Ñim Nataxala' iỹaxana so Gedeón
1Qaq so Israel le'ecpi ỹo'ot co'ollaxa nam ỹataqta sa ỹaỹamaxaren Ñim Nataxala', ỹoqo'oye Ñimaye huaiguilo nataqa'en soua siete vi'iye da ỹaneguet da la'añaxac so madianiitapi. 2Qaq souaxato' so madianiitapi da ỹataqta nquictauec da la'añaxac da ỹachoxoren so Israel le'ecpi, nache somayepi ỹo'ot so lloqtaxanaxaquipi, ỹanaigui aso qasoxonaxapi, qataq so auacpi maye nqañoxotaxaquipi. 3Ỹoqo'oye so Israel le'ecpi naxa da huo'o na lañiguishec, nache so madianiitapi, amaleciitapi, qataq so shiỹaxauapi maye lma' ye pa'aỹa'ague da nala' lliguisheguem, anac naxa da iloquiaxan somayepi. 4Nache naxa da ivita ye na'alhua so Israel le'ecpi, nache ỹa'ayiñi na lpe'lpi, nache ilaxachigui 'enauac na lañiguishecpi somayepi, nache ivira'a ye 'alhua ye Gaza, nache ỹataqta qaica ca no'onaxatañi da aloq so Israel le'ecpi, ivira'a aso qaguetapi, nauegaxanaxala'pi huaca qataq so 'ashenapi. 5Cha'aye so lpe'lpi qataq so na'atetpi somayepi, ỹataqta nlaqaalec yi'iye 'alhua, nache ỹataqta nlachiguiñi naqa'en. Cha'aye somayepi qataq aso lalo cameellopi ỹataqta qalota, 'eeta'am ana shiiquioxoipi maye qaica ca ishet da naloqten. 6Nache ỹataqta lta'araic da lachoxoyec so Israel le'ecpi souaxat so madianiitapi, ỹoqo'oye ivitta'a da nachoxoreetacot Ñim Nataxala' da yaqto' itauan somayepi.
7Qaq so Israel le'ecpi co'ollaq iỹaxanot Ñim Nataxala' da yaqto' isoueeguesop so madianiitapi, 8nache Ñimaye namaq so la'aqtaxanaxanec nache, 'eeta': «'Era da la'aqtac Ñim Nataxala' maye Natamnaxala' na Israel le'ecpi, 'eeta': ‹Aỹem qami' ñeqateeguesopa co'ollaxa ye Egipto, yem huaña co'ollaq qami' nlatacpi, 9qaq saishet da nachaqrata da qami' ñeqateeguesopa yem egipciopi, cha'aye nataqa'en som laỹepi maye qami' sa iyacna'ape. Qaq somayepi qauauañiichigui ñaqa'en da so'orauec, nache qami' sanema na na'alhuapi somayepi. 10Qataq Aỹem, qami' sa'aqtaxanema co'ollaxa da Aỹem, nachaỹem Nataxala' maye Qanatamnaxala'ai, qataq da saishet da qayi'iitega so natamnaxala'pi so amorreopi, maye na'alhua co'ollaxa ne'ena qoñiitalec nagui, qalaxaye saishet co'ollaxa da Aỹem qaualaqaiguet.›»
11Qaq huaña nache anac so nale piguem le'ec Ñim Nataxala', nache nso'ooñi, taỹot na la'a' aso qo'oipaq late'erai maye naña ye Ofrá, asom lalamaqte co'ollaxa so Joás, maye lalamaxat lauo' le'ec so Abiezer. Qaq so Gedeón, maye llalec so Joás, somaye ichegoqtac co'ollaxa so trigo, nqañoxottañi huetaigui som no'onataqa' aso uva da qaỹo'ot na lataxa, nqañoxottapiisop so madianiitapi.
12Nache so nale piguem le'ec Ñim Nataxala', nachaxana somaye nache, 'eeta':
«¡Ñim Nataxala' 'am hueta'aguet, cha'aye 'am 'añaxaic, qataq qaramchigui ye 'arhuel!»
13Nache so Gedeón ỹasateguet somaye, 'eeta':
«'Am Ỹataxala', da qomi' hueta'agueta Ñim Nataxala', nache ¿ta'ainco' da qomi' taleguete 'enauac ne'ena qauempi? ¿Qaq hueta'ago' 'enauac ca lta'araicpi ño'oxoyecpi maye sa qaỹauanapegapi maye qomi' da'aqtaxaatapeguema naxa som hua'au qarta'alpi, da Ñim Nataxala' qomi' nqateeguesopa co'ollaxa ye Egipto? Qaq nagui Ñim Nataxala' qomi' ca'aisalo, nache qomi' ỹanegueta da la'añaxac ye madianiitapi.»
14Nache Ñim Nataxala', ỹataqta ỹalletot somaye nache, 'eeta':
«'Am, qouelec qome de'era 'ara'añaxac da 'ausoueeguesop na Israel le'ecpi da la'añaxac ye madianiitapi. Qaq peta'a ¿saisheto' da Nachaỹem da 'am samaq?»
15Qalaxaye so Gedeón qaltaq 'enapec:
«'Am ỹataxala' ñaq aỹem 'anqouaguec, ¿ca 'eeteco' da ñeca'alaxatec na Israel le'ecpi? Ye nam ỹalamaxat ihuo' le'ecpi namayepi ỹataqta choxoraqpi, da ỹalectaigui na laỹe nhuo' le'ecpi maye chegoxoguetpi so Manasés. Qataq aỹem ye ỹataqta qaica ca ỹa'amaqchec.»
16Nache Ñim Nataxala' 'enapego' somaye, 'eeta':
«Aỹem 'aupi'iỹa'a qome, cha'aye Aỹem, 'am soota'aguet. Qaq ỹoqo'oye 'am 'oxonec qome ye madianiitapi, nache yemayepi 'eeta'am qome ca 'oonolec shiỹaxaua da 'oxonec.»
17Nache so Gedeón 'enapeco':
«Da ỹoqta 'eesa da huo'o da 'arqouagaxanaqtaic da sheeta, qaq no'on qome da 'auauo'o ca 'ara'anec da yaqto' ỹataqta 'itchiguiñi da 'eesa da aỹem 'autaqtegue'. 18Qaq 'am ñachoxonnot da saishet da qoca'ai ne'ena, nache 'auata'a da ñevirec da ñerouec ca ỹachetaqtaxanaxat nallec da yaqto' 'am sanem.»
Nache Ñim Nataxala' 'enapeco':
«Aja', 'am seuata'aguet.»
19Nache so Gedeón queuo, nache ỹaỹamaxaañi so quetaq llalec, qataq ỹachangui aso 'amaqtaqchigui naco'oña so 'ayiiña maye qaica ca ỹasheeraxachigui lalegue, nache ỹo'ot aso nauole. Ime, nache so lapat ỹachangui aso nallec laỹe no'oxona qataq som lli'i somaye ỹachangui aso taxaqui, nache ỹache 'enauac se'eso da irouga se'eso ale piguem le'ec maye neto'ot asa'aso qo'oipaq late'erai da yaqto' ỹanem somaye da lachetaqtaxanaxat. 20Nache so nale piguem le'ec Ñim Lo'onatac 'Enauacna ỹamaxalec somaye da ỹachalec aso coma' so lapat, qataq aso nauole maye qaica ca lalegue, qaq so lli'i nache icorelec somaye.
Nache so Gedeón ỹalaq da ỹo'ot de'era. 21Huaña nache so nale piguem le'ec Ñim Nataxala', ỹauota'a so lsheenec aso nashelte maye nasoqta'a da nhuoiguet naqa'en so lapat, qataq aso nauole 'ayiiña. Nache se'eso coma' chegaqaigui so norec, nache somaye ỹataqta chipchiguiñi nataqa'en so lapat qataq aso nauole 'ayiiña, huaña nache so nale piguem le'ec Ñim Nataxala' 'eco' da quiguiñi. 22Qaq huaña nache so Gedeón, nanoma da detaqtague' so nale Ñim Nataxala', nache 'enapeco': «¡Aicoue, 'Am Ỹataxala' maye Ñatamnaxala'! ¡Aỹem ñauane' so 'anale piguem le'ec, qataq ỹataqta satata'aguet!» 23Nache Ñim Nataxala' 'enapeco': «'Am talec da nlagaxayec. Qaq saishet da 'añi'i, cha'aye saishet da 'aleu.»
24Huaña nache so Gedeón ỹanaña yemaye da nauaxaỹaxaasheguem aso nca'atoxonaxalate maye lalamaqte Ñim Nataxala', nache ỹamata'ac da le'enaxat «Ñim Nataxala' nacheñi Ñim nlagaxayec.»
Qaq nache ivitta'a nagui da ñaq netaña ye Ofrá, yem lma' so lalamaxat lauo' le'ecpi so Abiezer.
So Gedeón nlaxaañi so lma' so ỹaqa'a atamnaxala'
25Qaq nacheso se'eso pe da Ñim Nataxala' 'enapega so Gedeón, 'eeta':
«'Auaconeua'a qome ca 'oonolec huaca maye mashe ivi' naua siete vi'iye, 'auachegoxotaigui nam na'atetpi ñi 'arta'a, ime, nache 'anlaxaañi añi nca'atoxonaxalate maye nauaxaỹaxaasheguem co'ollaxa ñi 'arta'a da yaqto' qanatamnot so Baal, qataq 'aulaxachigui ñi na'attañi 'epaq maye lqui'i aso Aserá maye huaqta'ai' añim nca'atoxonaxalate. 26Ime, nache 'aỹa'analec yem naña añimaye da 'auaỹamaxatchiguiñi da 'ano'oxoosheguem aca nca'atoxonaxalate da qanatamnot na Nataxala' maye 'Anatamnaxala'. Ime, qataq 'auacona qome ca laỹepi ñi'iñi 'epaq maye lqui'i aso Aserá maye 'auquesoq, nache 'aualonaxana da 'auavigaxat ca 'arachetaqtaxanaxat huaca maye Aỹem 'aỹa'anot.»
27Qaq huaña, nache so Gedeón ỹaconeua'alo soua diez so lo'onataxanaxanecpi, nache ỹo'ot 'enauac nam ỹamaxalec Ñim Nataxala'. Qalaxaye saishet da na'a'q so huaigui da ỹo'ot de'era, nacherata da iuata'aguet so pe, souaxat da ñe'etega so maiche lauo' le'ecpi, qataq so laỹe shiỹaxauapi maye netaigui so huaqta'a't nỹecpi.
28Qaq so lỹa na'a'q co'ollaq mashe ñesheguem so shiỹaxauapi maye netaigui se'eso huaqta'a't nỹecpi, nache choche qailalec aso nca'atoxonaxalate da qanatamnot so Baal da mashe qanlaxaañi, qataq so na'attañi 'epaq maye lqui'i aso Aserá da mashe qaiquesoq. Qataq qailalec asom dalaxai nca'atoxonaxalate da qaỹachalec co'ollaxa so 'oonolec huaca qaỹavigaxat da qaỹauo'o nachetaqtaxanaxat. 29Nache ñi 'oonolec somayepi nnattague' na maiche lauoreua, 'eeta': ¿Chaq negue't ca ỹo'ot de'era?
Qaq so mashe lcopa'ague da nchemaqtaxanaxac, nache qaỹaỹaten da so ỹo'ot de'era, nacheso so Gedeón, som llalec so Joás. Huaña nache qanqo'ona so Joás, nache qoỹeetega qoỹeeta':
30«¡Ña 'anqatec ca 'aỹa'alec, yaqto' salauataq, cha'aye camaye nlaxaañi aso qarca'atoxonaxalate da ñatamnaqot so Baal, qataq iquesoq so na'attañi 'epaq maye lqui'i aso Aserá maye huaqta'ai' aso nca'atoxonaxalate!»
31Qalaxaye so Joás 'enapego' somayepi, 'eeta':
«¿Qalaq qansheetaico' da qavicheelec som Baal qataq qauloquiilec? Qalaxaye cam iueelec so Baal, nache qom qaỹata'aguet na na'a'q nache camaye ileu. Qaq da ỹataqta 'eesa da atamnaxala' som Baal, qaq no'ono' da qauauaqaita'a da maiche nhueela't, cha'aye maiche lalamaqte aso nca'atoxonaxalate maye qanlaxaañi.»
32Qaq ỹoqo'oye huaña co'ollaxa nache so Gedeón, qaỹamata'ac da «Yerubaal» cha'aye qoỹeeta': «So Baal maiche delogui' qome somaye», cha'aye so Gedeón, nlaxaañi aso nca'atoxonaxalate maye lalamaqte so Baal.
Ñim Nataxala' hueta'aguet so Gedeón
33Qaq ime, nache 'enauac so madianiitapi, amaleciitapi, qataq 'enauac so chegaqa'ague da pa'aỹa'ague da nala' lliguisheguem huaxaỹa't, nache ỹa'axasoxoolec so tala Jordán, nache hua'a so ca'amegue ye Jezrel da ỹanaña so lpe'lpi. 34Qalaxaye so Saqcha'a La'añaxac Ñim Nataxala', ỹataqta hueta'aguet so Gedeón, nache somaye ỹashiiyigui co'ollaxa aso lasheere peenaq lcoue da yaqto' laỹona't som lauo' le'ecpi so Abiezer da yaqto' huaxaiguet somaye. 35Qaq nataqa'en ỹauo'o so lamaxashecpi da yaqto' iỹaxana so maiche nhuo' le'ecpi maye chegoxoguetpi so Manasés, da yaqto' huaxaiguetpi somaye. Qataq damaxasoxona nataqa'en som chegoxoguetpi so Aser, Zabulón qataq so Neftalí, da yaqto' nataqa'en huaxaiguet somaye.
36Nache so Gedeón 'enapego' Ñim Lo'onatac 'Enauacna, 'eeta': «Da ỹoqta 'eesa da aỹem 'auo'onataxana da 'anca'alaxatec na Israel le'ecpi, cha'aye nachera dam qonapec, 37nache aỹem sanaña nagui ne'ena daqaqta qagueta laue ye huaña da qaichegoq na trigo. Qaq qoyo'oxoñi nte'etom da ỹapapiaxatta na 'aỹa namaye, qaq na 'alhua qalaq 'enauac da daqaqta, huaña nache saỹateeta qome da ỹoqta 'eesa da aỹem 'auo'onataxana da 'anca'alaxatec na Israel le'ecpi, cha'aye nachera da qonapec.»
38Qaq nache ipacchigui da 'eetec de'era. Nache so Gedeón co'ollaq ñisheguem so nte'etom so lỹa na'a'q, nache nlomtac so 'aỹa maye huetaigui so qagueta laue, nache ỹataqta nlaxatchigui naqa'en aso 'oonole ỹomaxaqui. 39Qalaxaye so Gedeón qaltaq 'enapeco':
«'Onaxaic da saishet da aỹem 'aualemataỹa 'Am Nataxala', cha'aye qaltaq 'am she'eguelaqot, qalaxaye sauotaique da qaltaq she'eguen ne'ena qagueta laue. Qaq nagui qalaq sauotaique da daqaqta qome ne'ena qagueta laue, nache nda'a't na 'alhua da ỹapapiaxatta qome ca 'aỹa.»
40Qaq nacheso se'eso pe da Ñim Lo'onatac 'Enauacna nache 'eetec de'era. Nache se'eso lỹa na'a'q se'eso qagueta laue nachesota da daqaqta, qaq na 'alhua qalaq nlaqaalec so 'aỹa.
