Da nhuaxanaguec so Israel le'ecpi
1So nale piguem le'ec Ñim Nataxala', chegoqchiguiña ye Gilgal da taỹa ye Boquín, nache 'enapega so Israel le'ecpi, 'eeta': «Aỹem qami' ñeqateeguesopa co'ollaxa ye Egipto, nache qami' ñauegalo ne'ena 'alhuapi maye sachaxanapecot co'ollaxa som qarta'ailpi co'ollaq san so ỹa'aqtac, sheeta': ‹Aỹem saishet qome da sa sepaguelec da ñaỹamaxataxac da qoñiita, 2qom saishet da qanaỹamaxache' nam lma' ne'ena 'alhuapi, nachaqrata da qanlaxachiiñi ana lca'atoxonaxalatepi.› ¡Qalaxaye qami' saishet da aỹem qaualaqaiguet! ¿Ta'ainco' da qoñeetec de'era? 3Qaq ỹoqo'oye nagui qami' shenapegalo da aỹem saishet da so'orauec ne'ena shiỹaxauapi maye lma' ne'ena 'alhuapi, nache namayepi qataq na natamnaxala'pi, 'eeta'am aca qoina da qami' nqovi'n.»
4Nache so nale Ñim Nataxala', co'ollaq ime da la'aqtaxanaxac, nache so Israel le'ecpi ỹataqta 'enauac da na'alaqtapiguiñi da nnoinaxac. 5Qaq ỹoqo'oye somayepi ỹamata'ac Boquín yi'iye 'alhua, qataq nache huaña yemaye da qoỹanot Ñim Nataxala' aso nachetaqtaxanaqte.
Da l-leuaxa so Josué
6Qaq so Josué co'ollaq ime da ncoyeguene' so Israel le'ecpi, nache ñi 'oonolec somayepi jec, nqo'ona da nalec so na'alhuapi maye taalec da lalamaxat. 7Qaq nache so Israel le'ecpi queto'ot da ỹo'oxoreetac Ñim Nataxala', co'ollaq ña nca'altauec so Josué, qataq so nqueroxonecpi nataxala'pi, maye ỹauaachigui co'ollaxa 'enauac so lta'araicpi ỹo'otpi Ñim Nataxala' maye ỹo'otec so Israel le'ecpi. 8Qaq so Josué, maye llalec so Nun, som lamaxashec Ñim Nataxala', ileu co'ollaq mashe ivi' soua ciento diez vi'iye da nachaalataxac. 9Nache qailareña ye maiche lalamaxat na'alhua maye naña ye Timnat Seraj, maye nalec añi qasoxonaxapi ye Efraín, maye pa'aỹa'ague da sheu' añi qasoxonaxa Gaas. 10Nataqa'en ileu co'ollaxa so Israel le'ecpi maye naloxouapi so Josué. Huaña, nache anac som dalaxaicpi maye sa ỹauatton Ñim Nataxala', qataq sa ỹaỹaten nam ỹo'otecpi so Israel le'ecpi.
So Israel le'ecpi ỹaxaañi da ỹo'oxoreetac Ñim Nataxala'
11Qaq huaña, nache so Israel le'ecpi ỹo'ot nam ỹataqta sa ỹaỹamaxaren Ñim Nataxala', cha'aye natameetacot na ỹotta'a't ne'enaqtacpi lqui'ipi so Baal. 12Nache ca'ai Ñim Nataxala', Ñim Natamnaxala' so hua'au lta'alpi maye nqateeguesop co'ollaxa ye Egipto, nache ỹataqta nañaneguet da natameetacot so natamnaxala'pi so shiỹaxauapi maye lauoreuapi, nache inogoqchet Ñim Nataxala'. 13Nache ca'ai Ñim Nataxala' souaxat da natameetacot so Baal, qataq so ỹotta'a't ne'enaqtac lqui'ipi aso Astarté, 14ỹoqo'oye Ñim Nataxala' ỹataqta dalemataỹa so Israel le'ecpi, nache ỹaneguet so cachaxaicpi da yaqto' nhuotta somayepi, qataq so mpa'aguenaxauapi maye maiche lauoreuapi nauec somayepi, nache saishet da dataỹa'aguet. 15Qaq somayepi da jec naxa da nalat, nache Ñim Nataxala' nqanaxat somayepi da yaqto' qauem da llecỹaxac, cha'aye nache la'aqtac co'ollaxa, nache ivira'a da ỹataqta lta'araic da lachetataic somayepi. 16Qalaxaye Ñim Nataxala' nataqa'en nauaxaỹaxaasheguem som nataxala'pi da yaqto' isoueeguesop da la'añaxac som nhuottac somayepi. 17Qalaxaye so Israel le'ecpi ñaqaiyeta saishet da ỹoqocha'a se'eso nataxala'pi, nacherata da nañaneguet da natameetacot so ỹaqa'a atamnaxala'pi, nache ca'ai da llecỹaxac som hua'au lta'alpi, maye ỹataqta ỹalaxaleguete co'ollaxa naua lamaxasoxonaxaco Ñim Nataxala', qaq somayepi nache saishet da ilolec da lataxac somayepi. 18Qaq naxa Ñim Nataxala', da ỹauo'o na nauaxaỹaxaasheguem nataxala', nache ỹataqta itauaatac, qaq naxa da ña nca'altauec ñi nataxala', nache isoueeguesop na Israel le'ecpi da la'añaxac na mpa'aguenaxauapi, cha'aye Ñimaye ỹataqta huo'o da lchoxonnataxanaxa da hua'aqtega da la'alaxac ne'ena lalamaxat nhuo' le'ecpi, souaxat da sa nañaxaasheguem da lachetataic. 19Qalaxaye naxa da ivita da ileu ñi nataxala', nache somayepi qaltaq ỹe'eguelaxa da ỹo'ot nam ỹataqta qauem, nache napacalec som qauem ỹo'otpi co'ollaxa som hua'au lta'alpi, nache do'onataxaatacot qataq natameetacot so ỹaqa'a atamnaxala'pi. Nache saishet da ỹaxanec na qauem ỹo'ottacpi da chegoqta'ague, qataq dam qauem lataxac. 20Qaq ỹoqo'oye Ñim Nataxala' ỹataqta dalemataỹa so Israel le'ecpi, nache 'enapeco': «Ne'ena nhuo' le'ecpi, ỹataqta saỹaỹamaxatapec da ñaỹamaxataxac maye samaxalec co'ollaxa som hua'au lta'alpi, qataq saishet da Aỹem ỹalaxaguet. 21Qaq nagui nache saishet da ỹauaachigui ñaqa'en da so'orauec na ỹotta'a't shiỹaxauapi maye netalec ne'ena 'alhua, maye so Josué sa ỹañoxot da ỹo'orauec co'ollaq ña nca'altauec. 22Qaq cha'aye Ñim Nataxala', huotaique co'ollaxa da ỹauaachigui da so Israel le'ecpi ỹataqta quegue da llecỹaxac Ñim Nataxala', 'eeta'am da 'eetec co'ollaxa som hua'au lta'alpi.»
23Qaq souaxat de'era, nache Ñim Nataxala' saishet da saỹaỹaloxon da ỹo'orauec se'eso ỹotta'a't shiỹaxauapi, maye so Josué saishet co'ollaxa da loxonec, nacherata da nache netaña naqa'en somayepi.
