Aso lere so Jeremías maye taỹa'a so qaỹauecpi co'ollaxa
1'Ana ana lere so na'aqtaxanaxanec Jeremías maye ỹamaq co'ollaxa chegoqchiguiña ye Jerusalén da taỹa'a naqa'en so nqueroxonecpi maye qaỹauega co'ollaxa ca ỹaqa'a 'alhua qataq so ntaxaỹaxanaxanecpi qataq so na'aqtaxanaxanecpi, qataq 'enauac so nhuo' le'ecpi maye so Nabucodonosor ỹauec co'ollaxa ỹachegoxotchiguiña ye Jerusalén, da ỹauega ye Babilonia. 2Qaq de'era huetoigui co'ollaq ime da so nta'a Jeconías ca'ai ye Jerusalén lỹatec aso nate'e, qataq so ilotague' so nma' lta'araic, qataq so nataxala'pi ye Judá qataq ye Jerusalén, nataqa'en so ne'enaqtac lo'opi, qataq so lcat lo'opi. 3Qaq asa'aso nere ỹache qanqa'en so Elasa som llalec so Safán qataq so Gemarías som llalec so Hilcías, soua ỹama'q co'ollaxa so Sedequías maye nta'a ye Judá, da ỹamaxaregue da Babilonia da yaqto' nqo'ooreua'a so nta'a Nabucodonosor. Qaq aso nere da huetalec, 'eeta':
4Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi, maye ỹauec co'ollaxa 'enauac nam Jerusalén le'ecpi da ỹauega ye Babilonia, 'eeta': 5«Qauo'oche qome ca qarma'aipi, nache qoñiỹaigui, qataq qaỹa'añiiñi ana qo'oipaqpi maye huo'o ana ala, nache qollequiitac qome. 6Qataq qauaroñi yaqto' huo'o ca qaỹa'alquipi ỹalleppi qataq 'alpi, qataq camayepi huaron qome da yaqto' huo'o ca llalaqpi. Qanquiquiitauec qome da qoviita'a yemaye, qaq saishet qome da qanquiquiitañi. 7Qataq qauo'onataxañi da yaqto' qautauañi nam huaqta'a't nỹecpi maye qami' sauegalo co'ollaxa, qataq Aỹem qauỹaxañiỹot da qauỹaxañiilec namaye, cha'aye da l-lagaxayec namaye nache chegoqchigui da qal-lagaxayequi. 8Aỹem Nataxala' maye Qaica ca Seqalanapec, maye Natamnaxala' na Israel le'ecpi, qami' sevitaqna'alo da 'eeta': Saishet qome da qauaqaita'a da qami' ỹatenache't na na'aqtaxanaxanecpi qataq na ilaviigui ca lỹa maye qami' ỹalectaiguilo, qataq saishet qome da qauqocheetegalo naua lchoxonaxaco namayepi. 9Nam ỹa'axattac namayepi maye 'eetega ỹa'aqtaxanaxac namayepi choche natenataxanaxac. Aỹem saishet da ỹamaxashecpi namayepi. Qaq 'era da ỹa'aqtac Aỹem Nataxala'.
10Ñim Nataxala', 'eeta': ‹Qom ivi' caua setenta vi'iye da qoviita'a ye babilonia, nache Aỹem qami' setaua'n qome, nache sepaqueelec dam sachaxanapec co'ollaxa da qami' ñe'eguelaxatalo nam maiche qarmaye. 11Cha'aye Aỹem saỹateeta nam llapaqtañepi maye huotaique da qami' so'oteque, nam llapaqtañepi maye no'on qaq saishet da qauem da yaqto' qami' sanema cam ñaq natauo maye nlaqchigui da aquitaxac. Qaq 'era da ỹa'aqtac Aỹem Nataxala'. 12Qaq huaña qome, nache Aỹem qauỹaxañiỹot qataq Aỹem qauanaiua'a da qanatamñi, nache Aỹem qami' sa'axaỹalo qome. 13Qataq Aỹem qanmichiỹaique qome, nache Aỹem qauanachiỹa, cha'aye imauec qome da qarquiyateỹaxaqui da Aỹem qanmichiitaique. 14Aja', Aỹem qami' sa'aqta'alo qome da Aỹem qauanachiỹa qataq so'ot da dalaxaic ca qana'achecỹaxaqui: qami' ñeqateeguesopa qome 'enauac na ỹotta'a't shiỹaxauapi qataq 'enauac nam 'alhuapi maye qami' selagaxaaleguete co'ollaxa, qataq qami' llaỹona't nache so'ot da qañe'eguelaqỹa ne'ena 'alhua maye qami' sachegoxotteleguete co'ollaq qami' saue'c. Qaq 'era da ỹa'aqtac Aỹem Nataxala'.›»
15Qaq qami' qoñiỹapec naxa: Ñim nataxala' qomi' ỹanema na na'aqtaxanaxanecpi ne'ena souaqta'a Babilonia. 16Qalaxaye Ñim Nataxala' da detaxaỹa ñi nta'a maye nso'ootangui añi nso'onaxaqui so David, qataq da detaxaỹa nam nhuo' le'ecpi maye netaigui ne'ena huaqta'a't nỹecpi, nam qarhuo'oi le'ecpi maye saishet da qarỹaitec co'ollaq qami' qaỹauec, 'enapec: 17«Aỹem Nataxala' maye Qaica ca Seqalanapec, 'eeta' da ỹa'aqtac: Aỹem qami' ñamaxalo qome ca alaataxac, nqouaxa qataq ca napiina. Nache qami' so'oteque da qoñeeta'am aca higo nchegueraxai, qaq souaxat da ỹataqta qauem nache saishet da qanallec. 18Aỹem qami' secana'ape qome qami' seroleguete ca alaataxac, nqouaxa qataq ca napiina. Nache qami' so'oteque da 'enauac na ỹotta'a't shiỹaxauapi da qami' deqaigalo da qami' ilota'alo, qataq qami' so'oteque da qami' naloqnaxanaqa'ate da qauem qataq da na'agaxa qataq cam qaiqaiga qataq ca ỹo'ot da ne'elaxa maye huetalec 'enauac nam ỹotta'a't shiỹaxauapi maye qami' selagaxaaleguete co'ollaxa. 19Cha'aye saishet da qaualaqaiguet dam ivitaqtaxanaxac maye qami' sanema co'ollaxa chegoqchigui ñaqa'en som ỹamaxashecpi maye ỹa'aqtaxanaxanecpi, maye qalota naxa da qami' ñamaxalo qalaxaye qami' saishet da qana'axaỹaxañiỹa. Qaq 'era da ỹa'aqtac Aỹem Nataxala'. 20Qaq qaualaqaigueta qome naua ỹa'aqtaqa 'enauac qami', maye qami' ñeqateeguesopa co'ollaxa na Jerusalén da qami' sauegalo ye Babilonia.
21Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi 'eeta' da la'aqtac maye taalec so Ahab maye llalec so Colaías qataq so Sedequías maye llalec so Maseías maye qami' ỹa'axattapeguema nam saq'enpi da 'eetega ỹachegoxotchigui da ỹe'enaxat: Aỹem saneguet qome da lhuaqỹaxac ñi nta'a Nabucodonosor maye lma' ye Babilonia, nache ñimaye qauauañiichigui naqa'en qom ỹalaua't. 22Yaqto' nam qanqateeguesop co'ollaxa ye Judá maye netaña nagui ye Babilonia da huo'o ca ỹasaxalec ca qauem la'aqtac ca lỹa qalaq, 'eeta': Ñim Nataxala', 'am ỹo'otec qome ca 'eeta'am dam ỹo'otec co'ollaxa soua Sedequías qataq so Ahab, maye ñi nta'a ye Babilonia ỹauo't co'ollaxa. 23Cha'aye soomaye ỹo'o't co'ollaxa da ỹataqta qauem da huaña na Israel: ncachetague' ana lhuapi nam lqaỹañecpi, qataq ỹachegoxotchigui da ỹe'enaxat da ỹa'axat nam saq'enpi maye saishet da samaxalec da ỹa'axat. Aỹem saỹateeta damaye, cha'aye sauaachigui. Qaq 'era da ỹa'aqtac Aỹem Nataxala'.»
Na'aqtac maye taỹa'a so Semaías
24Ñim Nataxala' ỹamaq so Jeremías da yaqto' 'enapega so Semaías maye lma' ye Nejelán, 'eeta': 25«Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi, 'eeta': 'Am nache 'ananettalec co'ollaxa aso 'ere da 'auamaxa 'enauac na shiỹaxauapi maye hueta'a ye Jerusalén, qataq so ntaxaỹaxanaxanec Sofonías som llalec so Maseías qataq 'enauac so laỹepi ntaxaỹaxanaxanecpi. Qaq so huetalec aso nere maye taỹa'a so Sofonías 'eeta': 26Ñim Nataxala', 'am ỹanagui da 'am ntaxaỹaxanaxanec da 'anmeneguet so Joiadá, da yaqto' 'aulo'ogue añi atamnaxaqui. Qaq da huo'otaq huo'o ca nvireuo maye huo'o da aloic, nache da da'aqtaxan da 'eetega na'aqtaxanaxanec, nache 'am iuen da 'aỹa'anagui camaye ca ncoñetaxanaxaqui 'epaq qataq 'aucoñerai' 'auauota'a ca ncoñetaxanaxat lcat. 27¿Qalaq ta'ainco' da saishet co'ollaxa da 'anlaxa so Jeremías maye lma' ye Anatot, maye qami' nachattaua'alo co'ollaxa da da'aqtaxaatac da 'eetega na'aqtaxanaxanec? 28Qataq ivira'a da namaxague na Babilonia aso lere da qomi' namaxalo, maye huetalec da 'eetega qaỹoqtec qome da souaqta'a ne'ena, qataq qomi' 'eetegalo da ño'oxonaxasheguem ca qarma'pi nache sonaqaigui, qataq sanaxañi ana qo'oipaq da yaqto' sacheguenaqtac ana ala.»
29Nache so ntaxaỹaxanaxanec Sofonías itaxaỹaxan co'ollaxa asa'aso nere hua'aqchigui naqa'en so Jeremías. 30Nache Ñim Nataxala' ỹanem so la'aqtac so na'aqtaxanaxanec nache, 'eeta': 31«'Auamaxa qome ca 'ara'aqtac 'enauac cam qaỹauega co'ollaxa ye Babilonia, da Aỹem Nataxala', 'eeta' da ỹa'aqtac: Qaq cha'aye souaxat ñi Semaías maye lma' ye Nejelán, maye saishet da ỹamaxashec qalaq ñimaye ỹachegoxotchigui naxa da ỹe'enaxat nam qami' ỹa'axattapeguema, qataq ỹo'ot da qanaquitaxaqui maye saq'en. 32Qaq Aỹem Nataxala', shenapec, sauo'o qome ca nhuaxanaguec ñi Semaías, qataq cam chegoxoguetpi ñimaye. Ñimaye qaica qome ca llalaqpi da ỹalectaigui nam ỹalamaxat nhuo' le'ecpi, qataq saishet qome da ỹaconeguet ca namaicỹaxac maye so'otec qome nam ỹalamaxat nhuo' le'ecpi, cha'aye naua la'aqtaqa ñimaye ỹaueegueta da Aỹem dataỹa'aguet. Qaq 'era da ỹa'aqtac Aỹem Nataxala' 'era da ỹa'aqtac.»
