1«¿Peta'a ishet da 'arqoishec so da'ailo'oc lta'a
le'enaxat Leviatán? Qataq ¿ishet peta'a
da 'aucoñeragui na lachaxat ca 'arañec?
2¿'Aushet peta'a da 'aua'arec na lmic da 'aỹa'anagui ca lquet,
qataq da 'aua'arec na lanoc 'auauota'a ca 'emaxanaxat?
3¿Qataq ishet peta'a somaye da 'am nachoxonnot da yaqto' 'auchoxoren,
qataq da 'am nachoxoreetot da 'am iỹaxanot?
4¿Qalqo' 'aupi'itaxaatega peta'a
da nañan somaye da choche 'arlatac,
'enauaque naua na'axa'te da nachaalataxac?
5¿Qataq 'aushet peta'a da 'aua'aistague' da 'eeta'am 'anqa'en na qoỹo?
¿Qataq da 'aucoñerai' da yaqto' la'ashaxantac 'anqa'en na 'aỹa'alpi?
6¿Peta'a ishet na nmenaxaicpi da imen da huaña ca nmenaqa' na nmenec?
¿Qataq npilliguiñi na lapat da yaqto' imen?
7¿Isheto' peta'a da 'aurolec aca checna da ỹapacaviigui 'anqa'en na lo'oc,
huo'otaq na lqaic da 'aurolec aca 'ara'araxanaqte?
8Qaq da ivita da 'aupoteua'a somaye,
nache 'am saishet qome da 'aucoua'ai da 'eetec da 'auloctague',
qataq nache saishet da lỹa da 'avi'eguelaxalec da 'aulogui'.
9Cha'aye da choche qailogui se'eso lta'a na da'ailo'oc le'enaxat da Leviatán,
nache ishet da huo'o na decopcha'am da lcolanaxa.
10Qataq qaica da huo'o ca ishet da inogoqchet,
cha'aye da deno, nache qaica ca ishet da dataỹa'aguet.
11¿Negue'tom ca ishet da delogui' somaye,
nache ishet da no'oita qataq nca'altauec?
12Qaq saishet da sa sa'axat na laỹe logoxoshetpi somaye,
qataq dam qaica ca 'ena'am la'añaxac.
13¿Negue'tom ca ishet da nqat na lo'oc somaye?
¿Qataq negue't ca ishet da nauatsheguem
na sansattec lo'oc maye lpaqtaxanaxat somaye?
14¿Negue'tom ca ishet da nauatshegue'm naua alap laỹel,
da yaqto' imeten ana ỹataqta huo'o da lchec lhuepi?
15Na l-laq qalaq quetegue na qaramta lo'oc maye lpaqtaxanaxat,
napotelec qataq ỹataqta qaramta 'eeta'am na coma'.
16Namaye ỹataqta nhuocta't, ñi 'oonolec huaqte' na lỹa,
ỹoqo'oye na la'at saishet da ỹapacaviigui.
17Ỹataqta na'atta't qataq ncoñetta't,
ỹoqo'oye qaica ca ishet da iỹottecache.
18Qataq da lachemnaxanaxac 'eeta'am na nqashelgaxa,
naua la'ai'te qalaq 'eroiguilo 'eeta'am añi nala' da mashe yo'oxoñi.
19Na alap qalaq chegaqaigui na le'eraxa,
qataq ana lto'o na norec.
20Qaq naua lmic lauaco qalaq nauoiguilo na lmala'q,
'eeta'am ana nqatelaxaqui na lcat da nacham naqa'en na norec.
21Naua la'a'che qalaq 'eroigui naqa'en ana poqo,
qataq na alap nauoigui na norec le'eraxa.
22Na lqosot qalaq qaica ca 'ena'am da la'añaxac,
ỹoqo'oye da qailo'ot nache qaica ca na'añaxac.
23Qataq na huaña na ndotec lapat qalaq ỹataqta qaramta,
qataq saishet da nquic qataq deraỹapigui'.
24Qataq añi lquiyaqte ỹataqta qaramta 'eeta'am ana coma',
qataq 'eeta'am na coma' namaicnaxanaxat.
25Qaq da ivita da ñisheguem, nache ñi'i naqa'en na 'añaxaicpi,
nache datauec souaxat da lcolanaxa.
26Nache na ỹeelonec qataq ana taquiaxai
qataq ana checna qataq na nasaxasoxonaxat shetteguet,
saishet da ỹañoxot da inoxoneuo da qaỹa'arapec.
27Qaq na lcat qalaq 'eeta'am naqa'en na 'auaqpi,
qataq na lcat bronce 'eeta'am naqa'en na qo'oipaq ltoxoic.
28Ana checna qalaq saishet da datauec naqa'en,
qaq da qaipoquen da qaira'a na coma'
qalaq 'eeta'am naqa'en da qaira'a na 'auaqpi.
29Qaq da qaira'a na pon da qaiuaxan,
qalaq 'eeta'am da qaira'a ana coqta
choche ỹe'eetac da hua'axaỹa na l-lamaxa ana taquiaxai.
30Da hualecapigui' qalaq huo'o na lliguiñi na nshaxa ana laso,
'eeta'am na lliguiñi ana le ana namoxoỹaqtaxanaqte lcat.
31Qataq huo'o naqa'en ana lmallaxai
ana auaxai maye qaỹoqchiguingui,
'eeta'am ana lachamaxai ana taxaqui,
da qaỹachangui na qaỹalecna't huoue maye ama na laita.
32Nache no'onañi ana lmallaxai na 'etaxat,
qataq ỹapagaq na lcochaxa, chañi 'eeta'am ana napagaxai.
33Qaq ana 'alhua qaica da huo'o ca 'eeta'am somaye,
somaye qaỹo'ot da yaqto' ncolanaxat.
34Qataq qaica ca naigui naqa'en na 'añaxaicpi,
qataq nacheso so lta'a 'enauac na laỹepi shiguiỹacpi lta'araicpi.»
