa qauanaqui co'ollaxa 'enauac se'esoua vi'iye da qauotaxañic namayepi? 27Qaq aỹem qaica ca 'am so'otec qauem. Qalaxaye 'am qauem da qonetapeguec da 'auauotaique da 'auanac da qomi' 'auloquiaxa'n. Qalaxaye Ñim Nataxala' nacheñi ñi pa'aỹa'aguet da nmit na Israel le'ecpi qataq na 'amoniitapi.»
28Qalaxaye so lta'a so 'amoniitapi saishet co'ollaxa da ỹalaxaguet da la'aqtac so Jefté.
Da ỹan la'aqtac so Jefté
29Nache so Saqcha'a La'añaxac Ñim Nataxala' talec so Jefté, nache somaye jec da queuolec 'enauac ye 'alhua Galaad qataq ye Manasés, qataq ye Mispá maye huaigui ye Galaad da yaqto' delogui' so amoniitapi. 30Yem huaña da so Jefté ỹanot da la'aqtac Ñim Nataxala', 'eeta': «Qom aỹem 'aỹa'anem da ỹoxonec ye amoniitapi, 31nache qom ñe'eguelaq da mashe sauegaxan que'eca alaataxac, nache cam na'autec da chegoqteua'a ñi ima' da aỹem ca'atta'aguet, nacheca qome ca 'am sanot da savigaxat ỹachetaqtaxanaxat.»
32Nache so Jefté taỹa co'ollaxa ye na'alhua so amoniitapi nache iloquiaxan, nache Ñim Nataxala' ỹanem da loxonec somayepi. 33Nache so Jefté ỹataqta qalota so ỹalauat mpa'aguenaxauapi, nache loxonec so veinte som huaqta'a't nỹecpi maye ỹotta'a't naua nañalo, chegoqchiguiña ye Aroer, nache ivitta'a ye Minit qataq ye Abel Queramín. Qaq 'era da 'eetec da so Israel le'ecpi da loxonec co'ollaxa so amoniitapi.
34Nache so Jefté co'ollaq ỹe'eguelaxa so lma' maye naña ye Mispá, nache aso 'oonole llale ca'atta'aguet somaye, nache dasottac, qataq iuaxaatagui aso lasaquiaxanata. Qaq somaye, nachaqasota asa'aso llale, qaica ca laỹe llalaqpi. 35Qaq co'ollaq ila'aguet asomaye, nache ncolaxata'alo soua alogo souaxat da lqaigaxa nache nỹen, nache 'eeta':
«¡Aicoue, 'am ỹalole, ỹataqta lta'araic da aỹem 'auo'otec ñiqui'ic! Cha'aye nache 'am maye aỹem 'auo'otec de'era lta'araic ñiqui'ic, souaxat da sanot co'ollaxa so ỹa'aqtac Ñim Nataxala', qaq nagui iuen da sepacchigui da so'ot damaye!»
36Nache asomaye 'enapeco':
«'Am ita'a, da mashe 'aỹa'anot co'ollaxa ca 'ara'aqtac Ñim Nataxala', qaq no'on da 'aupacchigui da 'auo'ot cam 'aỹa'an 'ara'aqtac! Cha'aye Ñimaye mashe ipacchigui da 'am ỹanem da 'anauec so 'ampa'aguenaxauapi 'amoniitapi.» 37Qalaxaye 'am sequiguiỹo'ot da aỹem 'aỹa'anema qome caua dos ca'agoxoiqa da yaqto' sauga ana qasoxonaxapi, ñenaictague' ana ñauochaxauapi da ñeỹeetac, cha'aye lta'araic da ỹaquicoxo souaxat da ñaq saxana da saron.
38Nache so Jefté ỹenema soua dos ca'agoxoiqa, nache hua'aqta'a da jec. Nache asomaye queuoteguelec co'ollaxa ana qasoxonaxapi, nnaictague' aso nauochaxauapi, nache nỹeetac souaxat da taỹa'a da ileu qalaq ñaq saxanaxa da huaron. 39Qaq co'ollaq mashe inoxoorec se'esoua dos ca'agoxoiqa, nache asomaye ñe'eguelaxaua'a ye hueta'a so lta'a. Nache somaye ipacchigui da ỹo'ot so la'aqtac maye ỹanot co'ollaxa Ñim Nataxala'. Qaq asomaye saxanaxa da ỹauana ca ỹale. 40Qaq ỹoqo'oye so Israel le'ecpi nache chegoqta'a co'ollaxa de'era, da queto'ot da ỹo'ottac ye 'oonolec vi'i na qa'ampi da iviraxattrec naua cuatro na'axa'te da nỹeeteguelec aso llale so Jefté.
