Jueces 16

₁Huo'o so na'a'q nache so Sansón taỹa so huaqta'a't nỹecpi ye Gaza. Huaña, qaq ila'a co'ollaxa aso 'alo quisheguetaxai, nache nqo'oneua'a so lma' da lauañi' asomaye. ₂Nache so lma' ye Gaza co'ollaq la'axaỹaxac da so Sansón hueta'a se'eso huaqta'a't nỹecpi, nache somayepi nauan 'enauac co'ollaxa somaye, qataq nache hueta'a so lasom so lpaqtaxat se'eso huaqta'a't nỹecpi da nauaatac 'enauac se'eso pe, cha'aye 'eeta':

«Qom qaỹata'aguet ca na'a'q da nnoxonec camaye, nache salauataq.»

₃Qalaxaye so Sansón hueta'a yemaye choche ivitta'a so laiñi so pe, qaq co'ollaq ñisheguem nache jec, nache nqat so lasompi so lpaqtaxat so huaqta'a't nỹecpi nache l-llasheguemeto naqa'en soua lauoqte qataq so la'axasoxot. Ime, nache ỹasaxalec na lallac 'enauac somayepi, nache irosheguema ye pa'asheguem añi qasoxonaxa maye nalotta ye Hebrón.

₄Qaq co'ollaq ime de'era, nache so Sansón qaltaq huataxaic, huattague' aso 'alo le'enaxat Dalila, maye naña ye ca'amegue Sorec. ₅Nache soua lataxala'ate so filisteopi nqo'oora da detaxaỹot aso Dalila, 'eeta':

Ña 'auauo'o ca lataxac da 'am da'aqtaxanem so Sansón, ca chegaqa'ague dam lta'araic la'añaxac maye qaica ca 'ena'am, qataq ca 'eetec ca lataxac da yaqto' qoroxonec. Huaña qome nache ñanagaq da secoñeraqai' nache maiche soicnaqtac. Qaq da 'auo'ot de'era, nache ñi 'oonolec da shenaqta, 'am ỹanem qome aca mil cien na plata.

₆Qaq ime co'ollaxa, nache aso Dalila 'enapega so Sansón, 'eeta':

Ñaq aỹem 'aua'aqtaxanem taxa cam chegaqa'ague de'era lta'araic 'ara'añaxac maye qaica ca 'ena'am. Qataq ¿peta'a huo'o ca lataxac da sa 'aushet da maiche 'ansouec da 'am qaicoñerai'?

₇Nache so Sansón 'enapeco':

Da aỹem qaicoñerai', qaỹo'ogoxonalo caua siete lo'oc maye lque'ete ca checnec, nache ishet da nquiguiñi da ỹa'añaxac, nache sheeta'am ca camachaqca shiỹaxauatto.

₈Huaña, nache so lataxala'pi so filisteopi iroua'a aso Dalila so siete lo'oc maye lque'ete na checnec, nache aso Dalila decoñetaxanalo soomaye da icoñerai' so Sansón. ₉Qaq asomaye huo'oi soua ỹale't, da nqañoxottrañi naqa'en, huetraigui so lma', nache co'ollaq mashe icoñettai' so Sansón nache asomaye ỹa'alaxalec, 'eeta':

¡Sansón, na filisteopi anac da 'am iloquiaxan!

Nache so Sansón ỹachepiaxatrañi soua ncoñetaxanaqa'ate, 'eeta'am naqa'en ca nañec vigaxaic. Nache ñaq 'eetalec da saishet da qaỹaỹaten ca chegaqa'ague de'era lta'araic la'añaxac somaye. ₁₀Nache aso Dalila 'enapega somaye, 'eeta':

¡Qache aỹem 'auatenachet! ¡'Am choche aỹem 'auatenachettaco'! Qalaxaye nagui, aỹem 'anqouaguectaxa da aỹem 'aua'aqtaxanem ca 'eetec ca lataxac da ishet da 'am qaicoñerai'.

₁₁Nache so Sansón 'enapeco':

Da qaỹo'ogoxona ca nañecpi dalaxaicolec maye saxanaxa da qaicoñetaxana da aỹem qaicoñerai', nache qaica de'era ỹa'añaxac, nache sheeta'am ca camachaqca shiỹaxauatto.

₁₂Qaq aso Dalila huo'oi soua ỹale't, da nqañoxottrañi naqa'en, huetraigui so lma', nache asomaye ỹacona so dalaxaicolec nañecpi, nache icoñerai'salo naua lapique somaye. Ime, nache ỹa'alaxalec, 'eeta':

¡Sansón, na filisteopi anac da 'am iloquiaxan!

Qalaxaye so Sansón ỹachipiaxatañi co'ollaxa so nañecpi, 'eeta'am naqa'en ca ntetaxanaxat 'iilo. ₁₃Nache aso Dalila qataq 'enapega so Sansón, 'eeta':

¡Ñaq 'eetalec da aỹem 'auatenachet! ¡Qache nda'a't da choche aỹem 'auatenachettaco'! ¡Qalaxaye nagui sauotaique da ỹoqta aỹem 'aua'aqtaxaatem ca 'eetec ca lataxac da ishet da 'am qaicoñerai'!

Nache so Sansón 'enapeco':

'Auo'oxona'agueta qome ca no'oxonec que'eca no'oxonaxanaxala' ne'enaua siete ñamogue, nache 'atoqooñi aca lashe ỹataqta 'aua'añaxatchiguiñi que'eca no'oxonaxanaxala'. Huaña qome, nache qaica de'era ỹa'añaxac, nache sheeta'am ca camachaqca shiỹaxauatto.

Nache aso Dalila ỹo'ochaqchet co'ollaxa so Sansón, nache ỹaconeua'alo soua siete namoguel somaye, nache ỹo'oxona'agueta so no'oxonec se'eso no'oxonaxanaxala'. ₁₄Huaña nache itoqooñi aso lashe so no'oxonaxanaxala' ỹataqta ỹa'añaxatchiguiñi, nache ỹa'alaxalec somaye, 'eeta':

¡Sansón, na filisteopi anac da 'am iloquiaxan!

Nache so Sansón nlouec, nache ñisheguem, nache ỹataqta 'enauac nmatasheguem da napogosheguem so no'oxonaxanaxala'. ₁₅Nache aso Dalila 'enapega somaye, 'eeta':

¿Ta'ainco' da qonetega aỹem 'auauotec, ye choche aỹem 'auatenachettalec? Cha'aye nagui mashe tres da aỹem 'auatenachet, qaq saxanaxa da aỹem 'aua'aqtaxaatem ca chegaqa'ague de'era lta'araic 'ara'añaxac.

₁₆Qaq souaxato' da 'enauaque soua na'axa'te da sa ỹalemaxat, qataq saq ỹaxaañi da inatto'ot somaye aso Dalila, nache so Sansón ỹataqta qaica ca lama', nache naconapeguela't da huotaique da ileu. ₁₇Huaña, nache imato'ot da lquiyaqteỹaxac asomaye da da'aqtaxanem de'era lta'araic la'añaxac, 'eeta':

Co'ollaq saxanaxa da sañiguiñi, nache sogote da aỹem qaiỹotauga da aỹem qoỹanot Ñim Lo'onatac 'Enauacna, ỹoqo'oye ỹataqta sa ỹauanapega da qanpetec na ỹaue. Qaq qom ivita da qanpetec na ỹaue, huaña nache qaica qome de'era lta'araic ỹa'añaxac, nache sheeta'am ca camachaqca shiỹaxauatto.

₁₈Nache aso Dalila nanomta da so Sansón 'eesa da ỹataqta lquiyaqteỹaxac da da'aqtaxanem asomaye, nache damaxasoxonalo da ana'c soua lataxala'ate so filisteopi, nache 'eeta':

¡Nagui maya', qauanaqui qome, cha'aye ñi Sansón ỹataqta aỹem imato'ot da lquiyaqteỹaxac da aỹem da'aqtaxaatem!

Nache soomaye nqo'oora aso Dalila, nache ỹache' aso ỹachaxanapecot co'ollaxa lsheetenaxanaqte.

₁₉Nache aso Dalila ỹo'ochaqchet co'ollaxa so Sansón, na'axaataleguete naqa'en naua lteltaye, nache iỹaxana so 'oonolec ỹale da icheguerec soua siete namoguel. Huaña, nache asomaye chegoqchiguiña da ỹe'enai' somaye, ₂₀nache ỹa'alaxalec, 'eeta':

¡Sansón, na filisteopi 'am naỹa da 'am iloquiaxan!

Nache so Sansón nlouec nache ipi'itaxano' da qaltaq qoỹet da 'eeta'am soua lỹa't na'axa'te, qalaxaye sa ỹaỹaten da Ñim Nataxala' mashe ca'ai somaye. ₂₁Nache so filisteopi ỹaconeua'a somaye, nache nqa't naua la'ai'te, nache ỹauega ye Gaza, qaq huaña yemaye da qaicoñerai' qaỹauota'a lquet so npaqtac lcat bronce, da qaỹo'onataxanaxan iconnaxaatagui qanqa'en so namaicnaxanaxat coma' maye naña aso ncoñetaxanaxaqui. ₂₂Qalaxaye so laue maye qanpetec co'ollaxa somaye, qaltaq ỹe'eguelaxa da ñaxat.

₂₃Qaq huo'o so na'a'q nache so 'amaqtaqaicpi lataxala'pi so filisteopi, ỹo'ot so laponaxac da ỹo'ot so lta'araic lquia'axac da yaqto' ỹo'ot aso lachetaqtaxanaqte da ỹanot so natamnaxala' Dagón. Nache do'onaxaatac, 'eeta':

₂₄Nache so shiỹaxauapi co'ollaq ila'a de'era, nache nataqa'en do'onaxaatac qataq ỹo'oxoreetac so natamnaxala', 'eeta':

₂₅Qaq souaxat da ỹataqta machiguiñi co'ollaxa somayepi nache, 'eeta':

«¡Qanaviquiiuec ca Sansón da yaqto' sa'ashaxanaq camaye!»

Nache qanqatec so Sansón, qaỹachegoxottoigui aso ncoñetaxanaxaqui, nache qanachaalataxaataña som nañalo soua dos lauoqtel aso atamnaxaqui nache qaỹa'ashaxaatac. ₂₆Huaña nache so Sansón 'enapega som nsoqolec maye ỹauecta'aguet naxa na lhuaq, 'eeta':

Aỹem 'auauegalo caua nhuoqtel maye nlletrañi ana'ana atamnaxaqui. Nache aỹem 'aua'axaỹa'a qome da sashelhua'alo yaqto' sa'aqtaua'alo caamaye.

₂₇Qaq som lataxala'pi so filisteopi 'enauac co'ollaxa da huetaigui aso atamnaxaqui, qataq ỹataqta qalota so ỹalleppi qataq 'alpi so pa'atauo. Qataq huac da ivi' tres mil so shiỹaxauapi maye netasheguema so pa'asheguem se'eso nỹec, imeteetac so Sansón co'ollaq qaỹa'ashaxaatac. ₂₈Nache so Sansón iỹaxanot Ñim Nataxala', 'eeta': «'Am Nataxala' maye Ñatamnaxala', 'Am ñachoxonnot da aỹem 'autauan na'aictaxa da nachaqnata ne'ena na'a'q da aỹem 'aỹa'anem ca ỹa'añaxac, yaqto' sepalaique ivi' souaxat da na filisteopi nqa't soua ỹa'ai'te.»

₂₉Ime, nache so Sansón ipotapigui soua dos laiñiguishe lauoqtel aso atamnaxaqui, soua ỹataqta huetaleguete asomaye, nache na lhuaq aloic ỹasheleua'a aso 'oonole, qaq na ne'emaq ỹasheleua'a aso lỹa, ₃₀nache ỹa'alaq, 'eeta':

«¡Aỹem ileuaxaua na na'a'q na filisteopi!»

Huaña, nache ỹataqta na'añaxat da ỹamaxayiñi soua lauoqtel aso atamnaxaqui nache hua'axañi naqa'en asomaye, nache hua'axalec 'enauac so lataxala'pi so filisteopi, qataq 'enauac som pa'atauopi. Qaq 'era da 'eetec so Sansón co'ollaq ileu, nache ỹataqta ỹaguec so lalaatacpi, napacalec som lalaatacpi co'ollaq ña nca'altauec.

₃₁Qaq co'ollaq ime, nache so lqaỹañecpi qataq 'enauac so lauo' le'ecpi so Sansón, anac da nqatec so lo'ocỹaxac somaye. Nache qailaroigui aso nhuachiqui so lta'a Manoa maye huetanguilo yeua Zorá qataq ye Estaol. Qaq so Sansón ivi' co'ollaxa soua veinte vi'iye da lataxala' so Israel le'ecpi.