1Ñim Nataxala', 'enapec: Que'eca na'a'q, nache qaỹachegoxotangui qome ana huachiquipi da qanqatsheguem na lpi'inecpi na nta'alpi qataq nataxala'pi ye Judá, qataq na ntaxaỹaxanaxanecpi qataq na na'aqtaxanaxanecpi, qataq nam hueta'a co'ollaxa ye Jerusalén, 2nache huetaiya' qanqa'en hueta'aguet na le'eraxa añi nala', qataq ñi ca'agoxoic, qataq 'enauac ana huaqaañipi, maye lauotaqte qataq do'onataxaatacot qataq ca'attague', qataq inatto'ot naxa, qataq ỹo'oxoreetac. Qaq qaica qome ca laỹona't da ilayiñi, nache laguelec na 'alhua 'eeta'am na shiguiỹac la'atec. 3Qaq cam lca'alaxaic qome ne'ena shiỹaxauapi maye qauemaicpi, da maiche cam hueta'ague, qom ime da selagaxattac nache namayepi iyaqa'a da ileu qaq saq 'ena'am da nca'altauec. Qaq 'era da ỹa'aqtac Aỹem Nataxala', maye Qaica ca Saqalanapec.
Da nhuaxanaguec na Israel le'ecpi
4Qaq 'am Jeremías, 'aua'aqtaxanem qome ne'ena nhuo' le'ecpi dam ỹa'aqtac maye 'am samaxalec, qoneta':
Da huañi ca 'oonolec qalaq ishet da qaltaq ñisheguem,
qataq da npe'en ca nqa'aic qalaxaye ishet da ỹe'eguelaxa.
5Qaq 'am Israel, ¿ta'ainco' ye aỹem qoca'ai?
'Am Jerusalén ¿ta'ainco' da nache qoqueto'ot da Aỹem sa 'auaconeguet?
¿Ta'ainco' da 'auacona da sa 'aualaq, nache saishet da aỹem 'añe'eguelaxa?
6Aỹem ña'axaỹaxaatañi co'ollaxa,
qalaxaye saishet da huo'o ca sa'axaỹa da ntogottac
souaxat na qauem maye ỹo'otpi,
qataq cam huesota da, 'enapec: ¿Negue't cam so'ot co'ollaxa?
Nda'a't dam layaqchec da llecỹaxac 'eeta'am ca caaỹo
maye sancherapec da huetaigui ca alaataxac.
7Qaq ivira'a na huaqap, da ỹaỹaten ye laloxoqui da ỹe'eguelaq.
Na qoto' qataq na payogotolec qataq ana salole
ỹaỹaten ye laloqo' da nquiga ye lỹa lanataqa'.
Qaq qami' ỹalamaxat nhuo' le'ecpi qalaq saishet da qauaỹachiñi' naua iqataxaco.
8Qalaq ¿ta'ainco' da qoñiitega qami' ỹaanaxanaxaicpi
qataq da qami' hueto'oto nam lqataxacpi Ñim Nataxala'?
¡Ye nam neraxanaqpi maye deraxaatega na maỹo laue saq 'en nam ỹereñipi!
9Qalaxaye ne'ena ỹaanaxanaxaicpi qaica qome ca la'amaqchec,
qataq qaicolanaqchet, 'eeta'am ca shiguiỹac maye nqoishec.
Qaq ¿hueta'ague cam laỹaanec, ye saishet da ỹaconegueta naua ỹa'aqtaqa?
10Qaq ỹoqo'oye Aỹem sanem qome ca lỹa ỹale ana lhuapi namayepi,
qataq na na'alhua taỹot ca lỹa shiỹaxaua da ỹauo'o lalamaxat.
Cha'aye 'enauac na shiỹaxauapi, na 'amaqtaqaic
qataq nam qaica ca la'amaqchec,
nacherata da iuennatega da lauegaxanaxac
maye chegaqaigui da ncachaxac,
na na'aqtaxanaxanecpi qataq na ntaxaỹaxanaxanecpi 'enauac da decachetac.
11Qataq 'eetega nataren na lque'emaxapi na ỹalamaxat nhuo'
le'ecpi, nache 'enapega, 'eeta':
«Huo'o da qal-lagaxayequi, huo'o da qal-lagaxayequi»
Qalaxaye qaica ca l-lagaxayec namayepi.
12¡Qamaq iuen taxa da huo'o da la'agaxa
da ỹo'ot de'era maye sa sesheteguet!
¡Qalaxaye namayepi qaica ca la'agaxa!
Ỹoqo'oye qom sauo'o ca nhuaxanaguec, nache depoxolaxaañi
qataq huañi, 'eeta'am so laỹepi.
Qaq 'era da ỹa'aqtac Aỹem Nataxala'.
13Ñim Nataxala' 'enapec: «Aỹem sechec qome
nam ỹalamaxat nhuo' le'ecpi 'eeta'am ñaqa'en ca trigo.
Qataq qaca qome aca no'onañi ala ana uva, qataq aca 'oonole ala ana hiigo.
Nachaqanata ana lauepi lqaxaỹaxai da no'onañi.»
14Qaq na nhuo' le'ecpi 'enapec, qome:
¿Negue'to' cam so'otaqtac da souaqta'a ne'ena?
¡Qolaq 'enauac ñeqo'onaxaua'a qome ye huaqta'a't
nỹecpi maye qampaxattaua'a, da yaqto' qomi' qaỹalaua't!
Cha'aye Ñim Nataxala' maye Qanatamnaxala'
qomi' ỹanegueta da qal-leuaxa, qataq qomi' nỹomaxanguilo
ca 'etaxat maye huo'o na lalegue qanlem,
cha'aye huo'o da qarasouaxashet hueto'ot Ñimaye.
15Seuataqtaique ca qal-lagaxayec,
qalaxaye qaica ca no'on da qomi' nviralo.
Qataq seuataqtaique ca qaraỹamaxa, qalaxaye nachaqrata da qarcolanaxa.
16¡Mashe anacta na qampa'aguenaxauapi!
¡Mashe dachemnaxaata'aguet na lalopi caipi, chegoqchiguiña ye Dan!
Naxa da nỹen, nache cholaxan na 'alhua.
Anac da nlaxaañi ne'ena 'alhua qataq 'enauac nam huetalec namaye,
nam huaqta'a't nỹecpi maye ỹotta'a't na nañalo qataq nam hueta'a namayepi.
17Ñim Nataxala', 'enapec:
«Aỹem qami' ñamaxalo qome ca 'araxanaqpi
maye huo'o na lshenataxanaxa, nache qami' desogaxanguilo,
qaq camayepi qaica ca 'onataxac da ishet da dataỹa'aguet.»
Da nqui'ic so Jeremías souaxat so lauo' le'ecpi
18Da ñequi'ic qalaq qaica ca lata',
añi iquiyaqte qalaq mashe qaica ca la'añaxac.
19Da la'alaxac na ihuo' le'ecpi qaỹa'aqtega 'enauac ne'ena 'alhua:
«¿Peta'a Ñim Nataxala' mashe saq hueta'a ye Sión?
¿Peta'a mashe saq hueta'a so nta'a?» Nache Ñim Nataxala' ỹasat, 'eeta':
«¿Ta'ainco' da aỹem qanogoqchichi da qanatamñiitacot nam ne'enaqtacpi
atamnaxala'pi maye qaica ca naigui qataq ỹaqa'a?»
20Qaq mashe ỹoxogue so napaxaỹaxa
qataq mashe ime da qanqat na ala na nañiguishec,
qalaxaye qaica ca nca'alaxa da qomi' taleguete.
21Aỹem ñeque'etaxangui da nque'eenaxac na ihuo' le'ecpi,
da naquicoxo qataq da ncolanaxa aỹem loxonec.
22¿Peta'a qaica ca natannaxanaxat ye Galaad?
¿Peta'a qaica ca natannaxanaq da hueta'a yemaye?
¿Ta'ainco' da saishet da no'oita na ihuo' le'ecpi?
