Jeremías 4

₁Ñim Nataxala' 'eeta' da la'aqtac:

«Da 'auauotaique da 'añe'eguelaq 'am Israel,

qaq iuen da nachaỹem da aỹem 'añe'eguelaxa.

Da qoca'ai nam nqaigaxat 'anatamnaxala'pi

qataq saishet da Ayem qoca'ai,

₂qaq da 'auachegoxotchigui da 'eesa qataq da nalochiguiñi lataxac

qataq da no'on nataxac da 'aỹa'anot ca 'ara'aqtac Ñim Nataxala',

nache da ỹe'enaxat, nachera da chegoqchigui qome

da nchoxonnataguec qataq da llo'oxonnataxanaxac

nam ỹotta'a't shiỹaxauapi.»

₃Ñim Nataxala' 'enapega na shiỹaxauapi maye netaña ye Judá

qataq ye Jerusalén, 'eeta':

Qana'ayiisheguem qome nam 'alhua maye saxanaxa da qoỹanaxaalec,

nache saishet da qaltaq qa'anaxañiỹoigui ana ỹaxat.

₄Qami' shiỹaxauapi maye qoñiitaña na Judá qataq na Jerusalén,

qauo'oche qome ca na'anaxat da qaro'ocỹaxaqui,

qataq aỹem qauauattoñeeta da Aỹem Nataxala',

qauachiỹaiguilo naua qarquiyaqtelli' da la'anaxat da aỹamaxataxac,

cha'aye saiuena'a da souaxat cam qauem maye qauo'oche,

nache da 'eroigui da inogoxonaxac, 'eeta'am ca norec

qataq 'erangui damaye, nache qaica ca ishet da ỹalamat.

₅Qaua'aqtaxañim de'era ye Jerusalén qataq ye Judá,

qauoita'a ana qarasheerei da qaua'aqtaxañim 'enauac na hueta'a yi'iye 'alhua,

qataq ỹataqta qana'axanñic qome da qara'alaxaqui qoñeeta':

¡Qalaỹoñiỹa't qome, nache senoxonaxaua'a nam huaqta'a't nỹecpi

maye ỹotta'a't naua nañalo maye qampaxatteua'a!

₆Qauachaxañiisheguem aca qara'anaxanaqchi

qaloxonaxañiitegue da pa'aỹa'ague ye Sión,

ime nache qauataiuec, saishet da huo'o ca qauacheeta'a,

da qanmichiỹaique ca qaye'eguenaqa'ai.

Cha'aye Aỹem sachegoxota'ague qome da sheu'

da ñanacot ca ỹataqta qauem qataq cam lta'araic maye ishet da delaqtaxan.

₇Qaq ñi llon mashe ca'ai ñim lle'eguenaxaqui,

mashe anacta nam ilaxachigui na ỹotta'a't shiỹaxauapi,

qaq mashe ca'ai yem na'alhua da naỹa na 'ana'alhua da yaqto' ilaxachigui,

qataq toolec naqa'en, qataq nlachiguiñi naqa'en

nam 'aralamaxat huaqta'a't nỹecpi.

₈Qaq ỹoqo'oye qaỹa'añiiyiñi qome naua qo'ogolli' maye sansattegueta,

qanỹeñi qataq qana'alaqaitapiguiñi souaxat da qanqui'iqui,

cha'aye dam 'ettaigui layeloxo Ñim Nataxala' saishet da qomi' ca'aisalo.

₉Ñim Nataxala', 'eeta' da la'aqtac:

«Qom ivita que'eca na'a'q, nache ñi nta'a qataq na nataxala'pi

iviloxolaqchet qome da lli'iỹaxa,

na ntaxaỹaxanaxanecpi qalaq huo'o qome da lcolanaxa,

qataq ỹe'elaq qome na na'aqtaxanaxanecpi.»

₁₀Qaq aỹem shenapec: «¡'Agai, 'Am Nataxala',

ta'ainco' da 'auatenachet na shiỹaxauapi na Jerusalén!

'Am 'auachaxanapecot co'ollaxa namayepi da nlagaxayec,

qaq nagui qalaq qaỹareeto'ot na lqosot na ỹeelonec.»

₁₁Qaq qom ivita cam laloqo' de'era,

nache qoỹenapega qome na nhuo' le'ecpi na Jerusalén, qoỹeeta':

«Chegoqtelec qome ye toolec 'alhua ca la'at dapaqa,

da nasheeresheguem nache taalec na pa'aỹa'ague

na ỹalamaxat nhuo' le'ecpi.

Qalaxaye camaye saishet da taiguet da qaichegoq na ala na trigo,

₁₂qaq cam la'at maye ñanacot qome,

camaye ỹataqta qapa'atteguet nache saq taiguet de'era,

cha'aye nagui Aỹem sa'axat nam lasouaxashetpi

da sataỹa'aguet namayepi.»

₁₃Ña qauloỹa nam pa'aguenaxauapi mashe anacta,

'eeta'am na lo'oc na piguem,

ana nnaigonapi maye nalaataxaquipi qalaq 'eeta'am ana daua'ache,

qaq na lalopi caipi qalaq ỹataqta qayaqaicpi napacalec na vi'icpi.

¡Choxoraiqolqa qomi' mashe seqataq!

₁₄'Am Jerusalén, ñaq 'auỹoueeguesop na qauem

añi 'arquiyaqte, yaqto' 'anca'alec.

¿Chaq laguio', qaq 'axanec na qauem nhuennataxacpi

maye huetaigui na 'arqaic?

₁₅Qaq chegoqchiguiña ye Dan qataq aye lcomaraxalatepi

maye naña ye Efraín da nvi' na qauem na'axaỹaxac:

₁₆«Qauqachiỹa na ỹotta'a't shiỹaxauapi

qataq qaua'aqtaxañim ye Jerusalén, da chegoqchiguiña

qome ca qaỹoqta 'alhua ca npa'aguenaxauapi,

nache ỹa'alaqtalec da nalaataxac da iloquiaxan ye Judá.

₁₇Qaq coleesop qome ye Judá, 'eeta'am

ca shiỹaxauapi maye ilotague' ca no'onaxa,

cha'aye yemaye saỹalaxaguet Ñim Nataxala'.

Qaq 'era da ỹa'aqtac, Aỹem Nataxala'.

₁₈Dam 'arataxac qataq nam 'auo'otpi,

nachena na ỹo'ot da 'am talec de'era,

nam qauem maye 'auo'otpi nachena na 'am ỹaneguet de'era ỹataqta chem

alaỹaxac qataq nachena na ique'emaqchet añi 'arquiyaqte.»

₁₉¡Ỹataqta mashe sa ñalo'oguet da ñequi'ic! ¡Ỹataqta seuet añi iquiyaqte!

¡Saishet da ñamaañi qataq saishet da she'emaqta!

Cha'aye sa'aqtega da l-lamaxa ana nasheere

qataq da na'alaxac da qaỹa'alaqtalec da alaataxac.

₂₀Qataq mashe nvi' da na'axaỹaxac da nacalec lỹa nam qailaxachiguipi,

'enauac ne'ena 'alhua qanlaxaañi.

Qataq choche nque'elaxatta da qanlaxaañi na ỹanataqa'pi

qataq ỹataqta nlachiguiñi qanqa'en so ipe'lpi.

₂₁¿Chaq laguio' qaq ime da selota'a ana na'anaxanaqtepi,

qataq da sa'aqtega da l-lamaxa ana nasheerepi?

₂₂«Na ỹalamaxat nhuo' le'ecpi ỹataqta qaica ca ỹaỹaanapec,

qataq saishet da Aỹem ỹauatton, 'enapec Ñim Nataxala'.

Namayepi saishet da deuennataxan qataq qaica laỹaanataxanaxac.

Sanqalaate' da ỹo'ot na qauem, qalaxaye saỹaỹaten da ỹo'ot ca no'on.»

₂₃Aỹem samatalec ana 'alhua, nache qaica ca laỹamaqa' qataq toolec.

Qataq samato'ot na piguem, nache ỹataqta napalñi.

₂₄Qataq samato'ot ana qasoxonaxapi nache ỹataqta cholaxaatac,

qataq 'enauac ana lcomaraxalatepi da ỹataqta iviloxoltac.

₂₅Semeenaxanapiguiñi, nache qaica da huo'otaq 'oonolec ca sela'a ỹale,

qataq 'enauac na maỹopi mashe datauec.

₂₆Qataq samata'a nam no'on uva lma'pi qalaq ỹataqta toolec,

qataq 'enauac som huaqta'a't nỹecpi ỹataqta nlachiguiñi.

Cha'aye da ỹataqta chaqaic layeloxo Ñim Nataxala',

nachera dam ỹo'ot da huo'o de'era.

₂₇Ñim Nataxala', 'enapec:

«'Enauac ana 'alhua da nlaguiñi qome,

qalaxaye saishet qome da imauec da selaxachigui.

₂₈Ana 'alhua nlaxagui qome da naquicoxo,

na piguem qalaq ỹapolec qome na napalaxa.

Mashe san da ỹa'aqtac qaq saishet qome da ñaralaxat,

damaye mashe iuennataxac qaq saishet qome da huo'o da ñetogotaxac.

₂₉Qaq qom qaỹa'axaỹa da la'alaxac ca netalec na caipi,

qataq cam checna lo'opi, nache 'enauac qome na shiỹaxauapi datauec,

nqañoxotoigui na aviaq, qataq quisheguemec ana coma'pi,

qaq 'enauac na huaqta'a't nỹecpi maye ỹotta'a't naua nañalo qanayeca'ai,

nache qaica qome ca netaigui namayepi.

₃₀Qaq 'am huaqta'a't nỹecpi ye mashe 'am nlachiguiñi,

Qaq ¿negue't ca 'auo'ot nagui?

Ye qaica ca naigui da 'aỹa'aatrañi naua 'ogo togaxaraiqa,

qataq da 'aỹa'aatañi ana 'ano'otaqte oro,

qataq da 'aua'ame'n naua 'ara'ai'te.

Cha'aye na 'anauonaxauapi 'am ỹo'otan qome,

qataq nmitaique ca lataxac da 'am ỹalauat.

₃₁Aỹem sa'aqtega da na'alaxac souaxat da qui'ic,

'eeta'am aca 'alo da cheta'ague da deco'o,

qalaxaye nacheye yem Sión da la'alaxac de'era,

maye dachottac qataq ỹaatrauec naua lhua'q nache, 'eeta':

¡Choxoraxaso' aỹem! ¡Aỹem ỹalauat qome na laataxanaxaicpi!»