Da lỹa la'aqtac so Eliú
1Qaltaq detaqa so Eliú, 'eeta':
2«Qami' ỹaanaxanaxaiqa, qataq qami' paxaguenataxanaxaiqa,
ñaq qana'axaỹaxañiỹalo qome naua ỹa'aqtaqa.
3Cha'aye da na'axaỹaqchec ỹaỹateeteguelo naua lleco naua na'aqtaqa,
nache 'eeta'am ñi qanaquiac da ỹauatton da lamaic na ỹotta'a't nallec.
4Ỹoqo'oye qomi' ñetoxonaqalec qome da ñimitaq 'enauac de'era lataxac,
nache so'otaq ca ỹataqta saỹamaxarenaqta.
5Qalaxaye 'am Job, qoneta':
‹Aỹem qaica ca sasouaxat,
qalaxaye Ñim Lo'onatac 'Enauacna
saishet da aỹem ỹo'otec ca ỹaỹamaqchiguiñi.
6Qaq nagui 'eco' da aỹem shepecaic
na'aictaxa da qaica ca sasouaxat,
qalaxaye da ique'emaxa saishet da no'oita,
na'aictoxo' da qaica ca ỹasouaxashet.›
7¡Qalaxaye 'am Job, huo'o peta'a ca 'am 'eeta'am!
Da ỹataqta 'aue'enai' Ñim Lo'onatac 'Enauacna,
da 'autaqa qalaq 'eeta'am ca saỹala'ac da nỹomigui na 'etaxat,
8ỹataqta 'anqopita da 'aualectaigui na qauemaicpi,
qataq da 'annaictague' na qauem da lataxac.
9Qataq qonetega qaica ca naigui ca shiỹaxaua,
da huotaique da ỹaỹamaxareeta camaye Ñim Lo'onatac 'Enauacna.
10Ỹoqo'oye qami' shiỹaxau' ỹaanataxanaxaiqa, aỹem qana'axaỹaxañiỹa qome.
¡Saishet da qaupichiitega da Ñim Lo'onatac 'Enauacna
maye Qaica ca Ỹaqalanapec,
ishet da ỹo'ot ca qauem huo'otaq ca sa ỹaỹamaxañi!
11Ñimaye isheeten ca naigui da lo'onataxanaxac ñi 'oonolec,
qataq ipacchigui da ỹanem ca chegaqaigui da no'on lataxac.
12Qaq ỹoqta 'eesa da Ñim Lo'onatac 'Enauacna,
maye Qaica ca Ỹaqalanapec saishet da ỹo'ot ca qauem,
qataq saishet da ỹashaxanec da lataxac ca ỹaỹamaqchiguiñi,
13Cha'aye ¿negue't ca ỹanem da la'añaxac Ñimaye da ỹo'ot ana 'alhua?
Qataq ¿negue't ca ỹanem Ñimaye da ishet da ilo'ogue 'enauac ana 'alhua?
14Qaq Ñimaye da nqattaxa so saqcha'a nca'alaxa,
qataq da ỹaconalo naua na'a'che,
15nache 'enauac na shiỹaxauapi 'eeta'a't da ileu,
qataq 'enauac da ipactegue da ỹe'eguelaxaigui ana 'alhua.
16Qaq da ỹoqta 'eesa da 'am ỹaanataxanaxaic,
qaq aỹem 'ana'axaỹaxana nache ỹataqta
'ana'axaỹaxaachiguilo naua ỹa'aqtaqa.
17Cha'aye ¿isheto' peta'a da ilo'ogue na shiỹaxauapi
ca saisheteguet da llec da ỹaỹamaqchiguiñi lataxac?
Qataq ¿isheto' peta'a da 'auo'ot ca nhuaxanaguec
ca ỹaquitcheguem da no'on da lataxac?
18¿Peta'a isheto' da qaỹamata'ac qauemaicpi na nta'alpi,
qataq da qaỹamata'ac da qaica ỹaỹaten na llalaqpi na nta'alpi?
19Qaq Ñim saishet da lca'atagui na llalaqpi na nta'alpi,
qataq saishet da ỹapagaqnauec da ỹauotec na sallaxanecpi,
cha'aye namayepi nache 'eeta'am na choxoraqpi,
cha'aye Ñimaye saishet da 'eetec de'era,
cha'aye 'enauac namayepi maiche lo'onatacpi.
20Na shiỹaxauapi huo'o da nque'elaxatta da huaigui ye pe da ileu,
qataq huo'o da maiche taỹa't, nache imeuo,
qaq na 'añaxaicpi qalaq qaỹamaqauec
saishet da qairolec da yo'oqchigui na'añaxac.
21Cha'aye da lmeenaxanaxac Ñim Lo'onatac 'Enauacna,
ilotague' da llecỹaxac ca shiỹaxaua,
qataq naua'n naua lqauaxaqui'.
22Qaica ca lta'araic lpaqal, huo'otaq ca lta'araic napalaxa,
da ishet da nqañoxotoigui ca ỹo'ottac na qauem.
23Ñim Lo'onatac 'Enauacna saishet da ỹauo'o ca laloqo',
ca shiỹaxaua da yaqto' nachaateua'a Ñimaye da nmit camaye.
24Qataq Ñimaye saishet da iuen da ichemaxata,
da yaqto' ỹalolaxaañi na 'añaxaicpi,
nache ỹanem ca lma' ca lỹa.
25Ñim Lo'onatac 'Enauacna ỹaỹaten
'enauac na ỹo'ottac namayepi, ỹoqo'oye da ivita ye pe,
nache nlaxaañi, nache huetaiya' naqa'en.
26Nache iuaxaatalec da 'eeta'am naqa'en ca qauemaic,
huaña naqa'en ca ishet da qaỹauaachigui camaye,
27souaxat da ỹaxanec da quetague' Ñimaye,
qataq saishet da quegue da lapaxaguenataxanaxac.
28Nache ỹo'otec da iviro'ot Ñim Lo'onatac 'Enauacna
da la'alaxac na choxoraqpi, qataq da huetaiya' qanqa'en,
nache Ñimaye hua'axaỹa de'era la'alaxac namayepi.
29Qaq Ñimaye da nañaxaañi,
qaq ¿negue't ca ishet da ỹo'ot ca nhuaxanaguec?
Qataq da ỹoxooñi da lashiguiỹaxac,
nache ¿negue't ca ishet da ila'a?
Qalaxaye Ñimaye nauaatalec na ỹotta'a't shiỹaxauapi
qataq ñi 'oonolec namayepi.
30Yaqto' na qauemaicpi saishet da ilo'ogue na shiỹaxauapi,
qataq saishet da ỹatenachet na nhuo' le'ecpi, maye lalamaxat Ñimaye.
31Qalaxaye da huo'o ca da'aqtaxanem Ñimaye da 'eeta':
‹Aỹem huo'o co'ollaxa da ỹasouaxashet,
qalaxaye nagui saxaañi da 'am senogoqchettac.
32Qaq ỹoqo'oye aỹem 'auachaxana ca saishet da sela'a.
Qaq da qauem ca so'ottac, nache saishet qome
da she'eguelaxalec da so'ot.›
33¿Qalqo' 'anshetaique peta'a da Ñim Lo'onatac 'Enauacna
'am isheeten da 'am ỹanem ca ỹoqta qonetapeguec,
na'aictoxo' da sa 'anasheneguet huo'otaq da sa 'auasateguet?
Cha'aye saishet da nachaỹem da huo'o ca so'ot,
maye 'am 'auo'ot cam qonetapeguec,
ỹoqo'oye ñaq 'aua'axat nagui cam 'araỹaanec.
34Nam shiỹaxauapi ỹaanaxanaxaicpi maye aỹem na'axaỹaxaatega,
qataq cam shiỹaxaua qaica ca nqalaate', 'eeta' qome:
35‹Da Job detaqtac qalaxaye sa ỹaỹate'n naua 'ena'ape
naua la'aqtaqa qalaq qaica ca naiguilo.›
36¡Qaq ỹoqo'oye 'onaxaico' da ỹataqta qanmitta da Job,
cha'aye naua nanoldec la'aqtaqa 'eeta'ama
naua la'aqtaqa ca qauemaic!
37Qataq saishet da nacherata da huo'oi
naua lasouaxashe'ete cha'aye nataqa'en sa ỹalaq,
cha'aye sauanaqchigui da ỹe'eetac Ñim Lo'onatac 'Enauacna
qataq ỹataqta ncotatague' Ñimaye.»
