Da nalaataguec so Gedalías
1Qaq so ca'agoxoic siete, nache so Ismael som llalec so Netanías qataq laual so Elisama maye chegoxoguet som llalaqpi so nta'a, jec da taỹa ye Mispá da yaqto' detaxaỹapegue' so Gedalías, qaq somaye nnaictagueto soua diez ỹale't. Qaq huaña ye Mispá, nache co'ollaq ñaq deque'eta'ape, 2nache so Ismael qataq soua diez ỹale't maye nnaictagueto nachaayiñi nache iroleguete so ỹeelonec da ỹalaua't so Gedalías, maye so nta'a ye Babilonia co'ollaxa da ỹanagui da nta'a da ilo'ogue na lma' ye Judá. 3Qaq so Ismael ỹalauat nataqa'en 'enauac so judiopi, qataq so alleppi caldeopi maye hueta'aguet so Gedalías maye hueta'a ye Mispá.
4Qaq so lỹa na'a'q co'ollaq ime da qaỹalauat so Gedalías, co'ollaq saxanaxa da huo'o ca ỹaỹaten de'era qanayeuaigui, 5nache nvi' som ochenta ỹalleppi chegaqa'a ye Siquén, Siló, qataq ye Samaria, qaq somayepi ỹataqta npetecta ana lqa' laue, qataq colaqta'ape naua logo, qataq huo'o na lque'emaxa na lo'oc maye maicheso somayepi da ỹo'ot. Qataq nachetac nataqa'en so ala na nañiguishec qataq so lchenaxanaxat maye ama na laita da yaqto' ỹanot Ñim Nataxala' da lachetaqtaxanaxat da huaña aso atamnaxaqui. 6Qaq huaña nache so Ismael chegoqteua'a ye Mispá da ca'ata'aguet somayepi, nỹeetague' quetague' so nqa'aic. Qaq co'ollaq choche ivireguet somayepi nache 'enapega, 'eeta':
Ñaq qauanaqui qauanaiua'a ñi Gedalías ñim llalec so Ahicam.
7Qalaxaye somayepi, co'ollaq chochaq ivireua'a ye laiñi som huaqta'a't nỹecpi, nache so Ismael qataq so nalleppi maye nnaictague', ỹalauat somayepi nache ỹasaxangui aso nshere. 8Qalaxaye huo'oi soua diez ỹale't se'eso shiỹaxauapi da 'enapega so Ismael, 'eeta':
Saishet da qomi' 'aualaua't, cha'aye ye qana'alhua huo'o ye soxotaqtañi trigo, cebada, aceite qataq na te'esaxalta'a lli'i.
Nache so Ismael saishet co'ollaxa da ỹalauat soomaye. 9Qaq asa'aso nshere maye so Ismael ỹasaxangui 'enauac so leuaxaicpi maye lalaatacpi, asomaye nachaso aso damaxasoxoolec co'ollaxa da qaỹo'ot so nta'a Asá, co'ollaq deloctague' so nta'a Baasá maye lma' ye Israel. Qaq asa'aso nshere ỹataqta late'erai, qalaxaye asomaye ỹataqta nlaqchigui so leuaxaicpi maye lalaatacpi so Ismael. 10Qaq co'ollaq ime nache so Ismael ỹaconeua'a da icoñi' asom llalpi so nta'a, qataq som shiỹaxauapi maye no'onalec co'ollaxa ye Mispá, som shiỹaxauapi maye so Nabuzaradán, ipataxalec co'ollaxa so Gedalías da ilo'ogue. Nache so Ismael icoñi' somayepi, qaq huaña nache jec, qalaq lhuennataxac co'ollaxa da taỹa yem na'alhua na Amón le'ecpi.
11Qaq so Johanán som llalec so Careaj, qataq som lataxala'pi so alleppi maye nnaictague' somaye, la'axaỹaxac co'ollaxa dam nleuaxa maye ỹo'ot so Ismael, 12nache laỹona't 'enauac so nalleppi, nache jec da delogui' somaye, nache somayepi natenalec so Ismael co'ollaq huaña ye saqaỹapeque aso 'etaxat laỹe' maye naña ye Gabaón. 13Qaq som ỹauectacpi lcoñeteguishecpi so Ismael, ỹataqta lta'araic da ntonaxac co'ollaq ila'aguet so Johanán qataq 'enauac so lataxala'pi so alleppi maye nnaictague' somaye, 14Nache somayepi dataỹa'aguet so Ismael, nache ỹe'eguelaxa da datalec so Johanán som llalec so Careaj 15Qalaxaye so Ismael, qataq soua ocho nale't ỹañoxo't co'ollaxa da naneltaxaareguet so Johanán, nache je'c da nqo'oora ye na'alhua na Amón le'ecpi.
16Qaq so Johanán qataq som lataxala'pi so alleppi maye nnaictague' pa'aiguet da ilo'ogue so alleppi, 'alpi, ñaqpiolec, qataq so 'amaqtaqaicpi nataxala'pi maye so Ismael ỹauec co'ollaxa da icoñi', ỹachegoxotchiguiña ye Mispá co'ollaq ime da ỹalauat so Gedalías, maye so Johanán ỹe'eguelaxat co'ollaxa ỹachegoxotchiguiña ye Gabaón. 17Nache jec somayepi nache ivitta'a ye Guerut Quimán maye huaqta'ai' ye Belén, yem huaña co'ollaxa da vi'iiguet. Qaq somayepi lhuennataxac co'ollaxa da ivira'a ye Egipto 18da yaqto' naneltaxaneguet so caldeopi, cha'aye huo'o da lcolanaxa souaxat da so Ismael ỹalauat so Gedalías, maye so nta'a ye Babilonia ỹanagui co'ollaxa da nta'a da ilo'ogue yi'iye 'alhua.
