Jeremías 42

₁Qaq 'enauac so lataxala'pi so alleppi nataqa'en ỹalectaigui so Johanán som llalec so Careaj qataq so Azarías som llalec so Osaías qataq 'enauac so shiỹaxauapi, ñaqpiolec qataq so ỹepi, nqo'ona co'ollaxa so ₂na'aqtaxanaxanec Jeremías nache 'enapega, 'eeta':

Qomi' sauoqtaique da 'am seỹaxanaqot, qalaq no'on qome da saishet da qomi' 'anhualoxonapeguema. Ñaq 'anachoxonnot Ñim Nataxala' maye 'Anatamnaxala' da qomi' 'auỹaxaaleguete, qomi' maye saq qomi' lamai' da ño'onqañi. Co'ollaxa maye qomi' qalotoiguilo, qalaxaye nagui qalaq qomi' salamai' da ño'onqañi, qaq mashe qomi' 'aumeteeta'ape nagui. ₃Ñaq 'anachoxonnot Ñim Nataxala' maye 'Anatamnaxala', da qomi' ỹapaxagueneque cam nqa'aic maye iuen da qolaxague, qataq cam iuen da so'otaq.

₄Nache so Jeremías ỹasateguet somayepi, 'eeta':

Aja', ỹaỹamaqchiguiñi. Aỹem ñachoxonnot Ñim Nataxala' maye Qanatamnaxala'ai da qami' ñachoxoreeleguete, so'ot dam qarquiquiaxaqui, qaq ime nache qami' saỹaanaxaneque qome 'enauac cam aỹem ỹa'axatem Ñimaye, qaica qome ca qami' soxottaisopa.

₅Qaq huaña nache somayepi 'enapega so Jeremías, 'eeta':

Ñim Nataxala' maye 'Anatamnaxala', nacheñi ñim saq yetaxan qataq 'eesa, da qomi' dataỹa'agueta qom saishet da so'otaq cam 'am ỹanem la'aqtac da qomi' 'aua'aqtaxanema. ₆Qaq saỹamaxannaqta huo'otaq saishet cam lasataxac Ñimaye, qalaxaye qomi' salaxasoxoguet qome Ñim Nataxala' maye Qanatamnaxala', cha'aye 'am seỹaxanaqot da 'auquiguiỹo'ot da yaqto' sana'aigue da qoyecỹaxac.

₇Qaq co'ollaq inoxoorec soua diez na'axa'te, nache Ñim Nataxala' detaxaỹot so Jeremías, ₈nache somaye iỹaxana so Johanán som llalec so Careaj qataq so lataxala'pi so alleppi maye nnaictague' qataq 'enauac so shiỹaxauapi, ñaqpiolec qataq so ỹepi, ₉nache 'enapega, 'eeta': «Ñim Nataxala' maye Natamnaxala' na Israel le'ecpi, maye aỹem qauamaqailec co'ollaxa da sanot dam qarquiquiaxaqui Ñimaye, 'eeta': ₁₀‹Da qami' qarhuennataqai da qoviỹa'a ne'ena 'alhua, nache Aỹem qami' sanema da qaica ca qaviñiitaique, qaq saishet qome da qami' selaxachiguilo nacherata da qami' saayiñi nache saishet da qami' ñapogoyeshegue'm, cha'aye huo'o da ñetogotaxac da qami' ñamaxalo co'ollaxa se'eso qauem. ₁₁Qaq saishet qome da qaye'eetega ñi nta'a ye Babilonia, ñim ỹataqta qarcolanaxache. Saishet da qaye'eetega ñimaye, cha'aye Aỹem qami' soota'agueta, da yaqto' qami' ñeca'alaxatrec, qataq qami' sesoueeguesopa da la'añaxac ñimaye. Qaq 'era da ỹa'aqtac Aỹem Nataxala'. ₁₂Qaq huo'o qome da ichoxonnataxanaxa da qoñeeta, qataq nataqa'en so'ot qome da ñim nta'a qami' ichoxore'n, nache qami' ỹasheetrec da qavi'eguelaqaỹa ye qana'alhuai.›

₁₃Qalaxaye qami' da saishet da qauaỹamaxayiñi da qoñiỹalec ne'ena 'alhua, qataq da saqaualaqaiguet Ñim Nataxala', maye Qanatamnaxala'ai, ₁₄da qoñiita': ‹Qomi' qarhuennataxac da ñeqo'onaxa da sonaqaña ye Egipto, yem huaña da saishet da selaqa'a ca alaataxac, qataq saishet da sa'axasoqtega ca l-lamaxa aca nasheere, qataq saishet da qomi' ỹalauat ca qarqouaxa,› ₁₅qaq qami' maye qano'oñiỹalec na Judá, ña qana'axaỹaxañiỹa da la'aqtac Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi, 'eeta': ‹Qami' da qarhuennataqai da qonqo'oñiỹa da qoñiỹaña ye Egipto, ₁₆nache da alaataxac qataq da nqouaxa maye ỹataqta qaye'eetaique damaye qami' ivira'alo qome, qaq nache qoviỹaña qome da qaullivi. ₁₇Qaq 'enauac na lhuennataxac da taỹa ye Egipto da naña, nache ileuaña qome yemaye, ileuaigui ca alaataxac, nqouaxa, huo'otaq ca napiina. Nache qaica qome ca nca'altauec, qataq qaica ca naneltaxaneguet que'eca qauem maye ñamaq qome.›

₁₈Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi, 'eeta': ‹Cha'aye dam 'eetec co'ollaq 'eroigui da inogoxonaxac qataq da ỹalemataic da sataỹa'aguet nam lma' ye Jerusalén, qaq nache 'eetec qome da 'eroigui da ỹalemataic da qami' sataỹa'agueta qom qanqo'oñiỹa ye Egipto. Nache qami' naloqnaxanaqa'ate qome dam qauem, qataq cam ỹo'ot ca ncolanaxa, qaq nache saishet qome da ỹe'eguelaxa da qaltaq qauloỹa'a ne'ena 'alhua.› ₁₉Qaq qami' maye qano'oñiỹalec na Judá, Ñim Nataxala', qami' 'enapegalo da saishet da qa'aỹeegue da Egipto. Qaq no'on da qauaỹaañita de'era, maye aỹem qami' sevitaqna'agueta nagui. ₂₀Qami' huo'o da lta'araic qarasouaxashechi, cha'aye maiche qami' da aỹem qoñiỹapega co'ollaxa da seỹaxanot Ñim Nataxala' maye Qanatamnaxala'ai nache aỹem qoñiỹapega, qoñiita': ‹Ñaq 'anachoxonnot Ñim Nataxala' maye Qanatamnaxala', da qomi' 'anachoxoreeleguete, nache qomi' 'auaỹaanaxaneque cam damaxasoxoolec Ñimaye da yaqto' so'otaq.› ₂₁Qaq ne'ena na'a'q, aỹem qami' sa'axattapeguema dam aỹem ỹanem Ñim Nataxala' da qami' sa'axatema, qalaxaye qami' saishet da qaualaqai. ₂₂Qaq ỹoqo'oye no'on da qauaỹaañita, da chegoqchigui qome ca alaataxac, nqouaxa qataq ca napiina, da qaullivi qom huaña yem 'alhua maye huotaique da qanqo'oñiỹa da qoñiỹalec.»