So saataxaqui maye chegaqaigui na lino
1Ñim Nataxala' aỹem 'enapega 'eeta': «Qojec qome nache 'ausheenaxana ca saataxaqui maye chegaqaigui na lino, ime nache 'ansaachigui, qalaxaye saishet da 'auỹo da 'auauota'a na 'etaxat.» 2Nache aỹem sesheenaxana so saataxaqui sepacchigui dam lamaxasoxonaxac Ñim Nataxala' qaq ime, nache ñesaachigui somaye. 3Qaq huaña, nache qaltaq aỹem 'enapega Ñim Nataxala', 'eeta': 4«'Auacona na saataxaqui maye 'ausheenaxana co'ollaxa, nam 'aỹa'aatañi, nache 'anqo'onaxaama so tala Éufrates, qaq nache 'auachaña yemaye da 'oxooñi, 'auachaigui ca lpoxoỹaxa ca coma'.» 5Qaq huaña nache aỹem ashec ñeqo'onaxaama so tala Éufrates, nache soxooñi som saataxaqui, sepacchigui da aỹem ỹamaxalec Ñim Nataxala'. 6Qaq co'ollaq mashe qaỹoqteguelo soua na'axa'te, nache Ñim Nataxala' aỹem 'enapega 'eeta': «'Anqo'onaxaama so tala Éufrates, nache 'ando'ota ca saataxaqui maye 'am samaxalec co'ollaxa da 'araxaama yemaye da 'ooxooñi.» 7Nache aỹem ashec ñeqo'onaxaama aso tala Éufrates, nache ñeqatsheguem so saataxaqui, sachegoxotchiguiña yem sachaña co'ollaq soxooñi, qalaxaye somaye mashe lto, nache saishet da ỹe'eguelaxa da qaiuen. 8Huaña, nache Ñim Nataxala' qaltaq ỹe'eguelaxalec da aỹem 'enapega, nache 'eeta': 9«Qaq nache sheetec qome de'era, qom selaxachigui da ño'oxonnaxac ye Judá qataq ye Jerusalén. 10Ne'ena nhuo' le'ecpi qauemaicpi, maye saishet da ỹalaxaguet nam ỹamaxasoxonaxacpi, qataq quetagueto naua qauema lhuennataxaco da lquiyaqteỹaxac. Namayepi quegue na ỹaqa'a atamnaxala'pi da do'onataxanot, qataq ỹo'oxoreetac. Nache 'eeta'am som saataxaqui maye saishet da qaltaq ỹe'eguelaxa da qaiuen. 11Qaq cha'aye dam 'eetec ca saataxaqui da ipataqta't na lasot ca shiỹaxaua, qaq nachera da sheetec co'ollaxa nam nhuo' Israel le'ecpi, qataq 'enauac na nhuo' le'ecpi ye Judá, da ỹataqta na'attaua'a Aỹem da yaqto' ỹalamaxatpi, qataq da ỹachaxan da ỹe'enaxat, qataq da chegoqchigui namayepi da huo'o naq 'enec qanqa'en Aỹem qataq da ỹo'oxoyec. Qalaxaye namayepi saishet da Aỹem ỹalaxaguet. Qaq 'era da ỹa'aqtac Aỹem Nataxala'.
Aso naco'oña 'alhua maye dolagui
12Qaq nataqa'en qonapega, qoneta': ‹Ñim Nataxala' maye Natamnaxala' na Israel le'ecpi, 'enapec: Camachaqaca naco'oña ishet da qanlaxatchigui na lataxa.› Qaq na Israel le'ecpi, 'am ỹasateguet qome, 'eeta': ‹Peta'a saisheto' da saỹatenaq da 'enauac ana naco'oñapi ishet da qanlaxatchigui na lataxa?› 13Qaq 'am 'auasateguet qome namayepi, qoneta': ‹Ñim Nataxala', 'enapec: Aỹem so'otec qome da taxaicpi 'enauac nam hueta'a ne'ena 'alhua, nam nta'alpi maye nso'ootangui añi nso'onaxaqui so David, qataq na ntaxaỹaxanaxanecpi, na na'aqtaxanaxanecpi qataq 'enauac nam hueta'a ye Jerusalén. 14Ime, nache selaxachigui qome namayepi, 'eeta'am ñaqa'en aca naco'oña, huaña nache ñi 'oonolec dataỹa'aguet ñi lỹa, nataqa'en na nta'alpi qataq ca ñalaqpi. Qaq Aỹem saishet qome da sechoxoreetac, qataq saishet da sechoxoreetac da selaxachigui. Qaq 'era da ỹa'aqtac Aỹem nataxala'.›»
Da qaivitaqteetega na Israel le'ecpi
15¡Qami' Israel le'ecpi, Ñim Nataxala' qami' detaqtacoto!
Saishet qome da qami' ño'oxonnaxaiqa, nacherata da qana'axaỹaxañiichiguiñi.
16Qavio'oxoyeñi qome Ñim Nataxala' maye Qanatamnaxala'ai,
qom saxanaxa da nvi' naqa'en ca napalaxa,
qataq da qaupogolaxañiitapiguiñi da qoquiitaigui ca napalñi.
Qaq qami' qauacheetaique cam yo'oqchiguiñi
qalaxaye Ñimaye nmeneguet qome naqa'en cam sansattec napalaxa
qataq ỹe'eguelaxa naqa'en da ỹataqta napalñi.
17Qalaxaye da saqaualaqai, nache aỹem sepa'axaatauo qome
da ñenoinaxac souaxat da qaño'oxonnaxaqui,
naua ỹa'ai'te qalaq huecolde'c qome naua ỹache',
cha'aye ana lalopi qaguetapi Ñim Nataxala', qaỹauec qome da qaicoñe'.
Da na'aqtac maye talec so nta'a
18«Qonapega qome ñi nta'a qataq añi nate'e, qoneta':
‹Qaunocheeguesop añi so'onaxaqui, nache qanso'oñiỹa'aguet na 'alhua,
cha'aye ana aro'o maye ỹo'oxoreetac na 'arqaic mashe naañi.›
19Na huaqta'a't nỹecpi maye ỹotta'a't naua nañalo ye Néguev
mashe qaicoleesop, nache qaica ca ishet da taua'a yemaye.
Qaq 'enauac na lma' ye Judá mashe qaỹauec da qaicoñe'.
20Ña qanamachiỹasheguem nache qauloiguet
nam chegaqa'ague da sheu'.
Qaq ¿hueta'ague aca qaguetapi maye 'am sanem co'ollaxa da 'aulo'ogue,
acam qaguetapi maye ỹo'ot da 'año'oxonnaxac?
Qaỹa'axata'a da ncoñetaguec so Israel le'ecpi
21Qaq ¿'eetec qome ca 'ara'aqtac 'am Jerusalén qom ivita da 'am ilo'ogue
nam shiỹaxauapi maye maiche 'arapaxaguenatacpi co'ollaxa?
Qaq 'am nvita qome ca 'anqui'ic maye 'eeta'am da nqui'ic
aca 'alo da deco'otapigui'.
22Qaq da 'aunataxan da ta'ainco' da 'am talec de'era,
qaq iuen da 'auaỹateeta da souaxat dam ỹataqta lta'araic 'arasouaxashet,
¡ỹoqo'oye 'am qansogoñi, qataq 'am qaỹe'en!
23¿Ca lairaxaic peta'a ishet da naralaxat da lo'oxoỹaxac?
¿ca quiyoc peta'a ishet da naralaxat da lchiỹaxataxa?
Qaq nache 'eeteque qami' da saishet da qauo'oche ca no'on,
cha'aye mashe qauanaiỹa'ac da qauo'ocheetac na qauem.
24Qaq ỹoqo'oye Aỹem qami' selagaxata'ape qome,
'eeta'am ñaqa'en ca 'auaqpi ltoxoic da ỹaỹoxonaqchet ca la'at
maye chegaqalec ye toolec 'alhua.
25Qaq 'era da 'aỹa'aguet 'am Israel, 'era da iuen da 'am so'otec.
Qaq 'era da ỹa'aqtac Aỹem Nataxala'.
Cha'aye Aỹem 'aucoua'ai, qataq 'aỹa'anot da
'ara'amaqtenaxanaxac nam saq 'en atamnaxala'pi.
26Qaq Aỹem nataqa'en ỹataqta 'am ñesochiguiñi qome
yaqto' 'am talec da lta'araic 'ara'agaxa.
27Aỹem sauaachigui da 'arapaxaỹaxa qataq da 'ancachaxac
qataq da 'arquisheguetaxac maye ỹo'ot da na'agaxa, qataq naua qauema
maye 'auo'o't da huaña ana lcomaraxalatepi qataq na no'onaxapi.
¡Qaq choxoraxaso' 'am Jerusalén! ¿Chaq laguio' qaq 'anqui'itaxat?»
