Detaqa so Elifaz
1Qaq so Elifaz maye lma' ye Temán, 'enapeco':
2«'Am Job, yo'oqta da 'am sa ỹalemaxat,
da huo'o ca 'am detaqtacot,
qalaxaye negue'tom ca nalo'oguet da saishet da detaqa.
3'Am saishet 'auapaxagueetac co'ollaxa na qalota shiỹaxauapi,
qataq 'aua'añaqchettac nam qaica ca la'añaxac,
4'am maye naua 'ara'aqtaqa ỹataqta ỹa'añaqche't naxa da huo'o na huañi,
qataq nlletañi da huo'o na sara'añeeguelo naua lchel.
5Qalaxaye nagui da 'am nvita da qauem, nache saishet da 'analo'oguet,
souaxat da 'am huelec 'anque'eenaxac.
6'Am maye ỹataqta qoquetegue da huo'o naq 'enec 'anqa'en Ñim Lo'onatac 'Enauacna,
qataq ỹataqta no'on 'anqa'en da 'arataxac,
¡qalaq taloxochiyo' da sa 'aupi'iỹa'a Ñimaye!
7Ña 'auennataxan, ¿peta'a huo'o ca shiỹaxaua
da qaica ca ỹasouaxat nache qaỹo'ot ca nhuaxanaguec?
¿Qataq ca no'on da lataxac nache qanlaxaañi?
8Nam ỹauanaqchecpi aỹem ỹapaxaguenec,
da na ỹo'ottacpi na qauemsat qataq na saỹaỹamaxañipi,
nache namayepi ỹaconeguet ca naigui nam ỹo'ottacpi.
9Naua la'a'che Ñim Lo'onatac 'Enauacna nlaxaañi namayepi,
qataq da nquetetec na la'at souaxat da lalemataic,
nache imeuo naqa'en namayepi.
10Qaq na'aictaxa da desoqo da 'eeta'am ca llon qataq ỹa'alaq ca llalec,
qalaxaye naua lhue ca llalaqpi ivira'a da dolaguilo.
11Nache ca llon ileu souaxat da qaica ca loxonec,
nache ca llalaqpi nlagaxattac.
12Qaq huo'o co'ollaxa so ỹa'axaỹaxac,
qalaxaye saqallegueme da sa'axaỹa,
'eeta'am da aỹem qaisoxootot.
13Qaq so pe co'ollaq mashe 'enauac da do'oche so shiỹaxauapi,
nache ỹataqta qauem so ỹo'ochaxa.
14Nache da icolanaxa aỹem loxonec,
nache iviloxol 'enauac da ỹo'ocỹaxac.
15Qaq huo'o so la'at atomteguet ỹasheeroigui na ỹashec,
nache ỹataqta ỹapochaqchet na ỹo'oc.
16Qaq huo'o so sela'a nqui'i nachattañi,
qalaxaye sa sela'a ca ỹoqta lashiguiỹaxac.
Qaq ỹataqta ntochiguiñi. Qalaxaye sa'axaỹa so nvilỹaxac, 'eeta':
17¡Qaica ca shiỹaxaua da no'on da lataxac da napacalec Ñim Lo'onatac 'Enauacna!
¡Qataq qaica ca qui'itta da nachaalataxac da napacalec Ñimaye!.
18Qataq ivira'a na lo'onataxanaxanecpi piguem le'ecpi,
qaica ca sa npi'itaxana,
cha'aye ivira'a na lamaxashec piguem le'ecpi
Ñim Lo'onatac 'Enauacna, ilalec na lasouaxashet.
19¡Qaq taloxoche saq 'ena'amo' ca choche shiỹaxaua,
maye netaigui ca nỹec 'alhuolec maye na'attalec na 'alhua maye sara'angui,
nache ishet da qaipataxañi 'eeta'am catai' lalaxat ca nogoxot!
20Ye nte'eta qataq ye avit nache camaye nlaguiñi,
nache ỹataqta imauec da daqat, qataq qaica ca ishet da iteetega camaye.
21Da lyacỹaxac nache quetañi' namayepi da daqat,
qataq da ileu, qalaq saishet da ivi' da ỹaconeguet da naỹaanec.
