Da lasouaxashet qataq da nhuaxanaguec ye Judá
1«'Am Judá, da 'arasouaxashet nanettañi
qoỹeraxana so neraxanaxat lcat
qataq qoỹeraxana so shetteguet coma' le'enaxat diamante
da qoỹerelec añi qaramchigui 'arquiyaqte,
qataq naua lcoue añi 'arca'atoxonaxalate.
2Na 'aỹa'alaqpi qalaq tachigui lauel naxa ana nca'atoxonaxalatepi
qataq ana sa qaishetapec qo'oipaq lamopi, maye hueto'ot na la'a'
ana qalochiguiñi ana lcouepi qo'oipaqpi,
qataq ana qaỹoqotcheguemec lcomaraxalatepi,
3qataq ana qasoxonaxapi maye huetalec na no'onaxa.
Qaq souaxat na 'arasouaxashetpi, nache so'ot qome da qaicachiỹa
da 'arsallaxa qataq na no'on 'ogoxotpi
qataq qaỹacona nam hueta'a anam qaỹoqotcheguemecpi 'alhuapi
maye saq qaishetapec maye hueta'a 'enauac yem 'ana'alhua.
4Qaq 'am qoca'ai qome nam 'alhua maye
'am sanem co'ollaxa da 'aralamaxat,
nache so'ot da 'am l-lata na 'ampa'aguenaxauapi,
da qoueta'a cam 'alhua maye saishet da 'auauana,
cha'aye da ỹayeloxo 'eroigui, 'eeta'am ca norec da 'am ỹavigaxatta qome.»
Na laỹepi na'aqtacpi
5Ñim Nataxala', 'eeta':
«Ỹataqta qauem da talec cam ỹaxanec da lquiyaqteỹaxac aỹem,
ime nache ỹaalec da naquitaxac na ỹalleppi
qataq nache ipa'axaatacot ca ntaunaguec namayepi.
6Qaq camaye, 'eeta'am aca qo'oipaqole ỹaxataxarai
maye huetalec ca toolec 'alhua, da saỹauano' da qailo'ogue,
qataq ñaxattaigui na coma', qataq na 'alhua maye 'euaxaic maye qaica ca netalec.
7Qalaxaye no'on ca talec ca ỹale maye Aỹem pi'iỹa'a,
qataq Aỹem ỹacheto'ot da naquitaxac.
8Qaq camaye, 'eeta'am qome aca qo'oipaq maye neto'ot na loigue ca tala,
maye naua lpa'aye qalaq iviraugalo ca la'auaxac,
qaq saishet da ñe'etac da nvi' naua nta'api,
cha'aye ana lcouepi nache 'eetai' da ỹataqta napal.
Da ivita da deqaqa ana 'alhua qalaq saishet da leetapigui ye lauel
qataq saishet da vi'iiguet da alaỹaxac.
9Qaica ca ỹactec da tenataxanaxaic qataq qauemaic da,
'eeta'am añi lquiyaqte ca shiỹaxaua.
¿Qaq negue't ca ishet da ỹaỹaten?
10Aỹem Nataxala', maye ñimit aca nquiyaqte
qaq saỹaten yem ỹataqta pa'auo lhuennataxac,
nache sanem cam taiguet da ỹaconeguet,
ipacchigui cam naigui nam ỹo'otpi.»
11Qaq cam desalligui da lcachaxac nache camaye
'eeta'am ca dachemi da nqapaxaaleguete caua saishet da lco'oue'ete.
Nache da laiñi da nachaalataxac, nache da deqat 'enauac da lsallaxa,
ime nache ivitta'a da 'eeta'am ca qaica ca ỹaỹaanapec.
12Nache aỹem Jeremías sheeta':
Añi qanatamnaxaqui añimaye ỹataqta huo'o da llo'oxoyec,
añimaye nache 'eetai' co'ollaxa da qaỹoqotcheguemec.
13'Am Nataxala', nache 'am da 'am hueto'ot da naquitaxac na Israel le'ecpi.
Qaq 'enauac qome nam 'am ca'ai huo'o da la'agaxa.
'Enauac qome nam 'am ca'ai, namayepi deqat qome
'eeta'am ca nerec maye qoỹettalec ca namoxoỹaxa,
souaxat da 'am ỹalat, 'Am maye qoneta'am ca atom mpa'axaatasheguem 'etaxat.
So Jeremías iỹaxanot Ñim Nataxala'
14Aỹem 'anataren, 'Am Nataxala', nache aỹem no'oita qome,
aỹem 'anca'alaxatec, nache aỹem ñeca'alec qome,
cha'aye nache 'amta da 'am sho'oxoreetac.
15Na shiỹaxauapi aỹem 'eetega, 'eeta': «¿Cam hueta'ague cam la'aqtac Ñim Nataxala'?
¡No'on da ipacchigui nagui!»
16Qalaxaye aỹem saishet da 'am sequicto'ot
da 'anamaxa namayepi ca qauem,
qataq saishet da sayeetaique da 'anamaxa namayepi ca qauem,
qaq 'am 'auaỹateeta dam ỹa'aqtac co'ollaxa,
cha'aye damaye ñasaxauec co'ollaq 'am satato'ot.
17Saishet qome da aỹem 'anlaxatchigui da icolanaxa,
cha'aye nache 'am maye 'am ỹe'eguenaxala' naxa da huo'o ye lchec.
18'Auauo'o qome la'aloxo nam aỹem icaatacpi,
qalaxaye saishet da aỹem da 'auauo'o da ỹa'aloxo.
Namayepi 'auauo'o qome da lli'iỹaxa
qalaxaye saishet da aỹem da 'auo'ot ca ỹi'iỹaxa.
Ñaq 'auanacot qome ca naquicoxo da talec 'anqa'en namayepi,
nache ỹataqta imauec qome da 'anlaxaañi namayepi.
Ye na'a'q mataxaqui
19Ñim Nataxala' aỹem 'enapega, 'eeta': «qojec qome, nache 'anachattañi qome qoueta'a ñi lasom lta'araic yem huaqta'a't nỹecpi maye tateua'a da pa'auo qataq inoxonec na nta'alpi ye Judá, qaq qom ime nache nataqa'en qonetec de'era da huaña na laỹepi lasompi ye Jerusalén. 20Nache qonapega na shiỹaxauapi, qoneta': ‹Qami' nta'alpi qataq 'enauac qami' nhuo' le'ecpi qoviita'a na Judá, qataq 'enauac qami' maye qoviita'a na Jerusalén maye qa'aiteua'a naxa ne'ena lasompi, ñaq qana'axaỹaxañiỹa da la'aqtac Ñim Nataxala'. 21Ñim Nataxala' 'enapec: Qanchilỹañi qome da saishet da qauachiitac ca qaya'aqui ye na'a'q mataxaqui, qataq saishet da tateua'a qanqa'eñi na lasompi na Jerusalén ca qaya'aqui. 22Qataq saishet da qauachegoxochiỹaigui ca qarmaye da qanqachiiuec ca qaya'aqui ye na'a'q mataxaqui, qataq saishet da huetoigui qanqa'eñi yemaye da qauo'oche ca qaro'onataqui. Qauỹochiỹauga qome da ỹalamaxat ye na'a'q mataxaqui, ipacchigui qome dam samaxalec co'ollaxa so hua'au qarta'ailpi. 23Qalaxaye somayepi saishet co'ollaxa da Aỹem qocha'a qataq saishet da Aỹem ỹalaxaguet, nacherata da queto'ot da sana'axaỹaxan, qataq saishet da ỹalaq da qanqanaxattac.
24Qaq Aỹem Nataxala', 'eeta' da ỹa'aqtac: Ỹataqta aỹem qaualaqaiguet qome, saishet da qauachiitac ca qaya'aqui da qa'aitoigui na lasompi na huaqta'a't nỹecpi ye na'a'q mataxaqui, qauỹochiỹauga qome da ỹalamaxat ye na'a'q mataxaqui, qataq saishet da huetoigui qanqa'eñi yemaye da qauo'oche ca qaro'onataqui. 25Qaq da qoñiitec de'era, qalaq nache 'eetai' qome da huo'o ca nta'alpi da nso'ongui añi nso'onaxaqui so David, qataq da tatoigui ne'ena lasompi ne'ena huaqta'a't nỹecpi, huota'a ana naigonapi, qataq na caipi, nnaictague' na lataxala'pi, qataq na shiỹaxauapi lma' ye Judá, qataq ye Jerusalén. Qaq ye Jerusalén nache 'eetai' qome da huo'o na hueta'a shiỹaxauapi. 26Qaq anac qome na shiỹaxauapi maye hueta'a na huaqta'a't nỹecpi maye ỹotta'a't naua nañalo na Judá maye hueta'alo naua loiguiye na Jerusalén, qataq nam chegaqa'a yem na'alhua so Benjamím, qataq nam chegaqa'a yem ca'amapega't 'alhua, qataq nam chegaqa'a na huaña ana qasoxonaxapi, qataq nam chegaqa'a ye Néguev. Qaq nachetac qome na shiguiỹacpi da yaqto' ỹaneua'a añi atamnaxaqui da lachetaqtaxanaqte qaỹavigaxatta, qataq na laỹepi lachetaqtaxanaxatpi, anam ala na lañiguishec, qataq na nchenaxanaxat maye ama na laita, qataq ana lachetaqtaxanaqtepi da ỹan da na'achecỹaxac. 27Qalaxaye qami' da saqaualaqaiguet na ỹamaxasoxonaxacpi, da qauỹochiỹauga da ỹalamaxat ye na'a'q mataxaqui, qataq da qauachiitac na qaya'aqui na qa'aitoigui na lasompi na Jerusalén, nache Aỹem sauo'o qome ca norec huetoigui na lasompi na huaqta'a't nỹecpi, cam norec maye ilaxachigui qome na nma' lta'araicpi na Jerusalén, nache qaica qome ca ishet da ỹalamat.›»
