1Ñim Nataxala' aỹem 'enapega, 'eeta': «Qojec qome nache 'ausheenaxana aca naco'oña 'alhua, nache 'auauo'oi caua 'auỹaxanalo nam nqueroxonecpi maye lataxala' ne'ena nhuo' le'ecpi qataq caua ntaxaỹaxanaxanaqa maye mashe ỹe'. 2Qaq ime, nache 'anqo'oneuga so ca'amegue ye Ben Jinón, maye datateguet ñim lasom maye pa'aigue da nala' lliguisheguem, qaq huaña qome yemaye, nache 'aua'axat da ỹa'aqtac maye 'am sa'axatem qome. 3Nache qoneta': ‹Qami' nta'alpi na Judá, qataq qami' maye qoviita'a na Jerusalén, qana'axaỹaxañiỹa de'era la'aqtac Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi, 'eeta': Aỹem ñamaxa qome ca ỹataqta lta'araic lchec ne'ena nma', qaq 'enauac qome cam hua'axaỹa da qaỹa'axat camaye, nache dauaxanguilo naua ltela lauaco. 4Cha'aye na Israel le'ecpi aỹem ca'ai, nache ỹo'ot da 'eco' ỹaqa'a ne'ena 'alhua, nache huaña naqa'en namaye da ỹanot na lchenaxanaxat maye ama na laita nam ỹaqa'a atamnaxala'pi, maye namayepi qataq so hua'au lta'alpi, qataq so nta'alpi na Judá, saỹauatton, qataq nlaxattelec namaye na ltago'q som shiỹaxauapi maye qaica ca ỹasouaxat. 5Qataq nataqa'en no'oxoosheguem ana lca'atoxonaxalatepi da yaqto' ỹavigaxat na llalaqpi da ỹanot so Baal, dam saishet co'ollaxa da samaxasoxoolec qataq saishet da choche shenapec, qataq saishet da tatapigui iuel. 6Qaq ỹoqo'oye anacte' caua na'axa'te maye huaiguilo da ne'ena 'alhua saishet qome da le'enaxat Tófet, qataq saishet da le'enaxat da Ca'amegue Ben Jinón, nacherata da le'enaxat qome, Ca'amegue Nalaataxanqa'.› Qaq 'era da ỹa'aqtac, Aỹem Nataxala'. 7Qaq huaña qome ne'ena da ñelaxaañi nam lapaxañipi nam lma' ye Judá qataq ye Jerusalén. Qataq so'ot qome da na mpa'aguenaxauapi loxonec namayepi, nache ỹalauat, qaq da lo'ocỹaxac namayepi qalaq chec qome na teguesanpi qataq na huauec shiguiỹacpi. 8Nache she'eguelaxata qome da toolec ñaqa'en ne'ena huaqta'a't nỹecpi, qataq da ỹo'ot da ncolanaxa. Qaq 'enauac qome nam taalec namaye, huo'o da lcolanaxa qataq da la'aalaxa souaxat da ila'a da ỹataqta imauec nlachiguiñi. 9Qataq so'ot qome da na shiỹaxauapi maiche chec na llalaqpi ỹalleppi qataq ana llalepi 'alpi, qataq ñi 'oonolec chec ca maiche lỹa, souaxat dam huaigui lhuogoxo maye ỹo'otec nam mpa'aguenaxauapi qom coleesop nam huaqta'a't nỹecpi. 10Qaq qom ime da qonapec de'era, nache 'aulaxachigui aca naco'oña 'alhua ỹauaachigui 'anqa'en cam ỹalleppi maye 'annaictague', 11nache qonapega, qoneta': ‹Ñim Nataxala' maye Qaica ca Ỹaqalanapec, 'eeta': Aỹem selaxachigui qome ne'ena nhuo' le'ecpi, qataq ne'ena huaqta'a't nỹecpi, 'eeta'am ca ilaxachigui aca naco'oña 'alhua, nache saishet da qaltaq qaỹe'eguelaxara't. Na shiỹaxauapi ilayiña qome ye Tófet ca leuaxaicpi, souaxat mashe qaica ca ldaqa' da qailareñi. 12Qaq 'era da so'otec qome ne'ena huaqta'a't nỹecpi qataq nam shiỹaxauapi maye hueta'a namaye. 'Eeta'am ñaqa'en da sheetec co'ollaxa ye Tófet. Qaq 'era da ỹa'aqtac Aỹem Nataxala'. 13Na nỹecpi na Jerusalén, qataq na lta'araic lma'pi na nta'alpi ye Judá, qataq na l-laq na nỹecpi maye huaña naxa da qaỹauo'o na nchenaxanaxat da qoỹanot ana huaqaañipi qataq da qaicorec na lataxa da nachetaqtaxanaxat da qoỹanot na laỹepi atamnaxala'pi, namayepi qaỹamata'ac qome da nshepaxan, 'eeta'am ye Tófet.›»
14Qaq co'ollaq ime de'era, nache so Jeremías ca'ai ye Tófet, maye Ñim Nataxala' ỹamaxa co'ollaxa da ỹa'axat da le'enaxat Ñimaye, nache co'ollaq ivita so nqasoxoc aso atamnaxaqui, nache nachaañi da da'aqtaxanem 'enauac so nhuo' le'ecpi, 'eeta': 15«Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi, 'enapec: ‹Aỹem ñamaxa qome ne'ena huaqta'a't nỹecpi, qataq 'enauac nam netalec ne'ena 'alhua, cam nhuaxanaguec maye sa'axatta'a co'ollaxa, cha'aye namayepi ỹacona da qaramchigui da yaqto' saỹalaxagueta naua ỹa'aqtaqa.›»
