1Aỹem maiche iuennataxa co'ollaxa da ne'enaua ỹa'ai'te,
saishet da iloguilo ñaqa'en aca 'alo maye saxanaxa da huaron.
2Cha'aye ¿negue'to' ca chegoqo'ot Ñim Qaica ca Ỹaqalanapec,
da ỹachegoxottot na piguem da aỹem ỹanem?
3Cha'aye ¿saisheto' peta'a da sa nachena
na qauemaicpi da nlaguiñi qanqa'en,
qataq na 'etaxaloxoicpi da talec qanqa'en da lachoxoyecỹaxac?
4Qataq Ñim Lo'onatac 'Enauacna
¿saishet peta'a da ila'a da ỹecỹaxac,
qataq saishet peta'a da imete'n naua iqauaxaqui'?
5Cha'aye da iqauaxac sa ỹauanago' da shectague' ca sa ỹaỹamaxañi,
qataq sa ñeqalgoqta'a ca natenataxanaxac.
6¡Qaq 'onaxaico' da Ñim Lo'onatac 'Enauacna naloqten da ỹataxac,
nache maiche ỹaỹaten da qaica ca ỹasouaxashet!
7Da huo'otaq sheca'ai da no'on ñecỹaxac,
qataq da iquiyaqteỹaxac da quegue da maiche imeenaxanaxac,
huo'otaq da naua ihua'q huetaiguilo na qauem,
8nache ca ỹaqa'a, chec qome na ala ca ỹañiguishec,
qataq ỹataqta napo'c naua lpa'aye anam saañepi co'ollaxa.
9Da huo'otaq nasheeta da iuennataxac da seca'ategue aca 'alo,
huo'otaq da ñauaatac ca nasom aca lhua ca iuoreua,
10nache añi ihua qome l-lata ca ỹaqa'a ỹale,
qataq ca saqaỹauatton ishet da lauañi'.
11Cha'aye damaye ỹo'ot da qauem na'aqtaxanaxac,
ỹoqo'oye na aloico lo'o' iuen da nmit, nache ỹauo'o ca nhuaxanaguec.
12Cha'aye damaye 'eeta'am na norec da huo'o na nlaxatchiguiñi,
da nlaxaañi 'enauac na ỹalamaxatpi.
13Qaq da sa selo'oguet co'ollaxa na ilatacpi huo'otaq ana ilatapi,
da aỹem dequictacot da sanem ca iỹaxaataique.
14Qaq ¿'eeteco' ca ỹa'aqtac
da aỹem iỹaxaneuga Ñim Lo'onatac 'Enauacna?
Qataq ¿'eeteco' ca ỹasataxac da aỹem inat Ñimaye?
15Cha'aye nacheñita Ñim Lo'onatac 'Enauacna
da qomi' lo'onatacpi co'ollaq ñaq sonaqtaigui na lauel aso qomi' deco'oic.
Nache namayepi qataq aỹem nache shenaqta'a't
da qomi' ỹanema da qarca'alaxa.
16Aỹem saỹauanago' da sa sa'axaỹa da nachoxonnaxac na choxoraqpi,
qataq saishet da sasheetem ana pa'ai da ỹoqouat.
17Qataq aỹem saỹauanago' da aỹem 'oonolec da seque'etac,
nda'a't da ñeuaata'ai' na qaicaua caua lta'al.
18Cha'aye co'ollaq ñaq aỹem nsoqolec,
qaq nache 'eetai' da 'eco' aỹem lta'a na qaicaua ca lta'al,
qataq ñepaxattalec ana pa'aipi.
19Qataq saishet da choche selota'a da ileu na qaica ca napogoña,
huo'otaq na choxoraq maye qaica ca lapo',
20ỹoqo'oye na laue ana ilo qaguetapi
nachena na dapaqtai' naqa'en camaye,
ỹoqo'oye aỹem ỹaatacot da na'achecỹaxac.
21Qataq saỹauanago' da sareetalec ca qaicaua caua lta'al
da serolec da shenec da yaqto' aỹem ỹalaxaguet na aloico lo'opi.
22Ỹoqo'oye da satenataxaatac nache no'ono'
da huaca'c naua ihuaxaye, qataq vi'ilec na ilaq.
23Cha'aye aỹem ỹataqta huo'o da 'enec ñaqa'en
Ñim Lo'onatac 'Enauacna, souaxat da lhuaxanaxanaxac,
souaxat da sa ñalo'oguet da la'amaqchec Ñimaye.
24Ỹoqo'oye saishet da huetalec da ñaquitaxac ana oro,
qataq saishet da sepe'etega anamaye.
25Qataq saishet da ỹo'ot da ỹamaicỹaxac da qalota isallaxa,
huo'otaq da qalota ana ỹaueque aỹom.
26Qataq da semeteetac da llo'oxoyec na le'eraxa añi nala',
huo'otaq da llo'oxoyec na le'eraxa ñi ca'agoxoic.
27Qataq saỹauanago' da ñeqañoxotchiguiñi da ñatamnoto,
qataq saỹauanago' da ñapigoq na ihuaq da sanoto naamaye.
28¡Cha'aye de'era nasouaxashet nataqa'en ishet
da qanmit, nache qaỹauo'o ca nhuaxanaguec,
cha'aye aỹem 'eeta'am da saq'en ñaqa'en
Ñim Lo'onatac 'Enauacna maye neto'ot na piguem!
29Qataq saishet da ñetootapeguec da huaigui,
ca qauem ca aỹem ipa'agueetac, qataq saishet da samachiguiñi
da nvita camaye da lachoxoyecỹaxac.
30Qataq saỹauanago' da sasaxalec camaye ca ỹa'aqtac qauem,
qataq da sayeeta'a da ileu.
31Qataq saishet da huo'o ca 'oonolec na aỹem neto'otpi,
da huo'otaq saq comaraxaic da datalec ca iquia'axala',
32qataq na chegaqauecpi saishet
da huo'o ca do'ochauga ñaqa'en na nqa'aic,
qataq saishet da sa sauatoigui ñi lasom ñi ima'
da yaqto' pa'auo ca queuoxoic.
33Qataq saishet da soxottañi ca ỹasouaxashet,
da sheeta'am ca camachaqca shiỹaxaua
qataq da nache 'eetai' da soxottapiguiñi ca ỹasouaxashet,
34cha'aye souaxat da she'etapeeguet na shiỹaxauapi.
Nache saishet da ñapotala't qataq saishet da ñe'emaxatta,
souaxat da she'etega da le'enaxanaxac na maiche ihuo' le'ecpi.
35¡Daiyoxo' da huo'o ca aỹem hua'axaỹa,
nache ỹataqta ñanerelectaxa de'era shenapec.
Qaq Ñim Qaica ca Ỹaqalanapec aỹem ỹasateguet qome!
Da huo'o ca nshetaique da aỹem dataỹa'aguet
da huo'o ca aỹem ỹasaxalec ỹasouaxashet,
36nache ỹataqta ñallaguisheetactaxa que'eca ỹasouaxashet,
nache 'eeta'am ñaqa'en da ñaro'ootaña.
37Nache aỹem ỹataqta sa'axattem taxa
Ñim Lo'onatac 'Enauacna, 'enauac na so'otpi.
Qataq da ñeqo'oneua'a Ñimaye, nache ỹataqta ño'onaxatta da ỹataxac.
38Na ña'alhuapi saishet da iỹaxaatacot na piguem da aỹem dataỹa'aguet,
qataq saishet da nỹeetac na mashe qana'atsheguem 'alhua.
39Qataq da huo'o ca secachiỹa ca lañiguishec ala da sa sesheeten,
huo'otaq da huo'o ca sachoxoren,
na lalamaxat ne'ena nañiguishecpi,
40¡nache na ña'alhua ñaxaalec qome ana ỹaxat,
nmeneguet na trigo, qataq na qauem 'auaqpi nmeneguet na cebada!
