Juan 13

₁Qaq nacheso se'eso lỹa na'a'q maye huetoiguilo soua na'axa'te da qaiuennate so na'a'q le'enaxat Lapascua. Qaq So Jesús mashe ỹaỹaten da ivita ye laloqo' da ca'ai ana 'alhua, da ỹe'eguelaxa Ñim Lta'a maye Lo'onatac 'Enauacna. Qaq Somaye nache 'eetai' da lauotaxanaqtaic na lalamaxatpi maye huetalec ana 'alhua, qaq da lauotaxanaqtaic ỹachaxana somayepi choche ivitta'a da loga't da nachaalataxac.

_2-4Qaq so pa'aguenataxanaxaic mashe sogote da ỹachaigui da lquiyaqteỹaxac so Judas Iscariote, da lhuennataxac da yaqto' ỹaneuo So Jesús. Qaq So Jesús, Somaye ỹaỹateeta da chegoqtot Ñim Lo'onatac 'Enauacna, qataq ỹaỹateeta da ỹe'eguelaxa Ñimaye, qataq da Ñim Lta'a ỹanem Somaye 'enauac da la'añaxac. Nache co'ollaq mashe deque'etacpi somayepi, nache So Jesús nachaañi, nache nqat so lapo', qataq nsaachigui so pilotaxat hualoq laỹe. ₅Nache icoyingui so 'etaxat so pilotaxaqui, nache iỹoi' naua lapia'ate soua lapaxaguenataqa qataq ỹaqaxaỹaxa't, huota'a naqa'en so pilotaxat hualoq laỹe.

₆Qaq co'ollaq taỹa'a so Simón Pedro da huotaique da iỹoi' naua lapia'ate, nache somaye 'enapeco':

–'Am Ỹataxala', ¿'am 'auauotaique peta'a da 'auỹoi' naua ỹapia'ate?

₇Nache So Jesús 'enapeco':

–Nagui 'am saishet da 'auaỹaten da so'ottac, qalaxaye qom qaỹata'ague, nache ishet da 'auaỹaten.

₈Qalaxaye so Pedro 'enapeco':

–'A'i, saishet da 'am sashenem da 'auỹoi' naua ỹapia'ate.

Nache So Jesús 'enapega somaye, 'eeta':

–Da saishet da seỹoi' naua 'arapia'ate, nache saishet da 'am ỹapaxaguenatac.

₉Nache so Simón Pedro 'enapeco':

–Hua' qone', 'am Ỹataxala', qalaxaye saishet da nachaqnauate' naua ỹapia'ate da 'auỹoi', nataqa'en naua ihua'q qataq na ỹaqaic.

₁₀Qalaxaye So Jesús 'enapeco':

–Cam ñaq cheta'ague da nacheltac, camaye sa iuen da qaltaq nỹo, nachaqnauate' naua lapia'ate iỹoi', cha'aye camaye sogote da qui'itta. Qaq qami' sogote da qami' qui'itte', na'aictaxa da saishet da imauec da qoñiita.

₁₁Somaye 'enapec de'era, 'eeta': «Saishet da imauec da qoñiita da qami' qui'itte',» cha'aye ỹaỹateetac da huo'o som huotaique da ỹaneuo Somaye.

₁₂Qaq co'ollaq imat da iỹota'ape naua lapia'ate somayepi, nache So Jesús qataq napogoña so lapo', nache nso'ooñi da datalec so nquia'axala', nache 'enapeco':

–¿Qami' peta'a qauaỹaañi de'era qami' so'oteque? ₁₃Qami' naxa da Aỹem qauỹaxañiỹa, qalaq qoñiỹapec da Aỹem Napaxaguenataxanaq, qataq Aỹem Qarataxala'ai. Qaq damaye saishet da seqoleguet, cha'aye ỹataqta 'eesa da Aỹem Napaxaguenataxanaq qataq Aỹem Nataxala'. ₁₄Qaq Aỹem, maye Aỹem Qarataxala'ai qataq Aỹem Qanapaxaguenaxala'ai seỹota'ape naua qarapia'achilli', qaq nagui no'on da ñi 'oonolec da qoñiita nataqa'en iỹoi' naua lapia'ate ca lỹa. ₁₅Aỹem qami' sachaxanalo de'era, da yaqto' nataqa'en qami' qauo'oche. ₁₆Qaq ỹataqta 'eesa de'era qami' sa'axatema, da qaica ca nlatac da napacalec da la'amaqchec ca na'aco', qataq qaica ca namaxashec da ishet da napacalec cam ỹamaqtac camaye. ₁₇Qaq qami' da qauaỹaañita de'era, nache qauo'oche, qaq huaña, nache ỹataqta qauamaichiguiñi.

₁₈Qaq Aỹem saishet da imauec da qoñiita da qami' setaqtapoiguilo, cha'aye Aỹem sauattoota nam ỹataqta ica'aguishecpi. Qalaxaye no'on da ỹataqta ipacchiguilo naua nanettralec ana nere maye huetalec na la'aqtacpi Ñim Lo'onatac 'Enauacna maye 'eeta': «Cam maiche iquia'axaua, qalaq camaye Aỹem dataỹa'aguet.» ₁₉Qaq Aỹem qami' sa'axatema de'era, yaqto' qom ivita da ipacchigui, nache qami' ishet da qaua'amaqchiñi da Aỹem maye Nachaỹem. ₂₀Qaq ỹataqta 'eesa de'era qami' sa'axatema, da ca ỹaconeguet cam ỹamaxashec, qaq camaye Aỹem maye Aỹem ỹaconeguet. Qaq cam Aỹem ỹaconeguet, camaye ỹaconeguet Ñim Aỹem namaq.

₂₁Qaq co'ollaq ime da nasaxauec de'era la'aqtac, nache So Jesús ỹataqta sa nalo'oguet da 'eeta. Huaña, nache ỹataqta ỹa'axatta de'era, 'eeta':

–Ỹataqta 'eesa de'era qami' sa'axatema, da 'oonolec da qoñiita ñi Aỹem ỹaneuo qome.

₂₂Nache soua lapaxaguenataqa namatapega't, cha'aye sa ỹaỹate'n chaq negue't cam qoỹeetega soomaye. ₂₃Qaq huo'o so 'oonolec soua lapaxaguenataqa So Jesús, som ỹataqta nauochaxaua, qaq somaye nache netaua'a na laỹe da lquia'axaua. ₂₄Nache so Simón Pedro ỹo'ot so la'anec da yaqto' somaye inat So Jesús, da chaq negue't ca 'eetega Somaye. ₂₅Nache somaye nquigueua'a So Jesús, nache inat, 'eeta':

–'Am Ỹataxala', ¿chaq negue't camaxa cam 'am ỹaneuo?

₂₆Nache So Jesús 'enapeco':

–Aỹem qome ñauolchiiñi ca laỹe ana nauole 'ayiiña, qaq cam sami', qaq nacheca camaye.

Ime, nache Somaye nauolchiiñi so laỹe aso nauole, nache ỹami' so Judas Iscariote. ₂₇Qaq co'ollaq lcopa'a da ỹaconeguet so laỹe aso nauole so Judas, nache so pa'aguenataxanaxaic taigui da lquiyaqteỹaxac somaye. Nache So Jesús 'enapego', 'eeta':

–'Am Judas, 'auỹalapegue' dam huotaique da 'auo'ot.

₂₈Qalaxaye saishet da huo'o ca 'oonolec soua lquia'axau' maye datataleguete so nquia'axala' da huo'otaq ỹaỹaten da chaq ta'ainec da 'enapec de'era. ₂₉Cha'aye so Judas, somaye nacheso so ilotague' aso nme anom So Jesús qataq soua lapaxaguenataqa, qaq ỹoqo'oye huo'o na ipi'itaxaatega da qoỹeetega somaye da huo'o ca desheenaxana nallec, souaxat se'eso naponaxac le'enaxat Lapascua, huo'otaq da huo'o aca ỹami' anom nam choxoraqpi. ₃₀Nache so Judas co'ollaq ime da ỹaconeguet so nauole laỹe, nache pa'auec. Qaq mashe pe.

₃₁Qaq co'ollaq mashe jec so Judas, nache So Jesús 'enapegalo soua lỹa't lapaxaguenataqa, 'eeta':

–Nagui qaỹachaxan da llo'oxoyec na Shiỹaxaua Llalec, qataq da llo'oxoyec Ñim Lo'onatac 'Enauacna, qaỹachaxan da chegoqchigui qanqa'en Namaye. ₃₂Qaq da ne'ena Shiỹaxaua Llalec da ỹachaxan da llo'oxoyec Ñim Lo'onatac 'Enauacna, nache Ñimaye nataqa'en ỹachaxan qome da llo'oxoyec namaye, qaq mashe saqaỹaloq da ỹachaxan damaye. ₃₃Qami' ỹalqolqa, mashe saqaỹapeque da qami' saq soota'agueta. Qaq qami' qome Aỹem qanmichiitaique, qalaxaye nache 'eeta'am de'era ỹa'aqtac co'ollaq sheetega na judiopi da sheeta': Saishet da qauañoxoche da qanqo'oñiỹa cam soota'a. ₃₄Qaq nagui qami' sanema da dalaxaic namaxasoxonaxac, 'eeta': Ñi 'oonolec da qoñiita ỹataqta ỹauotec ca lỹa. 'Eeta'am da sheetec da ỹataqta qami' sauoteque, qaq nachera qome da qoñiitec da ñi 'oonolec da qoñiita ỹataqta ỹauotec ca lỹa. ₃₅Qaq ñi 'oonolec da qoñiita ỹataqta ỹauotec ca lỹa, nache 'enauac na huetalec ana 'alhua ỹaỹaten da ỹataqta 'eesa da qami' ỹapaxaguenataqa.

₃₆Nache so Simón Pedro inat So Jesús, 'eeta':

–'Am Ỹataxala', ¿chaq hua'ague ca 'aigue?

Nache So Jesús 'enapeco':

–Cam saigue nagui, 'am saishet da 'auañoxot da 'aigue. Qalaxaye qom mashe lcopa'a, nache 'am ishet da Aỹem qoquegue.

₃₇Nache so Pedro 'enapeco':

–'Am Ỹataxala', ¿ta'ainco' ye saishet da 'am seca'ategue nagui? Ye aỹem qaica ca shega da na'aictaxa da 'am saalec da ñachaalataxac.

₃₈Nache So Jesús 'enapego' somaye, 'eeta':

–¿Ỹoqta 'eesa peta'a da 'am lhuotta da Aỹem 'aỹa'aalec da 'anachaalataxac? Qalaxaye Aỹem ỹoqta 'eesa de'era 'am sa'aqtaxanem nagui, da qom yaqta'a da nỹen ca 'olgaxa, qaq mashe sogote da ivi' tres da 'avi'eguelaxalec da qonetega Aỹem sa 'auauatton.