Job 10

₁«¡Qaq aỹem mashe ñasamiisop da ñaq ñeca'altauec!

Ỹoqo'oye ñematcheguem da ñasaxauec 'enauac na sa saỹamaxarenpi,

qataq ñeqatsheguem 'enauac na ñequi'iguesat.

₂Ỹoqo'oye shenapega Ñim Lo'onatac 'Enauacna, sheeta':

‹¡Saishet qome da 'auo'ot ca ñeuaxanaguec!

nacherato' da aỹem 'aua'aqtaxanem chaq negue'to' ca ỹasouaxashet.

₃Cha'aye da maiche aỹem 'aro'onatac,

qaq, ¿peta'a ỹaỹamaqchiguiño' da aỹem sa 'auyacnapec, qataq da aỹem 'auo'otan?

Qalqo', ¿'auaỹamaxareeta na ỹo'ottac na qauemaicpi?

₄¿Qalqo' da 'armeenaxanaxac 'eeta'am da lmeenaxanaxac ca shiỹaxauatto?

¿Qalqo' naua 'ara'ai'te 'eeta'ama naua qara'ai'te?

₅¿Naua 'ana'axa'te peta'a 'eeta'amo' naua na'axa'te ca choche shiỹaxauatto?

Qataq naua vi'iye da 'anachaalataxac,

¿peta'a saqaỹarauec da 'eeta'am da nachaalataxac ca shiỹaxaua?

₆Qalaq, ¿ta'ainco' da aỹem 'anmittac,

da yaqto' 'auanata ca ñe'enaxac?

Qataq, ¿ta'ainco' da 'auchemaxattaique ca ỹasouaxashet?

₇Qaq na'aictaxa da mashe 'auaỹaten da qaica ca ỹasouaxashet,

qataq qaica ca ishet da aỹem nca'alaxateeguesop da 'ara'añaxac.

₈Qamaq naua 'arhuaxaye maiche aỹem lo'onatac co'ollaxa,

qalaq, ¿ta'ainco' da huotaique da aỹem 'anlaxaañi?

₉'Auennate qome da aỹem 'auachegoxotaigui

ana 'alhua co'ollaq aỹem 'auo'ot,

qalaq, ¿ta'ainco' ye huotaique da aỹem 'avi'eguelaxatoigui anamaye?

₁₀¿Saisheto' da nache 'Am da aỹem 'aucorec co'ollaxa da sheeta'am na huaca lche'?

¿qataq da 'eeta'am namaye da da'añiỹa'a't 'anqa'en co'ollaq aỹem 'auo'ot?

₁₁'Am maye 'auo'oxoolec co'ollaxa na lo'oc na ỹapat,

qataq 'auo'oxona't ana lo'otapi naua ipi'ineqa.

₁₂Aỹem 'aỹa'anem da ica'alaxa, qataq da 'arsoxoyec,

qataq da 'artelaxa nachera da aỹem nca'alaxattauec.

₁₃Qalaxaye sela'a da huo'o da 'oxottañi añi 'arquiyaqte,

qaq nagui saỹateeta da 'arhuennataxa saqcha'a, 'eeta':

₁₄'Am, aỹem 'anauaatac da huo'o ca ỹasouaxashet,

huaña nache 'auo'ot ca ñeuaxanaguec souaxat cam ỹasouaxashet.

₁₅Qaq da huo'o ca ỹasouaxashet,

nache aỹem seqat, qaq da qaica ca ỹasouaxashet,

qalaxaye ñaq 'eetalec huo'o da ña'aloxonaxac.

¡Cha'aye aỹem nlaqchigui da ñeque'eenaxac qataq da ỹaquicoxo!

₁₆Qaq da ñachaañi nache qoneta'am ca shiguiỹac

maye dequi'iỹapec, da aỹem 'anqapecot da yaqto' aỹem 'ato,

qaq 'era da 'eetec da ỹoltaq aỹem 'auachaxana da lta'araic 'ara'añaxac.

₁₇Saishet da 'aueetaique ca dalaxaic 'aratenataxanaxanec,

da aỹem ỹasaxalec ca ỹasouaxashet,

cha'aye da 'aralemataic da sheeta ỹataqta 'anquigaxattauec,

¡'eeta'am 'anqa'en ca qalota alleppi da aỹem iloquiaxaatac!

₁₈¿Ta'ainco' co'ollaxa da aỹem 'aua'aqta'a da sañiguiñi?

'Onaxaictoxo' da nache seleu co'ollaq saxanaxa da huo'o ca aỹem ila'a.

₁₉Nache aỹem sachegoqtoigui taxa na lauel aso ỹate'e,

da aỹem qairouga aca ñeuachiqui,

nache sheeta'am taxa da 'eco' nache 'eetai' da aỹem qaica.

₂₀Cha'aye da ñachaalataxac mashe nayeeta'a ca loga't,

nache 'onaxaictoxo' da aỹem 'aua'axaỹa'a da selactapiguiñi,

yaqto' cara'acolec da huo'o da ỹamaicỹaxac,

₂₁llaxatemaq saxanaxa da ivita da ashec,

cha'aye nache saishet qome da ñe'eguelaq,

da saỹa cam 'alhua maye huaña na lpaqal qataq na napalaxa,

₂₂cam 'alhua maye huaña na lta'araic napalaxa,

qataq qaica ca laỹamqa', cam 'alhua maye

ne'ena yo'oqchiguiñi 'eeta'am na napalaxa.›»