So ne'enaqtacpi natamnaxala'pi so Micaía
1Qaq ye 'alhua maye huaña aso qasoxonaxapi ye Efraín, nache netaña co'ollaxa so ỹale le'enaxat Micaía. 2Somaye da'aqtaxanem co'ollaxa aso late'e, 'eeta':
«Sa'aqchigui so qauem 'ara'aqtac maye 'auasaxalec so decachiỹa aso 'om maye ivi' mil cien lcatpi plata. Qaq nachaỹem maye 'am secachiỹot, qalaxaye nagui 'am she'eguelaxatot ayemaye.» 3Nache so Micaía ỹe'eguelaxatot aso alom plata aso late'e, nache asomaye 'enapega, 'eeta':
Qaq souaxat 'am ỹalcolec, nache nagui anamaye sanot Ñim Nataxala' da yaqto' qaỹo'ot ca ne'enaqtac 'epaq atamnaxala' maye qaỹo'oxoolec na lcat plata.
4Qaq co'ollaq ime da so Micaía ỹe'eguelaxatot aso alom plata aso late'e, nache asomaye ỹacona aso doscientos lcatpiole nache ỹanem so lcat lo'o da yaqto' ỹo'ot ca ne'enaqtac 'epaq atamnaxala' da qalapaxalec ne'ena lcat plata, ime, nache ỹanaña so lma' so Micaía.
5Nache so Micaía huo'o co'ollaxa so natamnaxaqui naña so lma'. Nataqa'en ỹo'ot so lapo' so ntaxaỹaxanaxanec qataq so nqolacpiolec, qataq ỹanagui da ntaxaỹaxanaxanec so 'oonolec so llalaqpi. 6Qaq se'esoua na'axa'te maye huetoigui de'era, nache so Israel le'ecpi ñaq saxanaxaqca co'ollaxa ca nta'a da ilo'ogue somayepi, qaq ỹoqo'oye ñi 'oonolec maiche nanoiqueetac da huo'o cam ỹo'ot.
7Qaq huo'o co'ollaxa so nsoqolec maye chegoxoguet so lauo' so Leví maye chochaq hueta'a co'ollaxa ye Belén som lma' so maiche lauo' le'ecpi so Judá. 8Qaq somaye ca'ai co'ollaxa ye Belén da nmitaique ca nma' lỹa da yaqto' naña. Nache quetalec so 'alhuapi maye huaña aye qasoxonaxapi ye Efraín, ivitta'a so lma' so Micaía. 9Nache so Micaía inat somaye, 'eeta':
¿Chaq hua'ague ca 'auachegoqta'ague?
Nache somaye 'enapec:
Qomye sachegaqa'a ye Belén, qataq aỹem leviita, qaq ñimittaique cam ishet da sonaña.
10Nache so Micaía 'enapega, 'eeta':
'Onaxaictaxa da qonaña na ima', yaqto' nache 'am ntaxaỹaxanaxanec, qataq 'am 'eeta'am ñaqa'en ca ita'a. Qalaxaye aỹem 'am sesheeten qome, 'am sanema caua diez ana lcatpiole plata ye 'oonolec vi'i, huaqtalec qome ñaqa'en ca nogoxot, qataq ca nallec.
11Nache se'eso leviita ỹasat da naña ye lma' so Micaía. Nache somaye ivitta'a da 'eco' maiche llalec lỹa somaye. 12Nache so Micaía ỹanagui da ntaxaỹaxanaxanec somaye, nache somaye nache naña ye lma' so Micaía. 13Qaq so Micaía ipi'itaxaatega da Ñim Nataxala' talec naqa'en da lchoxonataxanaxa, souaxat da netaña ye lma' so leviita, qataq ntaxaỹaxanaxanec.
