Qaỹa'axata'a da qaltaq nauaqsheguem ye Jerusalén
1Qaq co'ollaq ñaq qaicoñettai' so Jeremías hueta'a ye nqasoxoc aso ncoñetaxanaxaqui, nache Ñim Nataxala' qaltaq detaxaỹot somaye, nache 'enapega, 'eeta': 2«Aỹem Nataxala' maye ỹo'onata ana 'alhua, qataq so'ot co'ollaxa da lataxac, qataq saỹamaxatchiguiñi co'ollaq sanaña ye lma', 'am shenapega: 3Aỹem 'aỹaxana qome, nache Aỹem 'am sasateguet, nache 'am sa'axatem cam lataxac maye ỹataqta lta'araic, qataq saqcha'a maye 'am sa 'auaỹaten. 4Cha'aye Aỹem Nataxala' qataq Natamnaxala' na Israel le'ecpi, huo'o da ỹa'aqtaxanaxac da sa'axat na nỹecpi na Jerusalén qataq na lma'pi na nta'alpi ye Judá da taỹa'a qome da qaỹamaxañi qaỹauota'a na qo'oipaq lta'araic qataq ana qachepe. 5Na Babilonia le'ecpi anac da yaqto' iloquiaxan na huaqta'a't nỹecpi nache nlaxatchigui namaye na leuaxaicpi. Qaq souaxat da ỹayeloxo qataq da inogoxonaxac, nache saishet da selogui ne'ena huaqta'a't nỹecpi, qaq seque'emaqchet namayepi souaxat 'enauac nam ỹo'otpi maye qauem. 6Qalaxaye ñataren qome qataq sanem da no'oita, nache so'otec da huetaigui da nlagaxayec qataq da qaica ca ndaqtaique. 7Qaq ñaralaxat qome da na'achecỹaxac na Judá qataq na Israel, qataq she'eguelaxata da nauaqsheguem ñaqa'en, da yaqto' ỹe'eguelaxa da 'eeta'am so hua'auchiguiñi lataxac. 8Qataq seỹouec 'enauac na lasouaxashetpi maye ỹo'ot co'ollaxa da aỹem dataỹa'aguet, qataq sapalaxat 'enauac nam qauempi maye ỹo'ot co'ollaxa namayepi nam chegoqchigui co'ollaxa da Aỹem saỹalaxaguet. 9Ye Jerusalén, yemaye ỹo'ot qome da ỹamaicỹaxac, da shenec qataq da ỹo'oxoyec, qom imeteetac yemaye nam ỹotta'a't shiỹaxauapi ana 'alhua. Qaq nam ỹotta'a't shiỹaxauapi qom hua'aqtega da qaỹa'axattac da no'on maye talec ñaqa'en na lma' ye Jerusalén, qataq da nquictasheguem da qaica ca iuena'a, nache namayepi ỹataqta iviloxol qome souaxat da lli'iỹaxa. 10Ñim Nataxala', 'eeta': Qami' maye qoñeetega toolec ne'ena nma', qataq qoñeetega qaica ca shiỹaxauapi qataq shiguiỹacpi, qataq na nqa'aicpi na Jerusalén, qataq na huaqta'a't nỹecpi maye ỹotta'a't naua nañalo na Judá tooleguete; qataq qaica ca hueta'a shiỹaxauapi qataq shiguiỹacpi. Qalaxaye namaye ỹe'eguelaxa qome da qaỹa'axaỹa, 11ca no'onec da huo'o ca na'ashaxac, qataq namaicỹaxac, qataq ca no'onec da qaỹo'onaxaaleguete caua auonaxau', qataq qaỹa'aqtega qome dam 'eeta': Qaỹa'añiỹot da qana'achecỹaxaqui Ñim Nataxala' maye Qaica ca Ỹaqalanapec, cha'aye Ñimaye ỹataqta soxoraic, cha'aye da lsoxoyec chochaq tatec. Qataq qandoua'a qome añi atamnaxaqui aca nachetaqtaxanaqte souaxat da tonaxac. Aja', Aỹem ñaralaxat qome da na'achecỹaxac ne'ena 'alhua, yaqto' ỹe'eguelaxa da 'eeta'am som hua'auchiguiñi co'ollaxa lataxac. Qaq 'era da ỹa'aqtac Aỹem Nataxala'.
12Ñim Nataxala' maye qaica ca Ỹaqalanapec, 'eeta': Ne'ena 'alhua maye toolec nagui, qaica ca ỹale qataq ca shiguiỹacpi, qataq 'enauac nam lalamaxat huaqta'a't nỹecpi maye ỹotta'a't na nañalo, namayepi ỹe'eguelaxa qome da huo'o na 'auaqpi, maye na qagueta lo'opi ỹauega qome ana lalo qaguetapi. 13Qaq nataqa'en nam huaqta'a't nỹecpi maye ỹotta'a't naua nañalo maye netalec ana qasoxonaxapi, qataq nam netaña na ca'ameguepi, qataq nam netalec yem 'alhua Néguev, qataq ye na'alhua so Benjamín, qataq 'enauac nam coleesop na Jerusalén, qataq na laỹepi huaqta'a't nỹecpi ye Judá, ỹe'eguelaxa qome da qailota'a ca qagueta lo'opi da naloqteetac aca lalo qaguetapi. Qaq 'era da ỹa'aqtac Aỹem Nataxala'. 14Ñim Nataxala', 'enapec: Anacte' caua na'axa'te maye huaiguilo qome da sepacchigui dam no'on maye sachaxanapecot co'ollaxa na nhuo' Israel le'ecpi qataq na Judá le'ecpi. 15Qom ivita que'eca laloxoqui, qataq que'eca na'a'q, nache so'ot qome da so David huo'o ca chegoxoguet maye ỹataqta lalamaxat llalec, camaye nacheca qome ca lapaxañi da nalochiguiñi, qataq da ỹataqta no'on lataxac ne'ena 'alhua. 16Qaq que'eca na'a'q, na Judá nca'alec qome, qaq na Jerusalén qalaq qaica qome ca iraxaatapigui'. Qaq 'era qome da le'enaxat da qaiỹaxana: ‹Ñim Nataxala' nacheñi Ñim qarauegaxanaxac.› 17Aỹem Nataxala', shenapec: nam chegoxoguetpi so David, qaica qome ca sa nso'ongui añi nso'onaxaqui somaye, 18qataq nam ntaxaỹaxanaxanecpi maye chegoxoguetpi so Leví, qaica qome ca saq aỹem ỹaatacot 'enauaque naua na'axa'te ana nachetaqtaxanaqtepi maye qaỹavigaxatta, qataq da ỹavigaxat ana nachetaqtaxanaqte nañiguishe ala, qataq da aỹem ỹanot ana laỹepi nachetaqtaxanaqtepi da Aỹem ỹo'oxoren.»
19Ñim Nataxala', 'enapega so Jeremías, 'eeta': 20«Aỹem Nataxala', shenapec: Ỹataqta saishet qome da saipaigui da ñaỹamaxataxac maye so'otec co'ollaxa ye na'a'q qataq ye pe, qaq ỹoqo'oye, ye na'a'q qataq ye pe, saishet da saipaigui yem laloxoqui. 21Qaq nache 'eetec nataqa'en, da saishet da saipaigui dam ñaỹamaxataxac maye so'ot co'ollaq ñaỹamaxate' so ỹamaxashec David, qataq nam chegoxoguetpi qaica ca sa nso'ongui añi nso'onaxaqui somaye, huo'otaq da saipaigui da ñaỹamaxataxac co'ollaq ñaỹamaxate' nam ỹo'onataxanaxanecpi ntaxaỹaxanaxanecpi maye chegoxoguetpi so Leví. 22Qaq nam chegoxoguetpi som ỹamaxashec David, qataq nam ỹamaxashecpi maye chegoxoguet so Leví, so'ot da ỹataqta qalota qome namayepi, 'eeta'am ana huaqaañi maye hueto'ot na piguem, qataq 'eeta'am na delec maye hueto'ot na loigue aso auaxai, da qaica ca ishet da naloqten.»
23Ñim Nataxala', 'enapega so Jeremías, 'eeta': 24«¿Saishet peta'a da 'ananoma, da na shiỹaxauapi 'eetega sasaỹamaxare'n ne'enaua dos na nhuo' le'ecpi, Israel qataq Judá, maye Aỹem maiche lleca'agui'she co'ollaxa? ¡Qaq ỹoqo'oye da qailota'a ne'ena ỹalamaxat nhuo' le'ecpi, nache ỹataqta qaiqaiga, qataq saishet da qaỹamata'ac nhuo' le'ecpi! 25Qaq Aỹem Nataxala', shenapec: Aỹem maye so'ot so ñaỹamaxataxac co'ollaq ñaỹamaxate' ye na'a'q qataq ye pe, qataq llapaxañi nam lataxacpi da llecỹaxac na piguem qataq na 'alhua, 26saishet da sasaỹamaxaren qome nam chegoxoguetpi so Jacob qataq so David maye ỹamaxashec, qataq saishet da saxaañi da sachegoxotaigui namayepi cam ilo'ogue nam chegoxoguetpi so Abraham, Isaac qataq so Jacob. Cha'aye Aỹem huo'o da ichoxonnataxanaxa namayepi, nache so'ot qome da dalaxaic ca na'achecỹaxac.»
