So Sofar detaqa
1Nache qaltaq detaqa so Sofar, maye lma' ye Naamat, 'eeta':
2«Souaxato' da aỹem ỹe'eguelaxaguilo naua iuennataxaco,
nache sa seshet da she'emaqtom da 'am sa sasateguet nagui.
3Souaxat da sa'aqtegalo naua 'arviraqtaxanaxaco,
nache naamaye ỹataqta aỹem inogoqche't,
qalaxaye aỹem saỹaten da 'eetec da 'am sasateguet.
4Mashe 'auaỹaten mque' da nache 'eetai' de'era,
chegoqchiguiña co'ollaq qoỹanalec ana 'alhua na shiỹaxaua,
5cha'aye da lamaicỹaxac na 'etaxaloxoic saqaỹauec,
qataq da ntonaxac na qauemaic pasa'a da imeuo.
6Na'aictoxo' da iviro'ot na piguem da na'amqaanaxac,
qataq da iviro'ot na lo'oc na piguem na lqaic,
7qalaxaye camaye 'eeta'am ca lasoguiñi da taỹa'a da nlaguiñi,
nache na nauochaxauapi sa ỹaỹaten ca hueta'ague.
8Camaye deqat 'eeta'am ca nchoxonaxac,
qataq ca nauanaqchec ye pe,
maye saishet da qaltaq qaỹanata.
9Nache na ilota'a co'ollaxa somaye,
saishet da qaltaq ỹe'eguelaxa da ila'a,
qataq ca lma' saishet da qaltaq qaỹauatton.
10Qaq na llalaqpi qalaq ỹe'eguelaxatot na choxoraqpi,
na lcachaxatpi co'ollaxa somaye.
11Qaq na'aictaxa da ỹataqta ñaq nalota't da la'añaxac da nnogotshec,
qalaxaye da tangui añi huachiqui nache ỹe'eguelaxa da 'alhua.
12Qaq dam qauem maye 'eetega ama da huetaigui na alap
damaye ỹataqta naman da huetalec ñi lachaxat,
13nache da lamaic huetaigui naqa'en na alap,
nache ỹataqta npottacom da napigoqtac.
14Qalaxaye da iviyiña ana da'am,
nache da lshenataxanaxa, 'eeta'am na lshenataxanaxa na na'araxanaq.
15Huaña nache nolec da nsallaxa maye iuoxonañi co'ollaxa,
cha'aye Ñim Lo'onatac 'Enauacna anol naqa'en camaye.
16Qaq cha'aye napigoqtac na lshenataxanaxa na na'araxanaq,
nache ne'ena lshenataxanaxa na na'araxanaq ỹalauat camaye.
17Nache saishet qome da nque'etaxaachigui da chec,
na huaca lche' qataq na te'esaq lli'i,
maye sa qoue 'eeta'am na la'auaxac.
18Qataq 'enauac nam laueguecpi co'ollaxa ỹe'eguelaxatec,
nache saishet da nque'etaxaachigui,
da machiguiñi naqa'en de'era lsallaxa.
19Cha'aye nhuo', qataq ỹachoxoren co'ollaxa na choxoraqpi,
qataq ỹacona na nma'pi maye saishet da lo'onatac co'ollaxa.
20Ỹataqta saishet da nme da lqopitaxanaqtaic,
nache qaica ca no'onañi naqa'en da lauotaxanaqtaic,
21nache qaica ca ỹetauec de'era lqopiche.
Qaq ỹoqo'oye sa qaỹauec de'era laỹamaxa camaye.
22Na'aictaxa da chochaq huañi na hueto'otpi,
qalaq saishet da machiguiñi naqa'en,
nache talec camaye da lhuaqỹaxac na qauemaicpi.
23Qaq da ivita da nshetaique da icoma',
nache Ñim Lo'onatac 'Enauacna, imatalec camaye da lalemataic,
nache icorelec da layeloxo, 'eeta'am naqa'en na auot.
24Qaq na'aictaxa da 'eteguet ca no'ogoxonaxat lcat,
qalaxaye nache 'ena'am iviralec camaye aca checna,
maye chegaqaigui na lcat bronce.
25Nache ỹapacaviigui da lo'ocỹaxac ana nchecna,
qaq na lsheenec acamaye, nache ỹapacaviigui ñi l-lamec,
nache ỹataqta lta'araic da lcolanaxa.
26Nache camaye taỹa'a da huetaigui ca ndotec napalaxa.
Nache ca norec maye sa iuen da qaỹalon,
imeuo naqa'en camaye,
qataq 'enauac ca logoxoshetpi que'eca lma'.
27Nache na piguem ỹachaxan na lasouaxashetpi camaye,
qataq ana 'alhua nachaañi da ỹasaxalec camaye na lasouaxashet.
28Cha'aye da lalemataic Ñim Lo'onatac 'Enauacna talec qome camaye,
nache daqat 'enauac da lsallaxa.
29Qaq 'era da 'eetec da taỹa'a ca qauemaic,
cha'aye nachera da ỹaqataxaatai' Ñim Lo'onatac 'Enauacna,
da talec naqa'en camaye.»
