So leviita qataq aso lhua lỹa
1Qaq se'eso na'a'q co'ollaq saxanaxa da huo'o ca nta'a ye Israel, nache huo'o so leviita maye netaña co'ollaxa ye ỹataqta qaỹoqta 'alhua maye huaña ana qasoxonaxapi ye Efraín, nache somaye ỹauo'o lhua lỹa aso 'alo lma' ye Belén maye huaigui ye 'alhua Judá. 2Qalaxaye asomaye dalemataỹa so lhua, nache jec da ỹe'eguelaxa ye Belén, nache naña ye lma' so lta'a. Qaq co'ollaq mashe inoxoorec soua cuatro ca'agoxoiqa da netaña yemaye, 3nache so leviita jec da ỹe'eguena'a asomaye da yaqto' nachoxonnot da ỹe'eguelaxaguet. Qaq somaye lỹatac co'ollaxa so lo'onataxanaxanec, qataq ỹaue'c soua dos 'ashena, qaq asomaye co'ollaq ilo'ot so lhua nache ỹauegueua'a so lma', nache so lta'a nataqa'en ỹa'amaqchiguiñi co'ollaq ilo'ot somaye. 4Nache somaye 'enapega so laronaxanec da ñaq cara'ac da hua'a ye lma' somaye, nache so leviita qataq so lo'onataxanaxanec hua'a yemaye soua tres na'axa'te, nache deque'eta'ape qataq nỹomta'ape. 5Qaq so na'a'q cuatro nache no'ottrashegue'm so nte'etom da yaqto' je'c. Qalaxaye co'ollaq mashe huotaique da je'c, nache so lta'a aso qa'añole 'enapega so laronaxanec, 'eeta':
Qauqui'ictaxa, na'aictaxa da saq 'amaqtaq ca nauole laỹe cam qollequi, yaqto' huo'o da qara'añaxaqui qom qoqui.
6Nache soomaye nso'ooyiñi, nache deque'e' qataq nỹomta'ape. Huaña, nache so lta'a asomaye qaltaq dequiguiỹo'ot, 'eeta':
Ñaq aỹem 'anqouaguectaxa da qaltaq qoviỹa'a na ima' ca lỹa 'oonolec pe, da yaqto' qauamaichiguiñi da qoviita'a ne'ena.
7Qaq na'aictaxa co'ollaxa da mashe ñisheguem som leviita da huotaique da jec, qalaxaye som lacho' ỹataqta ỹe'eguelaqto'ot da dequicto'ot da qaltaq hua'a so lma', nache somaye ỹasat da no'onañi.
8Qaq so na'a'q cinco, nache so leviita no'ottasheguem so nte'etom da yaqto' jec, qalaxaye so lta'a aso qa'añole, 'eeta':
Qauqui'ictaxa, yaqto' huo'o da qara'añaxaqui qom qoqui, nache qauachiỹa'a na avit.
Nache soomaye nso'ooyiñi, nache deque'eta'ape. 9Qaq so leviita co'ollaq ñisheguem da yaqto' jec da ỹauec aso lhua lỹa, qataq so lo'onataxanaxanec, nache so lacho' somaye qaltaq 'eeta':
Mashe avit qataq mashe huotaique da pe, nache qoviỹa'a taxa ne'ena na pe, da yaqto' qauamaichiguiñi da qoviita'a ne'ena, nato' qonte' qom che'egueera, nache qoqui da qavi'iguelaqỹa cam qarma'ai.
10Qalaxaye so leviita saishet co'ollaxa da qaltaq hua'a se'eso pe. Nacherata da jec, ỹauec aso lhua lỹa, qataq soua lalo 'ashena maye huetaleguete so lla'ac. Qaq co'ollaq mashe ivitra soomaye ye Jebús, maye nacheye ye Jerusalén, 11nache mashe yaqta'a da pe, nache so lo'onataxanaxanec 'enapega somaye, 'eeta':
'Onaxaictaxa da saỹoxosoxoua'a ne'ena huaqta'a't nỹecpi maye lma' na jebuseopi, nache souaqa'a ne'ena pe.
12Qalaxaye so leviita 'enapeco':
Saishet da saỹoxosoxoua'a ca huaqta'a't nỹecpi maye sa lma' na Israel le'ecpi. Nacherata da nache qolaqta qome yaqto' seviraqa'a ye Gabaa, 13nache ñepogoxoinaqapegue' da souaqa'a na pe ye Gabaa huo'otaq ye Ramá.
14Qaq soomaye, nache quete', qaq co'ollaq mashe inoxooñi aso nala', nache ivitra ye Gabaa maye huaigui ye na'alhua so chegoxoguetpi so Benjamín. 15Huaña, nache huaỹoxoreua'a ye Gabaa da yaqto' huera'a se'eso pe. Qalaxaye so leviita nqo'ona co'ollaxa so naponqa' maye huaigui yi'iye huaqta'a't nỹecpi, nache nso'ooñi cha'aye qaica ca ỹauo'o cam lo'ochaqa' somaye qataq soua lỹa't.
16Qaq co'ollaq mashe pe, nache nateugueye so ỹa'axaiquiolec chegoqtauga so no'onaxa maye lo'onataxanaqa'. Qaq se'eso ỹa'axaiquiolec, nache lma' co'ollaxa ye 'alhua maye huaña ana qasoxonaxapi ye Efraín. Qalaxaye somaye 'eeta'am ca chegaqauec da netaigui som chegoxoguetpi so Benjamím maye netaña yi'iye huaqta'a't nỹecpi ye Gabaa. 17Nache so ỹa'axaiquiolec co'ollaq ila'a somaye da hueta'a se'eso naponqa', nache inat, 'eeta':
¿Hua'ague cam 'auachegoqta'ague? Qataq ¿hua'ague cam 'aỹa'ague?
18Nache so leviita 'enapec:
Qomye sachegoxosoqta'a ye Belén maye huaigui ye 'alhua Judá, qaq nache saqta'a ye ỹataqta qoỹoqta 'alhua maye huaña aye qasoxonaxapi ye Efraín, maye sootaña. Aỹem sachegoqta'a ye Belén, qaq nagui she'eguelaxa ye naña añi atamnaxaqui maye lalamaqte Ñim Nataxala'. Qalaxaye ne'ena qaica ca sanata da ỹauo'o ca ỹo'ochaqa'. 19Qomi' huo'o na sachoqtac ana naqta 'auaqpi, maye alo'q ñeua 'ashena, qataq huo'o ana qanqo nauole qataq na lataxa da yaqto' qaralecnaxanaxat da sequia'aq añi ihua qataq ñi ỹo'onataxanaxanec, nache qaica ca seuenaqtac.
20Qalaxaye so ỹa'axaiquiolec 'enapec:
No'on da 'arviraxac. Qaq nagui nache maiche souapegue' 'enauac ca 'aueetaique. ¡Qalaxaye saishet da 'am sashenem da nache qoueta'a ne'ena naponqa' na pe!
21Ime, nache so ỹa'axaiquiolec ỹauegueua'alo so lma' soomaye, qaq co'ollaq iỹota'ape naua lchel soua maxasoxoiqa, nache somaye iquia'axa'n soua 'ashena. Qaq co'ollaq ime nache deque'e't qataq nỹomta'ape.
Da ỹataqta qauem l-leuaxa aso 'alo
22Qaq co'ollaq mashe ỹataqta machiguiñi da lquiyaqteỹaxac soomaye, nache anac so ỹalleppi 'etaxaloxoicpi maye lma' yemaye, nache coleesop co'ollaxa so nỹec maye lma' so ỹa'axaiquiolec, nache iuaxaatapegueua'a so lasom, qataq 'eetega, 'eeta':
¡Ña 'anpaxanec ca ỹale maye 'anamaxasoxoic, cha'aye sauoqtaique da qarauañi'!
23Nache somaye pa'auec, nache 'enapega, somayepi, 'eeta':
¡Qami' ỹaqaỹa't, aỹem qarqouaquic da saishet qome da qauo'oche de'era qauem, cha'aye yi'iye ỹale choche nmataqa' ñaqa'en na ima'! 24Qalaxaye huo'o añi pa'atauo ỹale, maye saxanaxa da ỹauana ca ỹale qataq añi lhua lỹa yi'iye ỹale. Qaq aỹem ñepa'axaarec nagui da yaqto' qauaviqui, nache maicheye cam qoñiita'aque. Qalaxaye yi'iye ỹale saishet qome da qauo'ochec de'era qauem.
25Qalaxaye somayepi saishet co'ollaxa da ỹalaxaguet so ỹa'axaiquiolec, ỹoqo'oye so leviita ipa'axanec aso lhua lỹa, nache se'eso ỹalleppi ỹauec asomaye nache ncat, nache imauec se'eso pe da qaỹa'ashaxaatac asomaye, nache ivitta'a so yaqta'a da yo'oxoñi. Huaña nache qoỹaxaañi. 26Qaq so mashe yaqta'a da yo'oxolec na 'alhua, nache aso 'alo ỹe'eguelaxaua'a so lma' so ỹa'axaiquiolec, maye hueta'a so lhua, nache taqteua'a so lasom da ileu, nache huetaña choche ivitta'a so ỹoqta yo'oxolec na 'alhua. 27Qaq co'ollaq ñisheguem so lhua, nache ỹauatoigui so lasom da jec, nache choche ilalec aso lhua lỹa, taqto'ot so lasom, qaq naua lhuaxaye nache huetralec na pa'aguiñi somaye. 28Nache 'eetega asomaye, 'eeta':
¡Qoñisheguem, nache qolaq!
Qalaxaye asomaye sa ỹasat. Nache so leviita ỹacoosop so lo'ocỹaxac asomaye nache ipenalec so lalo 'ashena, nache jec da nqo'ona so lma'. 29Qaq co'ollaq ivireua'a so lma', nache ỹacona so lainec, nache npilliguiñi da lo'ocỹaxac aso lhua lỹa, doce naqa'en so laỹepiolec asomaye. Ime, nache ỹamaxa 'enauac som netaña 'alhuapi so Israel le'ecpi. 30Qaq 'enauac so ỹauaachigui co'ollaxa de'era 'enapeco':
Chegoqta'a co'ollaq ca'ai ye Egipto na Israel le'ecpi, da saỹauanapega da qaỹauaachigui, qataq da qaỹo'ot ca 'eeta'am de'era. Qaq ña qauennataxañiilec damaye, qataq qauauo'oi ca qarasataxaqui cam sataxanaqteuga damaye.
