So Job detaqa
1So Job qaltaq detaqa nache, 'eeta':
2«¿Chaq laguio' qaq qaỹa'axañiiñi da qaica ca ỹamaic qanqa'eñi,
qataq da aỹem ique'emaqche't naua qara'aqtaqalle'?
3Qataq qavi'iguelaxacheetalec da aỹem qaunoxoqchichiitac,
¿Qalaq qaica ca qara'aloqoi da aỹem qoñiita'ac de'era?
4Qaq na'aictaxa taxa da 'eesa da huo'o ca ỹasouaxashet,
qaq nacheca taxa que'eca ỹasouaxashet da aỹem na'aqchet.
5Qalaxaye qami' qoñiitega
da aỹem qanapacỹalec da no'o'n da qarataqui,
ỹoqo'oye ỹataqta aỹem qaviraxacheetacot, souaxat da ñeque'eenaxac.
6Qalaxaye qami' qauaỹaañita qome da Ñim Lo'onatac 'Enauacna,
nacheñi ñi aỹem ique'emaqchet,
qataq nacheñi Ñimaye da aỹem loxonec aso lqoina.
7Qaq na'aictaxa da sa'alaqtac da sheeta':
‹¡Aỹem qaỹalauat!› qalaxaye qaica ca aỹem hua'axaỹa,
qataq seỹaxaataique ca ñetaunaguec,
qalaq qaica ca aỹem iueelec.
8Cha'aye Ñim Lo'onatac 'Enauacna
ỹapogui so nqa'aic da yaqto' saishet da sateuga,
qataq ỹataqta napalñi naqa'en so ỹec.
9Ñimaye deuotaxanec 'enauac so isallaxa,
qataq ỹacona aso llo'oxoraqte na iqaic.
10Nache ỹataqta sa ỹala'ac da aỹem ỹachoxoren,
da ñaquitaxac qalaq 'eeta'am naqa'en
aca qo'oipaq da qanapogosheguem na lpa'a'pi.
11Nache aỹem imatalec na le'eraxa da layeloxo,
nache aỹem 'eeta'am naqa'en ca mpa'aguenaxaua.
12Nache 'enauac na nalleppi ỹataqta aỹem nalalec,
nache ỹataqta coleesop ye ima',
nache naỹamaxat da aỹem iloquiaxan.
13Nache Ñim Lo'onatac 'Enauacna
ỹo'ot da aỹem ca'ai naqa'en na ỹaqaỹañicpi,
qataq jec naqa'en na ñauochaxauapi,
nache 'eeta'am naqa'en da aỹem ỹaqa'a.
14Na ihuo' le'ecpi qataq ñauochaxauapi, qalaq aỹem ỹalata'a't,
qataq na hueta'a ye ima', aỹem icoua'ai.
15Qaq na hueta'a naxa ye ima' qalaq aỹem 'eeta'am naqa'en ca ỹaqa'a,
qataq ana ỹaqtapi qalaq mashe aỹem sa ỹauatton.
16Qaq da seỹaxana na ỹaqtacpi,
qalaq aỹem sa ỹasateguet,
na'aictaxa da ñachoxoreetot.
17Aso ihua qalaq aỹem daqaicta'aguet,
qataq aỹem deqaiga na ỹaqaỹañicpi.
18Qataq ivira'a na ñaqpiolec aỹem ỹo'otan
da choche soosheguem nache ỹataqta aỹem ỹe'eetac.
19Qataq na ỹataqta ñauochaxauapi, qalaq aỹem ỹaỹemec,
qataq na ỹauotaxatpi co'ollaxa, qalaq aỹem mpa'aguene'.
20Naua ỹapa'acholqa, qalaq lapaxagueta naua ipi'ineqa,
nache choche damonaxaata da ñachaalataxac.
21Qaq ỹataqta aỹem qauchoxoyiñi qome qami' ñauochaxau',
cha'aye da lhuaqỹaxac Ñim Lo'onatac 'Enauacna,
ỹataqta aỹem imatalec da lhuaxanaxanaxac.
22¿Ta'ainco' ye aỹem qaucañiitac
da qoñiita'am Ñim Lo'onatac 'Enauacna?
¿Peta'a sa nalotaño' da aỹem qannaquiitauec?
23¡'Onaxaictaxa da huo'o ca ỹiyiñi na ỹa'aqtacpi,
yaqto' nanettalec taxa ca lcat!
24¡'Onaxaictoxo' da huo'o ca ỹauota'a ca leraxanaxat lcat,
nache ỹerelec ca quiguiñi, huo'otaq ca coma'
da yaqto' nache 'eetai' da nanettalec camaye!
25Qalaxaye aỹem saỹaten da ñi ica'alaxaqui nca'altauec,
qataq nacheñi ñi nachaateguet qome da nleuaxa ana 'alhua.
26Qaq na'aictoxo' da nlachiguiñi na ỹapat,
qalaxaye ỹataqta ñema'ai' qome da ñauane' Ñim Lo'onatac 'Enauacna.
27Qaq nachaỹem qome da selo'ot Ñimaye,
qataq naua ỹa'ai'te ỹataqta ỹauaachiguilo qome Ñimaye,
na'aictaxa da mashe ỹataqta qaica ca ỹa'añaxac.
28Qaq da nache aỹem qaucañiitac nache maiche qannacheela't ta'ainco',
cha'aye 'enauac ne'ena qauempi,
maiche aỹem chegaqaigui.
29Nacherata da ỹataqta qami' iviloxolaqche't qome ca ỹeelonec,
cha'aye Ñim Lo'onatac 'Enauacna,
nacheso som irolec da iuaxan 'enauac na qauemsat.
Yaqto' qauaỹaañiita da huo'o ñim 'oonolec maye nmit 'enauacna.»
