Jeremías 51

Ñamaq qome ca la'at lta'araic da yaqto' ilaxachigui

ye Babilonia, qataq na caldeopi.

₂So'ot qome da na mpa'aguenaxauapi ye Babilonia

nchegoxosheguem yemaye 'eeta'am naqa'en na trigo,

qataq so'ot qome da qaica ca netalec ye na'alhua.

Qom ivita cam na'a'q da qailaxachigui,

nache chegoqteugalo qome nam iloquiaxan yemaye.

₃¡Ña ỹaỹamaxaañi na lchecnecpi na checna lo'opi!

¡Qataq ỹaañi ana ltogue lapoqtepi!

¡Qalaxaye saishet qome da qauchoxoyiñi na nsoxoppiolec maye lma' ye Babilonia,

qataq qaulaxachiigui qome 'enauac na nalleppi!

₄Qaq 'enauac qome ye na'alhua na caldeopi,

na shiỹaxauapi qalaq huetaiya' qome huetangui na nqa'aicpi,

₅qaq na'aictaxa da na Israel le'ecpi qataq na Judá le'ecpi

nlaqaalec naqa'en na na'alhua na lasouaxashetpi,

qalaxaye Aỹem Nataxala' maye Qaica ca Seqalanapec

maye Qui'itta Natamnaxala' na Israel le'ecpi, saxanaxa da salat namayepi.

₆¡Qoquiỹa'ai ye Babilonia! ¡Qananeltaxañi yaqto' qarca'alleeuec!

¡Saishet qome da qaullivi, souaxat na lasouaxashet yemayepi!

Cha'aye mashe ivita ye laloqo' da sauo'o ca ivi',

nache sesheeten qome ipacchigui ñaqa'en dam naigui nam ỹo'otpi.

₇Ye Babilonia 'eeta'am aca ỹomaxaqui oro co'ollaq huetaigui na ihuaq lauel,

nache itaqchet naxa 'enauac na huetalec ana 'alhua.

Nam ỹotta'a't shiỹaxauapi nỹomtapigui se'eso lataxa,

nache deqat naxa da laỹaanataxanaxac. ₈Qalaxaye ye Babilonia nque'elaxatta da huañi, nache ỹataqta dolachigui.

¡Qanỹeñiilec qome yemaye! ¡Qandoiua'a qome ca lata' da lque'emaxa,

shapegueto' ishet da nataren.

₉Mashe sauoqo'o so lata' ye Babilonia, qalaxaye saishet da no'oita.

¡Ña qauaqaita'a yemaye! Qolaq qolqa'ai ne'ena,

ñi 'oonolec ỹe'eguelaxa qome ca maiche lma'

cha'aye da nhuaxanaguec ỹataqta iviro'ot na piguem.

Da nhuaxanaguec qalaq napacalec na lo'oc na piguem.

₁₀Ñim Nataxala' dauegaxan naqa'en da shenaqta.

Ñaq qauanaqui, nache sa'axataq qom huaña ye Sión

dam ỹo'ot Ñim Nataxala' maye Qanatamnaxala'.

₁₁Ñim Nataxala' huotaique da ilaxachigui ye Babilonia,

nache nquetoxon na nta'alpi ye Media nache ỹanem de'era lhuennataxac.

Qaq 'era da lvi' Ñim Nataxala' souaxat dam qaỹo'otec co'ollaxa aso lalamaqte atamnaxaqui.

¡Qauaỹamaxachiiñi ana checnapi!

¡Qataq qauaỹamaxachiiñi ana mpaqtaxanaqtepi!

₁₂¡Qauauo'oi aca la'anaqte da qauloquiaxañi ye Babilonia,

nache qaulaxachiigui na lpaqtaxatpi!

¡Qataq qanquigaxacheeuec na nauanaxanaxanecpi

qataq nam nauanaxanaxanecpi na pa'asheguem!

¡Qataq qauauo'oi na qanqañoxotaqaipi!

Cha'aye Ñim Nataxala' ỹaỹamaxaañi qataq ipacchigui da ỹo'ot

nam lapaxañipi maye ỹa'axatta'a co'ollaxa da dataỹa'aguet na lma' ye Babilonia.

₁₃Qaq 'am Babilonia maye qoneto'ot na loigue na lta'araic talapi,

qataq 'am hueto'ot da lta'araic 'arsallaxa,

¡qalaxaye mashe 'avita ye 'araloqo', yem loga't da 'anachaalataxac!

₁₄Ñim Nataxala' maye Qaica ca Ỹaqalanapec,

maiche ỹan co'ollaxa da la'aqtac, 'eeta':

«'Am ñamaxa qome ca qalota 'ampa'aguenaxauapi

'eeta'am ana shiiquioxoipi, nache camayepi 'am do'onaxaatalec qome da 'am loxonec.»

₁₅Ñim nataxala', do'ogoxona da la'añaxac co'ollaq ỹo'ot ana 'alhua,

qataq do'ogoxona da laỹaanec co'ollaq ỹa'ayiñi ana 'alhua,

qataq do'ogoxona da laỹaanataxanaxac co'ollaq ilagaxaañi na piguem.

₁₆Ñimaye da detaqa, nache ỹo'ot da dellimigui na 'etaxat na piguem,

qataq naỹoxoosheguem naqa'en na lo'oc na piguem

chegoqchiguiña naqa'en naua loga'te ana 'alhua,

qataq ỹo'ot na nqashelgaxa da huetaigui naqa'en na auot

qataq anacot na la'at ỹachegoxotchiguiña cam laponqa' namaye.

₁₇Qaq 'enauac na shiỹaxauapi qaica ca ỹaỹaanapec.

Na nqolacpi qalaq ỹo'ot da lcoxo nam ỹo'ot namayepi,

cha'aye choche ne'enaqtac maye natenataxanaxaqui qataq qaica ca lca'alaxa,

₁₈namayepi qaica ca naigui, qataq 'enaxaqui,

Ñim Nataxala' qom ivita da nmit, 'enauacna nache ilaxachigui namayepi.

₁₉Qaq ỹataqta huaỹoqtec da lataxac Ñim Natamnaxala' so Jacob maye lo'onatac 'enauac nam huo'o!

Ñimaye lca'aguishec co'ollaxa so Israel da yaqto' lalamaxat.

Ñimaye da le'enaxat, 'eeta': Nataxala' maye Qaica ca Ỹaqalanapec.

₂₀«¡'Am Babilonia, nache 'am maye 'am itoqnaxanaqte,

'am ỹo'ogoxonaxat da ñalat!

'Am so'ogoxona da ñelaxaañi na ỹotta'a't shiỹaxauapi

qataq da selaxachigui da lo'onataxanaxac na nta'alpi.

₂₁'Am so'ogoxona da selaxachigui na caipi qataq na ỹalleppi maye netalec namayepi,

qataq ana naigonapi qataq nam netangui anamayepi.

₂₂'Am so'ogoxona da selaxachigui na ỹalleppi qataq na 'alpi

na ỹa'axaiquipi qataq na nsoxoppi qataq na ñaqpiolec qataq na qa'ampiolec.

₂₃'Am so'ogoxona da selaxachigui na qagueta lo'opi qataq ana qaguetapi

qataq na ỹo'ottac na 'alhua qataq na lauegaxanaxala' huacapi,

qataq na nta'alpi qataq na 'amaqtaqaicpi ltauapi.

₂₄Qalaxaye qami', qauauañiichigui qome da sesheeteneguet ye Babilonia,

qataq 'enauac ye caldeopi, souaxat dam qauem maye ỹo'otec co'ollaxa ye Sión.

Qaq 'era da ỹa'aqtac Aỹem Nataxala'.

₂₅Aỹem 'am sataỹa'aguet 'am qasoxonaxa maye laqtaxanaxai,

maye 'aulaxachigui 'enauac ana 'alhua.

Qaq 'era da ỹa'aqtac Aỹem Nataxala'.

Ñauaxaỹaxaasheguem qome na ihuaq da sauo'o ca 'anhuaxanaguec,

nache 'am sachegoxotasheguema ana coma'pi da 'am seqalagoxotta,

nache 'am she'eguelaxata da qoneta'am aca lcomaraxalate ỹavicta.

₂₆Qaq qaica qome ca coma' da 'am qaỹachegoxotauga

da yaqto' qaỹo'onataxana da qano'oxoosheguem ca nỹec lta'araicpi.

Cha'aye choche tatec qome da 'am toolec.

Qaq 'era da ỹa'aqtac Aỹem Nataxala'.

₂₇Qaỹa'añiỹasheguem aca qara'anaxanaxache ne'ena 'alhua.

Qauashiiyigui ana qarasheerei, qataq naỹamaxat qanqa'eñi

'enauac na ỹotta'at shiỹaxauapi da yaqto' qauloquiaxañi ye Babilonia.

Qom qauloquiaxañi yemaye nache qauauaqaiguet

na nta'alpi ye 'alhua Ararat, ye Mini, qataq ye Asquenaz.

Qataq qauauoi ca nataxala' da ilo'ogue da alaataxac.

Qataq qoquiỹot qome na caipi 'eeta'am qanqa'eñi aca qauemai shiiquioxoipi.

₂₈¡Qauỹaxañiỹa na ỹotta'a't shiỹaxauapi da qauloquiaxañi yemaye,

qataq na nta'alpi ye Media, qataq na nataxala'pi

qataq nam 'amaqtaqaic ltauapi,

qataq 'enauac na hueta'a na 'alhuapi maye ilotague'.»

₂₉Ana 'alhua qalaq dacholaxan qataq daquico,

cha'aye Ñim Nataxala' mashe ipacchigui dam lapaxañi co'ollaxa

da ỹe'eguelaxata ye Babilonia da 'eeta'am

ca toolec 'alhua maye qaica ca ishet da nalec.

₃₀Na alleppi ye Babilonia qalaq ỹaxaañi da l-loquiaxac,

nache saishet da iraxan na lle'eguenaxaquipi,

cha'aye imeuo da la'añaxac, nache ivitta'a da 'eeta'am na 'alpi.

Yem lalamaxat huaqta'a't nỹecpi maye ỹotta'a't naua nañalo,

qalaq qainoxotaua'a qataq qaỹavigaxat na lma'pi.

₃₁Na na'aqtaxanaxanecpi qalaq ca'ataueegue ñi lỹa

da ỹa'axateua'a ñi nta'a ye Babilonia,

da so lalamaxat huaqta'a't nỹecpi mashe imauec da noxonec.

₃₂Na mpa'aguenaxauapi qalaq mashe loxonec

na ñeguetapi yem talapi, qataq ỹegueua'a na nauanaxanaqa'pi,

qaq na nalleppi ye Babilonia qalaq nlaxagui da lcolanaxa.

₃₃Cha'aye Ñim Nataxala' maye Qaica ca Ỹaqalanapec,

Ñim Natamnaxala' na Israel le'ecpi, 'eeta':

«¡Ye Babilonia qalaq 'eeta'am ca nchegoxosoxonqa'

da qaỹapetapigui da ivita da nchegoxosoxonaxac,

qaq mashe saqaỹaloq da ivita ye laloqo' da qanqat!»

₃₄Ye Jerusalén maye hueta'a ye Sión, 'eeta':

«Ñi nta'a ye Babilonia aỹem chec, qataq aỹem ilaxachigui,

nache ỹo'ot da sheeta'am ca nquia'axaqui da qui'itchigui.

Qataq 'eeta'am ca shiguiỹac lta'araic 'etaxat le'ec da aỹem iuoxonañi,

nache ỹataqta nlaqchigui ñimaye da isallaxa maye aỹem hueto'ot co'ollaxa,

qaq so laỹepi maye no'onañi qalaq ỹalat.

₃₅¡Qaq ña isheeten qome ye Babilonia dam qauem maye aỹem ỹo'otec!

¡Ña isheeten qome ye caldeopi som ỹalamaxat shiỹaxauapi maye ỹalauat co'ollaxa!»

₃₆Ñim Nataxala', 'eeta':

«Aỹem 'am so'otec qome ca nalochiguiñi lataxac,

da sauo'o ca ivi' da she'eguelaxateguet na 'ampa'aguenaxauapi.

Nache imauec qome ñaqa'en da deqaqta so tala

qataq na npaxaatasheguem 'etaxat ye Babilonia,

₃₇nache yemaye ỹe'eguelaxa qome da lapoosheguem na coma'pi,

qataq nache lma' qome ana huaxaỹaxapi,

qataq qaica qome ca ishet da hueta'a yemaye,

nacherata da ỹo'ot da ncolanaxa qataq da nqaigaxa.

₃₈Ye Babilonia le'ecpi qalaq desoqtagui qome, 'eeta'am na llonpi,

qataq ỹa'alaqtagui qome, 'eeta'am na llon llalaqpi.

₃₉Qaq qom mashe napaqhuec,

nache ñeỹomaxangui qome cam ishet da itaqchet,

nache deqat qome naqa'en da ntoonaxac.

Qaq huaña, nache taigui cam chochaq tatec lo'ochaxa

nache saishet qome da qaltaq nlouec.

Qaq 'era da ỹa'aqtac Aỹem Nataxala'.

₄₀Qaq ime qome, nache sauegueuga ca nalaataqa',

'eeta'am da qaỹauec ca qagueta llalaqpi,

quetaqpi, qataq ca qagueta lhuaraicpi.»

₄₁¡Ye Babilonia, yem huaqta'a't nỹecpi maye imattalec ana 'alhua da llo'oxoyec,

yemaye huañi, yemaye mashe noxonec!

Qaq ỹataqta huo'o da lcolanaxa na ỹotta'a't shiỹaxauapi da ilota'a!

₄₂Na 'etaxat aso auaxai qalaq ipaxaalec ye Babilonia,

nache ana late'erai lapaxa ỹapolec yemaye.

₄₃Nam lalamaxat huaqta'a't nỹecpi maye ỹotta'a't naua nañalo

qalaq ỹe'eguelaxa da tooleguete, nache na 'alhua ỹataqta deqaqta,

qataq nlachiguiñi, nache qaica ca ishet da nalec, huo'otaq da choche nlectelec.

₄₄«Sauo'o qome ca nhuaxanaguec ñi atamnaxala' Bel ye Babilonia,

Aỹem so'ot qome da anolec som iuoxonañi co'ollaxa,

na ỹotta'a't shiỹaxauapi qalaq saishet da ỹe'eguelaxa da natamnot ñimaye,

qataq saishet qome da nachattañi na lpaqtaxatpi ye Babilonia.

₄₅Qami' ỹalamaxat nhuo' le'ecpi qoquiỹa'ai qome yemaye,

¡ñi 'oonolec maiche nca'alaxaala't qome da 'eteguet dam 'ettaigui ỹayeloxo!

₄₆Saishet qome da qayi'iitac qataq saishet da huo'o ca qarcolanqai,

souaxat nam na'aqtaxanaxacpi maye qaua'aqaitega ne'ena 'alhua.

Cha'aye 'enauaque naxa naua vi'iye da huo'o na ỹotta'a't na'aqtaxanaxacpi,

na'aqtaxanaxac da qaica ca qairen ne'ena 'alhua,

qataq da qaỹa'axat da na nta'alpi deloguiỹa't.

₄₇Qaq mashe anacta ca na'a'q maye huaigui da sauo'o ca nhuaxanaguec na nqolacpi ye Babilonia.

Qaq 'enauac qome yi'iye 'alhua da huetalec da na'aloxo

qataq nlaqaalec na leuaxaicpi.

₄₈Qaq huaña nache na piguem qataq ana 'alhua

qataq 'enauac nam huo'o, ntonapigui' qom huañi ye Babilonia,

qom chegaqa'ague da sheu' cam ilaxachigui yemaye.

Qaq 'era da ỹa'aqtac Aỹem Nataxala'.

₄₉Aja', ye Babilonia huañi qome souaxat so ỹalauat Israel le'ecpi,

qataq souaxat so lalaatacpi 'enauac ana 'alhua.»

₅₀Qaq qami' maye qami' ỹe't da nalaataxanaxac,

qauataiuec qome, nache saishet da huo'o ca vi'iiguet,

qaq na'aictaxa qome da qami' qaỹoqtalo

qalaq qauennachiỹa'a Ñim Nataxala' qataq qauennachiỹa'a qome ye Jerusalén.

₅₁Qami' qoñeeta' naxa:

«Huo'o naxa da qara'agaxa da sa'axasoqtega da qomi' qaisheueeta'ape.

Da qane'enaguec qalaq huetaigui da qarasheguiỹaxac,

cha'aye na chegaqauec shiỹaxauapi huenoxoneua'a ye ndaqa'

maye qui'itta añi atamnaxaqui maye lalamaqte Ñim Nataxala'.»

₅₂Qalaxaye Ñim Nataxala', 'eeta':

«Anacta ca na'a'q maye huaigui da sauo'o ca nhuaxanaguec na nqolacpi ye Babilonia,

nache 'enauac qome yi'iye na'alhua dachora't na que'emaxaicpi.

₅₃Qaq na'aictaxa ye Babilonia da ivirasheguema na piguem

da yaqto' qaỹoqotcheguemec naqa'en na lpaqtaxanaxatpi,

qalaxaye nache 'ena'am samaxa cam mpa'aguenaxauapi da yaqto' ilaxachigui.

Qaq 'era da ỹa'aqtac Aỹem Nataxala'.»

₅₄Chegoqchiguiña ye Babilonia da na'alaxac souaxat da qui'ic,

chegoqchiguiña ye na'alhua na caldeopi da lta'araic nllimiaxa.

₅₅Qaq nacheñi Ñim Nataxala' da ilaxachigui ye Babilonia

qataq nache tachiguiña naqa'en da na'amqaanaxac.

Na mpa'aguenaxauapi qalaq 'eeta'am da l-lamaxa aca lapaxa na 'etaxat,

nache talec yemaye qalaq ỹataqta lta'araic da l-lamaxa.

₅₆Anac da ilaxachigui ye Babilonia

nache loxonec qome na alleppi

qataq ỹacagaxachigui na lchecnecpi namayepi.

Cha'aye Ñim Nataxala', Nacheñi Ñim Lo'onatac 'Enauacna,

maye ỹanem nam naigui nam ỹo'otpi ñi 'oonolec.

₅₇Ñim Nta'a, Ñim Nataxala' maye Qaica ca Ỹaqalanapec, 'eeta':

«Setaqchet qome na lataxala'pi ye Babilonia,

nam ỹaanaxanaxaicpi qataq na nta'alpi, qataq na ltauapi, qataq na alleppi

nache talec qome ca chochaq tatec lo'ochaxa

nache saishet da qaltaq nlouec.

₅₈Aỹem Nataxala', maye Qaica ca Seqalanapec, sheeta':

Na qalotegue lpaqtaxatpi ye Babilonia imauec qome da qaỹamaxauec,

qaq naua lta'araiqa naso'omi qalaq qaỹavigaxa't qome.

Nache qaica ca naigui da lo'onataxanaxac co'ollaxa na ỹotta'a't shiỹaxauapi,

cha'aye dam lqui'itaxa co'ollaxa qalaq taỹa'a da tangui ca norec.»