So Gedeón loxonec so madianiitapi
1Nache so Gedeón, maye le'enaxat nataqa'en da Yerubaal, qataq 'enauac so nnaictague'pi, no'ottasheguem co'ollaxa da yaqto' nqo'ona so saqaỹapeque yem huaña na npaxaatasheguem 'etaxat ye Jarod nache ỹanaña so lpe'lpi. Qaq so naña so lpe'lpi so madianiitapi, qalaq pa'aỹa'ague da sheu' yem huaña so ca'amegue maye hueto'ot so loigue añi lcomaraxalate More.
2Nache Ñim Nataxala' 'enapega so Gedeón, 'eeta':
«Ỹataqta ỹaguec nam 'annaictague'pi shiỹaxauapi, qaq qom sanem na Israel le'ecpi da loxonec ñaqa'en na madianiitapi, nache namayepi ishet qome da na'amaqten, nache ishet da 'eeta': ‹Qomi' maiche soxonaxanaq.› 3Qaq ỹoqo'oye qonapega qome namayepi, da huo'otaq huo'o ca lta'araic da lcolanaxa, nache no'on da ỹe'eguelaxa ca lma'.»
Qaq nache chegoqchiguiña añi qasoxonaxa Galaad da ỹe'eguelaq co'ollaxa so veintidós mil ỹalleppi, nache nda'a't so diez mil da no'onañipi.
4Qalaxaye Ñim Nataxala' qaltaq 'enapega somaye, 'eeta': «Ñaq 'eetalec da qalota nam 'analleppi. Qalaxaye 'auauega qome so tala da nỹom namayepi, yaqto' huaña qome da lleca'agui namayepi. Nache 'am sa'aqtaxanem negue't ca ishet da 'am ca'ategue qataq ca saishet da 'am ca'ategue.»
5Nache so Gedeón ỹauegaxasom so shiỹaxauapi da yaqto' nỹom 'etaxat. Huaña, nache Ñim Nataxala' 'enapega somaye, 'eeta': «'Auỹotauga qome 'enauac na napilectangui na 'etaxat 'eeta'am ca pioq da nỹomaxac, qataq 'auỹotauga 'enauac na ỹa'alyiñi naua l-llecte da nỹom.»
6Nache so 'eeta'am na pioq da nỹomaxac qataq so ỹauota'a na lhuaq da ỹemaxaña na 'etaxat, ivi' trescientos ye lcata, qaq so laỹepi qalaq 'enauac da ỹa'alyiñi naua l-llecte da nỹom. 7Nache Ñim Nataxala' 'enapega so Gedeón, 'eeta': «Ne'ena trescientos ỹalleppi maye napilectangui na 'etaxat da nỹom, nachena na so'ogoxona qome da qami' sesore'c, nache qami' sanema na madianiitapi da qoroxoñiqui. Qaq nam laỹepi, qalaq 'enauac qome da ỹe'eguelaq.»
8Nache so Gedeón ỹe'eguelaxat so laỹepi Israel le'ecpi da ỹe'eguelaxa so netaña so lpe'lpi, qalaxaye no'onaxatañi so trescientos da yaqto' nacheso so pa'aỹa'aguet da ỹache so nallec, qataq asom lasheerepi peenaq lcouepi.
Qaq so lanataqa' so madianiitapi, nache huaña so ca'amegue maye npa'aỹañi ye hueta'a so Gedeón.
9Nache se'eso pe Ñim Nataxala' 'enapega so Gedeón, 'eeta': «Qoñisheguem, nache 'anqo'ooña ye madianiitapi da yaqto' 'auloquiaxan, cha'aye aỹem 'am sanem da 'oxonec yemayepi. 10Qalaxaye da huo'o da 'ayi'iỹaxa da 'auloquiaxan, qaq no'on da hua'auñi da 'aunotec nache 'annaicapegue' ñi Purá maye 'aro'onataxanaxanec, 11nache 'ana'axaỹaxana cam na'aqtaxaatapigui yemayepi, huaña qome nache 'ana'añaxat da yaqto' 'auloquiaxan.»
Huaña nache so Gedeón huenoteeguesop som hueta'a lanataqa', nache nnaicapegue' so lo'onataxanaxanec Purá, nache ivildaua'a so lauanaxanaqa' so alleppi maye mpa'aguenaxauapi. 12Qaq so madianiitapi, qataq so amaleciitapi, qataq so shiỹaxauapi maye chegaqa'ague da pa'aỹa'ague da nala' lliguisheguem ỹataqta laguelec co'ollaxa se'eso ca'amegue, 'eeta'am aca qalota shiiquioxoipi. Qataq aso lalo cameellopi qalaq ỹataqta qalota, 'eeta'am na coma' lsoche maye huaña na loigue aso auaxai. 13Nache so Gedeón co'ollaq ivita so lpe'lpi som alleppi maye mpa'aguenaxauapi, nache hua'aqtegueua'a so 'oonolec ale da'aqtaxaatapeguem so lỹa, som lchoxonaxac somaye, 'eeta':
«Sechoxootega aso nauole chegaqaigui na cebada da coleetagui, naỹaña na qaranataqa', nache so nviyiñi nache tachigui so 'oonolec nam qarpe'lpi, nache ỹataqta ỹa'axasoxooñi.»
14Nache so lỹa 'enapeco':
«Se'eso nacheso so lainec ca Gedeón, cam llalec so Joás, maye Israel le'ec. Ñim Lo'onatac 'Enauacna ỹanem ca Gedeón da loxonec na madianiitapi qataq 'enauac na qaranataqa'.»
15Nache so Gedeón co'ollaq hua'aqchigui se'eso nchoxonaxac qataq da naigui, nache somaye ỹataqta ỹanot Ñim Nataxala' da llo'oxonnataxanaxac. Huaña, nache ỹe'eguelaxa so lanataqa' so Israel le'ecpi, nache 'enapega, 'eeta':
«¡Qoñiisheguem, qolaq cha'aye Ñim Nataxala' mashe qomi' ỹanema da qoroxonec ye madianiitapi.»
16Nache somaye sa naỹaloxon da iỹorecache so trescientos nalleppi, nache tres naqa'en soua lpa'axaco, nache ỹanem somayepi aso nasheerepi peenaq lcoue qataq aso qui'itchigui naco'oñapi 'alhua, nache ỹachaigui asomayepi asom ncoỹaraxanaqtepi 'ettaigui. 17Ime, nache 'enapega somayepi, 'eeta':
Qom mashe sevitaxa ye loigue ye lanataqa' ye qampa'aguenaxauapi, nache aỹem qauloichigui, qataq qaue'enaxachiichigui da qauo'oche cam so'ot qome. 18Nache aỹem qataq na ñenaictague'pi, qom sasheeraxagui ana peenaq lcouepi, nache nataqa'en qami' nam qoviita'alo loiguiye maye coleesop ye lanataqa' ye madianiitapi, qauasheeraxañiilec qome qataq qaua'alaqailec, qoñiita': ¡Souaqta'aguet Ñim Nataxala' qataq da Gedeón!
19Nache so Gedeón qataq som cien nalleppi maye nnaictague'pi co'ollaq ivita so loigue som nanataqa'pi, qaq mashe laiñi so pe co'ollaxa, qataq huaqchigui da nmena't so nauanaxanaxanecpi. Huaña, nache ỹashiiyigui aso lasheerepi peenaq lcoue qataq ilaxat asom naco'oñapi 'alhua maye ỹachetac, 20nache 'enauaque se'esoua tres lpa'axaco son alleppi, ỹataqta nalota't co'ollaq ỹashiiyigui aso lasheerepi, qataq ilaxat asom naco'oñapi. Qaq na ne'emaxashec lhuaq nasoqta'a aso lcoỹaraxanaqtepi, qaq na aloiguishec lhuaq qalaq nasoqta'a aso lasheerepi, nache ỹa'alaqtagui, 'eeta': «¡Seloquiaq! ¡Souaqta'aguet Ñim Nataxala' qataq da Gedeón!»
21Qalaxaye somayepi, nache sa iraxa'n co'ollaxa na hueta'alo. Nache so alleppi madianiitapi co'ollaq hua'axaỹa de'era na'alaxac, nache ỹataqta ỹe'elaxa't nache nataqa'en ỹa'alaq, qalaxaye nache datauec. 22Qaq se'eso trescientos Israel le'ecpi, nache quetot da ỹashettapigui aso lasheerepi peenaq lcouepi, nache Ñim Nataxala' ỹo'otec so madianiitapi da maiche taỹa't da nalaara't qataq datauec, nache taỹa ye Bet Sitá, qataq taỹa'a ye Sererá, maye loga't ye Abel Meholá maye huaqta'ai' ye Tabat.
23Huaña, nache qaiỹaxana so Israel le'ecpi maye chegoxoguetpi so Neftalí qataq so chegoxoguetpi so Aser qataq 'enauac so chegoxoguetpi so Manasés, da yaqto' icanapec so madianiitapi. 24Nache so Gedeón ỹauo'o so lamaxashecpi da nqo'ona ye 'alhuapi maye huaña aso qasoxonaxapi ye Efraín, nache 'enapega som ỹalleppi so maiche nhuo' le'ecpi da huenotec da delogui' so madianiitapi. Nache nauan so ñeguetapi so tala Bet Bará qataq so Jordán, co'ollaq saxanaxa da ivita yemaye.
Nache som chegoxoguetpi so Efraín, ỹo'ot de'era qaỹamaxalec, 25nache somayepi loxonqa soua Oreb qataq so Zeeb, maye lataxala'ate so madianiitapi. Nache so Oreb, qaỹalauat huaña añi coma' maye le'enaxat Oreb, qaq so Zeeb, qaỹalauat huaña qanqa'en yem no'onataqa' ana uva da qaỹo'ot na lataxa maye le'enaxat Zeeb, qaq co'ollaq ime da qaicaatac so madianiitapi, nache qaỹache so lqaic so Oreb qataq so Zeeb, nache qaira'a so Gedeón, maye hueta'atague da le'ego so tala Jordán.
