Jeremías 39

₁Qaq huetoigui so ca'agoxoic diez so vi'i nueve da lo'onataxanaxac da nta'a ye Judá so Sedequías, nache so Nabucodonosor maye nta'a ye Babilonia, nqo'ona ye Jerusalén, nnaictague' so nalleppi, nache coleesop yemaye. ₂Qaq so na'a'q nueve, som ca'agoxoic cuatro som vi'i once da lo'onataxanaxac da nta'a so Sedequías, nache so alleppi maye pa'aguenaxauapi inoxoneua'a ye huaqta'a't nỹecpi, ₃qataq 'enauac som nataxala'pi maye ltauapi so nta'a ye Babilonia, pa'auo nache naña ñim lasom lta'araic maye ỹataqta ñegueuo. Qaq som pa'auopi, nacheso so Nergal Sarezer, qataq so Samgar Nebo, qataq so Sarsequín som 'amaqtaqaic nataxala' som lma' lta'araic so nta'a, qataq so lỹa Nergal Sarezer som nataqa'en 'amaqtaqaic som nta'alpi.

₄Qaq so nta'a Sedequías qataq so nalleppi co'ollaq ila'a de'era qanayeuaigui, nache datauec ca'ai ye huaqta'a't nỹecpi. Pe co'ollaxa da jec somayepi, tateuga so nqa'aic maye taalec so lanaxanaqa' so nta'a, nache tachiviigui so lasom maye quichiguinguilo soua dos npaqtaxanaqa'ate, nache quetregue so nqa'aic maye taalec so ca'amegue ye Jordán. ₅Qalaxaye so alleppi caldeopi icaalec co'ollaxa somayepi, nache iviralec so Sedequías huaña som nalochiguiñi 'alhua ye Jericó, nache qaỹaconeua'a somaye, nache qaỹauega so nta'a Nabucodonosor maye hueta'a co'ollaxa ye Ribla, maye huaigui ye 'alhua Hamat, nache huaña yemaye da so nta'a Nabucodonosor ỹauo'o da nhuaxanaguec somaye: ₆Qaq huaña ye Ribla nache so nta'a ye Babilonia damaxasoxoolec co'ollaxa da qaipelecot na lqosot soua llalqa so Sedequías ỹauaachigui naqa'en somaye, qataq nataqa'en 'enauac som 'amaqtaqaicpi maye lma' ye Judá. ₇Qaq ime nache qaltaq damaxasoxoolec so Sedequías da qanqa't naua la'ai'te, qataq qaỹauo'o so lquet lcat, da yaqto' qaỹauega ye Babilonia.

₈Qaq so caldeopi qalaq ỹegueua'a co'ollaxa so lma' lta'araic so nta'a qataq 'enauac so nma'pi maye naigui so huaqta'a't nỹecpi, qataq ỹamaxañi so mpaqtaxanaxatpi ye Jerusalén. ₉Qaq pa'atec nache so Nebuzaradán maye lataxala' na nauaatalecpi so nta'a, ỹauega ye Babilonia da icoñi' som no'onañipi co'ollaxa maye hueta'a so huaqta'a't nỹecpi qataq som huaxaiguet co'ollaxa so caldeopi, qataq 'enauac so nhuo' le'ecpi. ₁₀Qaq nda'a't som ỹataqta choxoraqpi da no'onalec naqa'en ye na'alhua so Judá, som ỹataqta qaica ca lalamaxat logoxoshet, qaq nacheso se'eso na'a'q da ỹanem somayepi na nanaxanaqa'pi uva lma'pi, qataq na 'alhua maye ishet da qoỹanaxaalec.

₁₁So nta'a Nabucodonosor maye lma' ye Babilonia, ỹanem da la'aqtac so Nebuzaradán maye lataxala' na nauaatalec so nta'a, dam 'eetec naqa'en so Jeremías, 'eeta': ₁₂«'Aulo'ogue qome ñimaye saishet qome da 'auo'otec ca qauem, nacherata da 'aỹa'anem 'enauac cam iỹaxanaique ñimaye.» ₁₃Qaq huaña nache so Nebuzaradán qataq so Nebusazbán qataq so Nergal Sarezer soua dos 'amaqtaqaiqa lataxala'ate nam nauaatalec so nta'a, qataq 'enauac som ltauapi so nta'a maye lma' ye Babilonia, ₁₄damaxasoxoolec da qanqateeguesop so Jeremías so qasoxoc maye nauanaxanaqa', nache qaipataxaguet so Gedalías som llalec so Ahicam qataq laual so Safán da yaqto' ỹauega so Jeremías so maiche lma'. Qaq 'era da 'eetec da so Jeremías ỹe'eguelaxa da netaigui se'eso huaqta'a't nỹecpi.

₁₅Qaq so Jeremías co'ollaq ñaq qaicoñettai' hueta'a so qasoxoc maye nauanaxanaqa', nache Ñim Nataxala' detaxaỹot somaye nache, 'eeta': ₁₆«Qojec qome 'anqo'ona ñi Ébed Melec, ñim Etiopía le'ec nache qonapega, qoneta': Ñim Nataxala' maye Qaica ca Ỹaqalanapec qataq Natamnaxala' na Israel le'ecpi, 'eeta': Aỹem sepactelec qome dam sa'axatta'a co'ollaxa da talec ne'ena huaqta'a't nỹecpi, qaq damaye qauem, qaq saishet da 'onaxaic. Qaq qom yo'oq damaye nache 'am 'auauaachigui qome. ₁₇Qalaxaye Aỹem 'am ñepaxaalec qome, da yaqto' saishet da 'am loxonec ne'ena shiỹaxauapi maye 'aye'etega. Qaq 'era da ỹa'aqtac Aỹem Nataxala'. ₁₈Aỹem 'am ñeca'alaxateeguesop qome da 'analaataguec. Nache 'am 'aushet qome da 'ananeltaxan, cha'aye Aỹem 'aupi'iỹa'a. Qaq 'era da ỹa'aqtac Aỹem Nataxala'.»