Qaỹa'axata'a da 'eetec qome na filisteopi
1Qaq 'era da la'aqtac Ñim Nataxala' maye ỹanem so na'aqtaxanaxanec Jeremías, da ỹa'axata'a dam 'eetec qome na filisteopi, co'ollaq so faraón saxanaxa da iloquiaxan ye Gaza, 'eeta':
2«Aỹem Nataxala', 'eeta', da ỹa'aqtac:
Chegoxogue qome da sheu' ca ndep 'eeta'am so tala da ipaxaateguelec,
nache ipaxaalec 'enauac na 'alhua qataq 'enauac nam huetalec namaye,
nataqa'en nam huaqta'a't nỹecpi qataq nam netaigui namayepi,
nache 'enauac nam netalec na 'alhua ỹa'alaqtagui qome,
na shiỹaxauapi na'axannec qome da la'alaxac souaxat da nqui'ic.
3Qaq qom hua'axaỹa da nỹaanaxac na caipi,
qataq da l-llimiaxa ana naigonapi,
qataq da l-lamaxa ana lasaxannapi,
nache na nta'alpi qaica qome ca la'añaxac,
nache ỹalat na llalaqpi.
4Cha'aye ivita ca na'a'q da qailaxachigui na filisteopi,
qataq da qaỹacona da ntaunaguec
maye ñaqauo'o yem Tiro qataq ye Sidón.»
Aja', Ñim Nataxala' ilaxachigui qome na filisteopi
qataq nam netalec añi ỹaqa'ata 'alhua maye le'enaxat Creta.
5Na shiỹaxauapi ye Gaza qalaq namare'c qome naua lqaigo,
na shiỹaxauapi ye Ascalón qalaq qaicaua qome naua la'aqtaqa.
Qaq qami' maye qapa'aitec som togoshec shiỹaxauapi logoraicpi,
¿chaq laguio' qaq qaỹa'axañiiñi da qampelequiitala't souaxat da qanqui'iqui?
6¡'Agai, 'am maye 'am lainec Ñim Nataxala'!
¿chaq laguio' qaq 'anmatec?
¡Ñaq 'avi'eguelaxaigui na 'araỹe',
ñaq 'anañaxaañi qataq 'añe'emaxat!
7¿Qalaxaye ca 'eeteco' da 'añe'emaxat
da nacheñi Ñim Nataxala' da 'am ỹamaq da 'auloquiaxan
ye Ascalón qataq 'enauac na hueto'ot na loigue aso auaxai?
