So Jeremías qataq so recabitapi
1Qaq huetoigui som na'a'q co'ollaq so Joaquím, som llalec so Josías da nta'a ye Judá, nache Ñim Nataxala' aỹem detaxaỹot, 'eeta': 2«'Anqo'ona qome ye lma' na recabitapi, nache 'autaxaỹapegue' qome yemayepi. Ime, nache 'auauegueua'a ca 'oonolec na ndaqa'pi añi atamnaxaqui, nache 'aỹa'anem ca lataxa da yaqto' nỹomgui.» 3Nache aỹem Jeremías, ashec da she'eguena'a so Jazanías, som llalec so ỹe'enaqteua Jeremías maye laual so Jabasinías, qataq so lqaỹañecpi qataq so llalaqpi, qataq 'enauac so shiỹaxauapi recabitapi, 4nache sauegueua'a aso atamnaxaqui, yem ndaqa' maye lalamaxat so llalaqpi so Hanán som llalec so Igdalías, som ỹale maye lo'onataxanaxanec Ñim Lo'onatac 'Enauacna. Qaq se'eso ndaqa' huaqta'ai' so lma' so nataxala'pi maye ilotague' aso atamnaxaqui, qataq npa'aỹañi so ndaqa' maye lalamaxat so Maseías som llalec so Salún maye nauaatalec naxa ñi lasom aso atamnaxaqui. 5Qaq huaña yemaye nache sanen so recabitapi, aso ỹomaxaquipi nlaqchigui na lataxa, nache shenapega, sheeta': «qanỹomiigui ne'ena lataxa.»
6Qalaxaye somayepi, 'eeta': «Qomi' saishet da ñeỹomaxagui na lataxa, cha'aye so Jonadab, som llalec so Recab maye sachegoxosoxoguet, somaye qomi' illapeguema qataq na qaya'alaqpi da chochaq tatec da sa ñeỹomaxagui na lataxa. 7Qataq nataqa'en qomi' illapeguema da so'otaq ca qarma', qataq da sauoqo'o ca qaranaxanaqa' da saxanaxañi ana uva. Qataq qomi' ỹamaxaleguete da nache 'eetai' da sauoqta'a na qarpe'lpi, da yaqto' qaỹoqtegue da qanachaalataxac da sonaqtalec ne'ena 'alhua maye choche souaqta'a shenaqta'am ca ỹaqa'a ca chegaqa'ague. 8Nache qomi' salaxasoxolec 'enauac nam qomi' ỹamaxaleguete som sachegoxosoxoguet Jonadab, nache qomi' qataq ana qarhuapi qataq na qochalaqpi saishet da ñeỹomaxagui na lataxa, 9qataq saishet da so'otaq ca qarma' da yaqto' sonaqtaigui, qataq saishet da huo'o ca qoranaxanaqa' uva lma', qataq qaica ca qana'alhua da huetalec na qorañiguishecpi. 10Qomi' sonaqtaiguilo naua qarpele'ete, qataq salaxasoxolec 'enauac nam qomi' ỹamaxaleguete so hua'au qarta'a Jonadab. 11Qalaxaye so Nabucodonosor maye nta'a ye Babilonia co'ollaq anac da ilaxachigui ne'ena 'alhua, nache qomi' qarhuennataxac da ñanaxa na Jerusalén da yaqto' sataxaueguesop so alleppi caldeopi, qataq so siiriopi, qaq nachera da huo'omshe souaqta'a na Jerusalén.» 12Qaq huaña nache Ñim Nataxala' ỹauo'o so la'aqtac ỹanem so Jeremías, 'eeta': 13«Aỹem Nataxala' maye Qaica ca Seqalanapec qataq Natamnaxala' na Israel le'ecpi, 'am samaxa da 'anqo'ona ye shiỹaxauapi maye lma' ye Judá qataq ye Jerusalén nache qonapega, qoneta': Qauaỹaañiteguet qome de'era, nache qaualaqailec na ỹamaxasoxonaxacpi. Qaq 'era da ỹa'aqtac Aỹem Nataxala'. 14Nam chegoxoguetpi so Jonadab som llalec so Recab, namayepi ỹalaxalec dam la'aqtac co'ollaxa som chegoxoguet, da saishet da nỹomgui na lataxa, qaq choche ivitta'a nagui da namayepi saishet da nỹomgui na lataxa, cha'aye ỹalaxaguet so la'aqtac som hua'au lta'a. Qaq Aỹem nataqa'en qami' sanema co'ollaxa da ỹa'aqtac, damaye shee'eguelaxattalec, qalaxaye qami' saishet da Aỹem qaualaqaiguet. 15Qataq she'eguelaxattalec da qami' ñamaxalo so ỹamaxashecpi maye ỹa'aqtaxanaxanecpi, da yaqto' qami' 'enapegalo, 'eeta': Qaỹa'axañiiuec da qauem qarataxaqui qataq nam qauem maye qauo'ocheetacpi. Qataq saishet da qaca'acheetague' na ỹaqa'a atamnaxala'pi, qataq saishet da qavio'oxoyiñiitac, yaqto' nache queta da qoñeetalec na 'alhua maye qami' sanema co'ollaxa qataq so hua'au qarta'ailpi. Qalaxaye qami' saishet da Aỹem qauqocheetega, qataq saishet da Aỹem qaualaqaiguet. 16Nam chegoxoguetpi so Jonadab som llalec so Recab, ỹalaxaguet dam la'aqtac co'ollaxa som hua'au lta'a, qalaxaye nam llalaqpi so Israel saishet da Aỹem ỹalaxaguet. 17Qaq ỹoqo'oye Aỹem Nataxala' maye Qaica ca Seqalanapec qataq Aỹem Natamnaxala' na Israel le'ecpi, sheeta': So'ot qome da na Judá qataq 'enauac nam hueta'a na Jerusalén da talec qome 'enauac nam qauem maye sa'axatta'aguet co'ollaxa. Cha'aye Aỹem qami' setaqtecoto co'ollaxa, qalaxaye qami' saishet da aỹem qauqochiitega, qataq qami' seỹaxaategalo co'ollaxa qalaq saishet da Aỹem qauasacheeguet.»
18So Jeremías nataqa'en 'enapega co'ollaxa so Recabitapi, 'eeta': «Ñim Nataxala' maye Qaica ca Ỹaqalanapec qataq Natamnaxala' na Israel le'ecpi, 'eeta': Cha'aye qami' qaualaqaiguet dam lamaxasoxonaxac som hua'au qarta'ai Jonadab, qataq qoquiitelec 'enauac nam lapaxaguenataxanaxacpi maye qami' ỹanema co'ollaxa, 19nache Aỹem Nataxala' maye Qaica ca Seqalanapec qataq Natamnaxala' na Israel le'ecpi, 'eeta' da ỹa'aqtac, nam chegoxoguetpi so Jonadab saishet qome da saqca ca Aỹem do'onataxaatacot.»
