Da laronaxac so Sansón
1Qaq huo'o so na'a'q, nache so Sansón taỹa ye Timná, nache ila'a aso 'alo filistea nache ỹataqta nqopita. 2Qaq co'ollaq ỹe'eguelaxa so lma', nache da'aqtaxanema soua lta'al, nache 'eeta':
Aỹem sela'a aso 'alo filistea, huaña ye Timná, ỹoqo'oye sauotaique da qauỹaxañiiua'a asomaye da yaqto' saroneguet.
3Qalaxaye soua lta'al 'ena'apo':
¿Peta'a qaca aca 'alo na maiche 'arhuo' le'ecpi, huo'otaq na laỹepi Israel le'ecpi da 'auauotaico' da 'auachegoxotaigui aca 'arhua ye filisteopi maye sa qara'amaqtenaxanaxaua?
Nache so Sansón 'enapeco':
Qomye asa'aso qa'añole, nachaso aso ỹoqta ñeqopita. Ỹoqo'oye sauotaique da qauquiguiỹaua'a da yaqto' saroneguet asomaye.
4Qalaxaye soua lta'al somaye sa ỹaỹate'n da Ñim Nataxala' maiche 'ena'ac 'enauac de'era, cha'aye nmittaique ca lataxac da iloquiaxan so filisteopi, souaxat da se'esoua vi'iye so filisteopi ỹataqta sa nañaxaasheguem so Israel le'ecpi. 5Huaña, nache so Sansón qataq soua lta'al nqo'oora co'ollaxa ye Timná. Qaq so Sansón co'ollaq ivita ye lma' aso nañiguishepi uva, nache ỹa'axasoxooteguet so sauaxaic llalec, desoqta'aguet da huotaique iloquiaxan somaye. 6Huaña nache so Saqcha'a La'añaxac Ñim Nataxala' ỹanem da la'añaxac so Sansón, nache somaye ỹauota'aisalo naua lhua'q da icolaxattac so sauaxaic llalec, 'ena'am naqa'en ca quetaq llalec. Qalaxaye saishet da da'aqtaxanema soua lta'al de'era ỹo'ot somaye. 7Ime, nache nqo'ona da detaxaỹapegue' aso qa'añole maye nqopittega.
8Qaq co'ollaq mashe huo'oi soua na'axa'te da huetaiguilo de'era, nache so Sansón ỹe'eguelaq da yaqto' huaroneguet asa'aso qa'añole, nache ỹaxanec so quetague' nqa'aic da yaqto' taỹa da imeten so sauaxaic leuaxaic. Nache ilalec somaye da netaigui so lapoota'a't te'esaq lta'a lalaxatpi qaq mashe huo'o na lla'ac lte'. 9Nache huota'aisalo naua lhua'q da nqat na lalaxat da yaqto' nqateua'a so lla'ac, nache ỹache qataq nache deque'etague' somaye. Qaq co'ollaq natena'agueta soua lta'al, nache ỹanema so te'esaq lta'a lli'i da yaqto' che'c soomaye, qalaxaye saishet da da'aqtaxanema da ỹachegoxotaigui so sauaxaic leuaxaic.
So ỹapogoñi la'aqtac so Sansón
10Nache so lta'a so Sansón nqo'ona co'ollaxa da na'aqtaxane' asa'aso qa'añole, qaq so Sansón nache ỹo'ot co'ollaxa so nquia'axac, cha'aye maiche lataxac naxa nam nsoxoppi maye lma' yemaye. 11Qaq so filisteopi co'ollaq ila'a so Sansón, nache nauegueuo so treinta nsoxoppi da yaqto' lỹata'ape somaye. 12Nache so Sansón 'enapega se'eso treinta nsoxoppi, 'eeta':
«Qami' sa'aqtaxanema de'era ỹapogoñi na'aqtac, qaq ne'enaua siete na'axa'te maye huaiguilo ne'ena nquia'axac, da ishet da qauqachiichigui ca naigui damaye, nache ñi 'oonolec da qoñiita sanem qome ca ỹataqta no'on lomaxaqui, qataq caua 'onaxaiqa nogo maye maxasoxoqui'. 13Qalaxaye da sa qauqachiigui ca naigui damaye, nache ñi 'oonolec da qoñiita, aỹem ỹanem qome ca ỹataqta no'on lomaxaqui, qataq caua 'onaxaiqa anogo maye maxasoxoqui'.»
Nache somayepi 'enapeco':
Ña qomi' 'aua'aqtaxanema cam ỹapogoñi 'ara'aqtac. Qaq qomi' nache ỹataqta ña'axaỹaxanaqchiguiñi qome.
14Nache so Sansón nasaxauec som ỹapogoñi na'aqtac, 'eeta':
«Som dequi'iỹapec, nache chegaqaigui so nallec,
qaq som 'añaxaic, nache chegaqaigui so ama.»
Qaq co'ollaq mashe inoxoorec soua tres na'axa'te, nache somayepi saxanaxa da ỹaỹaten ca naigui se'eso ỹapogoñi na'aqtac. 15Qaq ỹoqo'oye so ivita so lỹa na'a'q, nache qoỹenapego' aso lhua so Sansón, qoỹeeta':
Ña 'auauo'o ca lataxac qome da so 'arhua 'am da'aqtaxanem ca naigui se'eso ỹapogoñi la'aqtac, cha'aye da sa 'auo'ot de'era, nache qomi' 'am savigaxataq qome, qataq 'enauac nam llalaqpi so 'arta'a. ¡Cha'aye 'ena'amso' da qomi' qanaviquiireuo da yaqto' qauacoñiỹa nam qaralamaxatpi!
16Nache asomaye nqo'ona so Sansón nache nỹeetac, nache 'enapega, 'eeta':
¡'Am saishet da aỹem 'anqopita! ¡Nda'a't da aỹem 'anquiỹa! Cha'aye 'am 'aua'aqtaxanem so ỹapogoñi 'ara'aqtac so ihuo' le'ecpi, qalaxaye saishet da aỹem 'aua'aqtaxanem ca naigui.
Nache so Sansón 'enapeco':
Aja', qalaxaye nataqa'en so ita'a qataq aso ỹate'e saishet da sa'aqtaxanema ca naigui de'era, ¿qaq ta'ainco' taxa da 'am sa'axatem?
17Qalaxaye asomaye nache quetot da nỹeetac se'esoua na'axa'te maye huaiguilo so nquia'axac. Qaq souaxato' da saq ñaxaasheguem da dequicto'ot somaye, nache so ivita so pa'atec na'a'q se'esoua siete na'axa'te, nache asomaye ỹañoxot so lhua da da'aqtaxanem da naigui se'eso ỹapogoñi na'aqtac. Nache asomaye da'aqtaxanem so lauo' le'ecpi. 18Qaq co'ollaq yaqta'a da inoxooñi aso nala' se'eso pa'atec na'a'q se'eso nquia'axac, nache so filisteopi nqo'oneua'a da ỹasateguet so Sansón, 'eeta':
«¿Negue't ca napacalec da lamaic na te'esaq lta'a lli'i?
¿Negue't ca napacalec da la'añaxac so sauaxaic?»
Nache so Sansón 'enapeco':
«Da saishettaxa da qauauegaxañiilec aso ilo huaca llale,
nache saishettaxa da qauaỹachiñi ca naigui som ỹapogoñi ỹa'aqtac.»
19Nache so Saqcha'a La'añaxac Ñim Nataxala' ỹanem da la'añaxac so Sansón, nache somaye nqo'ona ye Ascalón, huaña nache ỹalauat so treinta ỹalleppi. Nache ỹacona so logoxoshetpi qataq so 'onaxaic logoxotpi maye ỹaatañi somayepi, nache desheetenaxana da isheeten som ỹaqatchigui se'eso ỹapogoñi la'aqtac somaye. Ime, nache ỹe'eguelaxa so lma' so lta'a, qalaxaye ỹataqta dalemata. 20Nache aso lhua so Sansón qoỹanem da lhua so 'oonolec som nsoxoppi, maye ỹalecta'aguet co'ollaq ỹo'ot so laronaxac somaye.
