1Qaq so Jeremías, co'ollaq ime, da da'aqtaxaateguem so nhuo' le'ecpi, 'enauac nam ỹamaxalec Ñim Nataxala', maye Natamnaxala' na Israel le'ecpi, da ỹa'axatem somayepi, 2nache so Azarías som llalec so Osaías, Johanán, som llalec so Careaj, qataq som laỹepi ỹalleppi maye qaica ca iren, 'enapega so Jeremías, 'eeta': «¡Dam 'aua'axattac damaye saq'en! Ñim Nataxala' maye Qanatamnaxala' saishet da 'am ỹamaxalec da qomi' 'aua'aqtaxanema da saishet da saxague da Egipto. 3Yo'oqta da nacheso so Baruc som llalec so Nerías som ỹo'ot da qomi' 'auataỹa'agueta, da yaqto' ỹo'ot da qomi' loxonqa na Caldeopi, nache qomi' ỹalaua't, huo'otaq qomi' ỹauegalo ye Babilonia.»
4Qaq 'era da 'eetec so Johanán, qataq som lataxala'pi so alleppi, qataq som laỹepi shiỹaxauapi, da saishet da naña yem na'alhua so Judá, nache saishet da ỹalaxaguet da lamaxasoxonaxac Ñim Nataxala'. 5Maye nacherata da so Johanán, qataq 'enauac som lataxala'pi so alleppi laỹona't som saq 'amaqtaq laỹepi shiỹaxauapi maye ñaq hueta'a ye Judá, qaq somayepi nacheso som laguelec co'ollaxa na laỹepi 'alhuapi, maye ñe'eguelaxa ye Judá da yaqto' qaltaq naña yemaye; 6qaq damaye, 'eeta': ỹalleppi, 'alpi, ñaqpiolec, qataq asom llalpi so nta'a, qataq 'enauac som shiỹaxauapi maye so Nabuzaradán, som 'amaqtaqaic lataxala' so nauaatalecpi so nta'a, ipataxalec co'ollaxa da ilo'ogue so Gedalías, qaq nataqa'en ỹalectauo naqa'en so Jeremías, qataq so Baruc. 7Qaq 'era da 'eetec somayepi, da saỹalaxaguet da lamaxasoxonaxac Ñim Nataxala', nache 'enauac somayepi da taigue da Egipto, nache ivira'a co'ollaxa ye nỹecpi maye naña ye 'alhua Tafnes. 8Qaq huaña co'ollaxa ye Tafnes, nache Ñim nataxala' ỹanem da la'aqtac so Jeremías, 'eeta': 9«'Auaconalo qome caua coma' lta'al, nache ỹauaachigui 'anqa'en na lma' ye Judá, da 'aularoigui yem napiaqa' 'alhua nam l-laq ñi nỹec maye datateuga ñi ñegueuo ñim lma' lta'araic ñi nta'a maye naigui nam huaqta'a't nỹecpi. 10Nache qonapega namayepi, qoneta': ‹Ñim Nataxala' maye Qaica ca Ỹaqalanapec maye Natamnaxala' na Israel le'ecpi da la'aqtac, 'eeta': Aỹem so'ot qome da anac ñi ỹamaxashec Nabucodonosor maye nta'a ye Babilonia, nache aca nso'onaxaqui qataq ca lpe'l saatelec qome ne'ena coma' maye selatchiguiina'a nagui ne'ena. 11Qaq ñimaye anac qome nache ilaxachigui na 'alhua na Egipto. Qaq nam taỹa'aguet da ileu nache ileu qome, qaq nam taỹa'aguet da qaỹauec, nache qaỹauec qome, qaq nam taỹa'aguet da ileuaigui ca alaataxac, nache ileu qome huaigui ca alaataxac. 12Qataq ỹavigaxat qome ana atamnaxaquipi maye netaigui nam atamnaxala'pi na Egipto, qaq nam natamnaxala'pi namayepi qalaq ỹavigaxat huo'otaq ỹache, 'eeta'am naqa'en da lcoñeteguishecpi. Qataq ichegoq qome na 'alhua na Egipto, 'eeta'am ca qagueta lo'o da ichegoxouec na lalaxat caua logo, ime nache ca'ai qome namaye nache qaica ca ishet da nqanaxat. 13Nataqa'en ilaxachigui qome ana logorai coma'pi ye Heliópolis maye naña na Egipto, qataq ỹavigaxat ana atamnaxaquipi maye netaigui na atamnaxala'pi na Egipto.›»
